Hibru 2 - Ika

Isi Nke Ẹbụọ Nabanhankwọ Nị Okẹn Nzụọpụhanị!

¹ Ẹnyi k'e kwọnkẹnmẹrịrị ihiẹn ẹnyi nụ, amamgbe ẹnyi a kpahu.

² Makẹni, omẹni iwu mbụ wẹ gha ẹka ndị mmọn-ozi ye ndị nẹdi ẹnyi wẹ rị mkpa nke wụnị ndị ile nupụ isi okpuru ẹ mọbụ dann'a gi isi wẹ buru ihiẹn wẹ mẹ,

³ nanị ẹnyi a dọn nwan wanahịn omẹni ẹnyi a jụ okẹn nzụọpụhanị nọ ẹnịna, hụn Di-nwọnni-ẹnyi lẹ enwẹn ẹ bu ụzọ zimẹ ozi ẹ; hụn ndị gha ọnụ a nụ a shịa ẹri, ghọsị ẹnyi nị ezioku rọ,

⁴ Chuku lẹ enwẹn ẹ nọzị shịa ẹri ghahanị ihiẹn-nghọsị lẹ ọrụn atụmẹnya ichẹn-ichẹn lẹ oyiye Mmọn-nsọ o yesọnmẹ k'o dọn chọ.

Jesu Wụ Onyẹ-nzụọpụha Zu oke

⁵ Ẹlẹ ndị mmọn-ozi kẹ Osolobuẹ tumẹ nị wẹ kị ụwa lalanị ẹnyi rị e ku oku ẹ, kaka!

⁶ O nwọnghọdẹ ebe wẹ nọ ku ẹ imẹ Ẹkụkwọ-nsọ, sị, “Kị ịhịan wụdẹ nwan i gi e ro ẹ? Kị ịhịan mmaka wụdẹ i gi e lepụ a ẹnya?

⁷ Y'e mẹọlẹ ndị mmọn-ozi karị a ẹkẹrẹ ogẹn; y'e mẹgụọ ọghọ lẹ mgbaye jun ẹ ẹhụ,

⁸ bu ihiẹn ile che okpuru ụkụ a.” O mẹ nwan nị Osolobuẹ “e bugụọ ihiẹn ile che okpuru ụkụ a”, ya wụ nị onwọnni nwan ihiẹn rịlẹni okpuru ụkụ a. Kanị ẹnyi eke hụn nwan ihiẹn ile okpuru ịhịan.

⁹ Kama, ẹnyi rị a hụn Jizọsị, onyẹ ahụn Osolobuẹ mẹ nị ndị mmọn-ozi karị a ẹkẹrẹ ogẹn, kẹni o gi ufiri ẹfọma Osolobuẹ nwụndọnni ịhịan ile ọnwụn; o kpurugụọ nwan ọghọ lẹ mgbaye nọkẹ okpu-eze makẹni ọ tagụọ afụnfụn nwụnnị ẹnyi ọnwụn.

¹⁰ Osolobuẹ mẹ ihiẹn furuni, ebe o mẹ ni ẹka a kẹ ihiẹn ile gha bịa; ebe o mẹ ni ihiẹn ile wụzịkwọ nke ẹ. Makẹni ọ chọ n'ọ zụọpụha ndị bu ọda, webahan wẹ ebe ọ rị, kẹni wẹ wụrụ ụmụ a, sọn ẹ nwọn ọghọ a, ọ nọ gi afụnfụn kwademẹ onyẹ hụn o gi bidọn nzụọpụha hụ, mẹ ẹ ru ogo onyẹ-nzụọpụha.

¹¹ Kẹ onyẹ hụn e dọn wẹ nsọ wụ Jesu kẹ ndị ọ rị e dọn nsọ a wụrụgụọ nwan ụmụ onyẹ ohu. Ịya haịn ifẹnrẹn gilẹni e mẹ ẹ ịkpọ wẹ umunẹ ẹ.

¹² Ọ sị, “M sikọ d'a gwa umunẹ m oku ẹfan ị; m sikọ d'a ja ị mma imẹ ozuzu ẹnyi.”

¹³ Ọ sịzị, “M k'e gi ẹ dọn ẹnya.” Ọ sịzịkwọ, “E lee mmẹ lẹ ụmụ Osolobuẹ ye m.”

¹⁴ Ya wụ, ebe o mẹni ụmụ a hụ wụ ịhịan hụn nwọn ẹhụ-lẹ-ẹdeke, ya nwẹn nọ sọn wẹ wụrụ ihiẹn ohu hụ, kẹni ọ nwụnhụn, gi ọnwụn a tikpọ onyẹ hụn ọnwụn rị ẹka a, ya wụ Ekwensụ,

¹⁵ gi ụzọnị tọpụ ndị hụn egun ọnwụn rị a kị kẹ igbọn kete wẹ mụlẹ wẹ.

¹⁶ Makẹni, o we ẹnya nị ẹlẹ ndị mmọn-ozi k'ọ bịa d'e yeni ẹka, kanị ụmụ Ebraham.

¹⁷ Ya haịn Osolobuẹ gi mẹ ẹ n'ọ rịchanrịn kẹ ẹnyi wụ umunẹ ẹ ụzọ ile, kẹni ọ hụn ụzọ wụrụ onyẹ-isi nchụn-ẹjan hụn e mẹ omikẹn lẹ hụn furu wẹ gi e dọn ẹnya imẹ ọrụn Osolobuẹ, n'ọ hụn ụzọ chụnnị ịhịan ẹjan w'e gi wepụ njọ wẹ lẹ afụnfụn njọ te k'e buhẹ.

¹⁸ Makẹni ẹnya hụn a ihiẹn ogẹn wẹ gi nwan a, ọ sa nwan ẹka e yeni ndị wẹ rị a nwan ẹka.