Hibru 13 - Ika

Isi Nke Mmẹtọ Obibi Hụn A Sụọ Osolobuẹ Ụsụọ

¹ E nwọnsọnmẹ ni ihiẹn-ọsụsụọ umunẹ ụnụ imẹ Kraịstị.

² Egikwọlẹ ni ịnabanhan ndị ọbịa gu egu, makẹni o nwọngụọ ndị gi ẹ nabanhan ndị mmọn-ozi, lee wẹ ọbịa, bụ a marịn wẹ nị ndị-mmọn ozi rọ.

³ A nyanhan nị ndị rị ụlọ-ngan nọkẹ sị ụnụ lẹ wẹ rị ụlọ-ngan; a nyanhan nị ndị wẹ rị e mẹshi ikẹn nọkẹ sị ụnụ kẹ wẹ rị e mẹshi ikẹn.

⁴ Gbayekẹnmẹ ni ọlụlụ di-lẹ-nwunyẹ; kẹ di kẹ nwunyẹ ẹ dọnmẹ enwẹn ẹ makẹ elu-ukpo wẹ gha a rụ, makẹni Osolobuẹ jẹnkọ d'a ma ndị ughẹrẹ ikpe.

⁵ Anịkwọlẹ ni egho a sụọ ụnụ; a nị nị ihiẹn ụnụ nwọn e jun ụnụ ẹfọ. Makẹni, Osolobuẹ e kuọlẹ, sị, “Ahapụkọ m ụnụ; alakọ m ụnụ tọ.”

⁶ Ya wụ, ẹnyi k'a saẹka dụ ẹka obi, sị, “Di-nwọnni-ẹnyi wụ onyẹ e yeni m ẹka, egun atụkọ m; kị ịhịan k'a saẹka mẹ m?”

⁷ Nyanhan nị ndị-ndu ụnụ, hụn gwa ụnụ oku Osolobuẹ; lekpọ nị elu wẹ bi lẹ ihiẹn gha imẹ ẹ pụha; leri nị okukwe wẹ.

⁸ Jizọsị Kraịstị wụkwọ ihiẹn ọ wụ ụnyanhụn, tannị lẹ jẹnrin ejẹn.

⁹ Awụkwọlẹ ni ndị wẹ gi nkuzi rị ichẹn-ichẹn e dufie; makẹni ọ rịka mma omẹni obi hụ e ru ịhịan alị makẹni o gi eyemẹka Osolobuẹ dọn ẹnya, ẹlẹ nị o dọnmẹsọnmẹ iwu ihiẹn-oriri, iwu ndị bantulẹnini ndị e dọnmẹni wẹ erere.

¹⁰ Ukpo nchụn-ẹjan ẹnyi nwọn imẹ Kraịstị, ndị e fe ofufe akan efuruni e sọn ẹnyi e ri ihiẹn rịn'a.

¹¹ Onyẹ-isi nchụn-ẹjan Ofufe-akan hụ e webanhan ẹdeke anụ wẹ gi chụn ẹjan njọ imẹ Ebẹhụ Kachanrịn Nsọ, kanị wẹ a gha imẹ obodo e bupụ ozun anụ lẹ enwẹn ẹ d'a dụn ọkụn.

¹² Ya haịn Jizọsị gizi gha imẹ obodo pụ d'a nwụnhụn kẹni o gi ẹdeke ẹ dọn ịhịan nsọ.

¹³ Nị ẹnyi gha nị nwan imẹ obodo pụ d'e kunrun ẹ ebẹhụ d'e sọn ẹ narịn ifẹnrẹn wẹ gbeye ẹ ihun,

¹⁴ makẹni ẹnyi enwọn obodo ọwụlẹ wụ nke ẹnyi elu ụwa ebeni; kama, ẹnyi rị a tụ ẹnya obodo hụ lalanị.

¹⁵ Nị ẹnyi ghama nị nwan ẹka Kraịstị a chụnyeni Osolobuẹ ẹjan hụn wụ ọjịja-mma, hụn wụ mkpụrụ ọ rị ghọrị ọnụ ndị rị a kpọku ẹfan a.

¹⁶ Hụn n'a nị ụnụ hụ e mẹ ihiẹn rị mma lẹni ihiẹn ụnụ hụ e ru ibe ụnụ ẹka, makẹni ụdị ẹjannị a sụọ Osolobuẹ ụsụọ.

¹⁷ E kweyeni ni ndị-ndu ụnụ, e bu ni enwẹn ụnụ e che okpuru wẹ. Makẹni, wẹ rị e lepụ umẹ-ndụn ụnụ ẹnya. Osolobuẹ jẹnkọ d'a jụ wẹ ukwere ụnụ. Hụn n'a nị wẹ gi ịghọghọ ye mgbakọ hụ, ẹlẹ ẹnya-mirin, makẹ ọ gha a jọ ụnụ njọ.

¹⁸ E mẹni ni ẹnyi ekpere, makẹni ẹnyi a marịnghọ nị obi ẹnyi rị ọchan lẹni ẹnyi achọnị nị ẹnyi mẹ ihiẹn ọwụlẹ ẹnyi e gi fa Osolobuẹ.

¹⁹ M rị a rịọkẹnmẹ ụnụ ekpereni, kẹni wẹ zikin m ẹgwa d'e kunrun ụnụ.

Ekpere

²⁰ Osolobuẹ hụn e ye udọn, Onyẹ hụn gha ọnwụn weli Di-nwọnni-ẹnyi wụ Jesu, okẹn onyẹ-ndu atụnrụn ahụn wẹ gi ẹdeke ẹ biye nkwerigbama itẹbitẹ Osolobuẹ ẹka;

²¹ ya dodo yechanrịn ụnụ ihiẹn ile rị mma ụnụ e gi mẹ uche ẹ, a rụn ọrụn imẹ ndụn ẹnyi kẹni ihiẹn a sụọn'a hụn ụzọ e mẹ imẹ ndụn ẹnyi ghahanị Jesu Kristi. Ọjịja-mma ya rịnị Jizọsị Kraịstị ogẹn ile jẹnrin ejẹn! Isẹẹ.

Oku Ikpanzụụn

²² M rị a rịọ ụnụ umunẹ m, dodo, nabanhan nị oku nkasị-obini m deni ụnụ, n'o suekẹni.

²³ M chọ nị ụnụ marịn nị a hatugụọ wẹ Timoti nwẹnẹ ẹnyi. Mmẹ lẹ ịya jẹnkọ d'a wị m lalanị d'a hụn ụnụ, omẹni ọ bịaghọ ẹgwa.

²⁴ Kele ni ndị-ndu ụnụ ile lẹ ndị-nsọ ile. Ndị hụn gha Itali bịa e zighọ ekele ụnụ.

²⁵ Ẹfọma Osolobuẹ ya rịnị ụnụ ile. Isẹẹ.