Hibru 12 - Ika

Isi Nke Mmẹbụọ Nị Ẹnyi Sọnmẹ Nzọmụkụ Kraịstị

¹ Ya wụ, ebe o mẹ nwan ni igunrun ndị ọshẹri han ẹnịna fihunmẹ ẹnyi lekẹ ọgbọ, nị ẹnyi latọ nwan ihiẹn ọwụlẹ a dọkin ẹnyi azụụn, lẹ njọ ahụn a kụ ẹnyi kẹ ẹgbụn, ẹnyi e dikẹnmẹ, gba ọsọnị Osolobuẹ ketọnị ẹnyi,

² ẹnyi e bu ẹnya zinmẹ Jizọsị, onyẹ hụn bidọn okukwe ẹnyi, onyẹ hụn k'e mẹ ẹ zu oke, onyẹ hụn gi ufiri ịghọghọ rị e chen'ẹ dingbu obe, legberi ifẹnrẹn rịn'a. Ọ nọdịgụọ nwan alị ẹka-nni ukpo-eze Osolobuẹ.

³ Rokpọ nị onyẹni dingbu ihiẹn ahụn ile ndị-njọ mẹ ẹ, amamgbe ndụn a gụ ụnụ mọbụ ụnụ e tuhu okukwe ụnụ.

⁴ Ụnụ eke che njọ ọgụn ụnụ rị e che ẹ d'e ru ebe ọ nọ napụ ụnụ ndụn ụnụ.

⁵ Ụnụ a zọgụọdẹ nwan oku Osolobuẹ gi a gba ụnụ umẹ kẹ ụmụ a ra? Ọ sị, “Nwa m, elegberilẹ afụnfụn Osolobuẹ gi a zụn ị; anịlẹ ndụn gụ ị makẹni ọ jụgbọ ị;

⁶ makẹni, onyẹ Di-nwọnni-ẹnyi nwọn ihiẹn-ọsụsụọ a k'o gi afụnfụn a zụn; onyẹ hụn ọ nabanhan kẹ nwa k'ọ fịan mkpịnsịn.”

⁷ E dingbu ni nwan afụnfụn, nị ọzụnzụn rọ. Osolobuẹ rị e mẹ ụnụ kẹ ụmụ a. Elee nwa kẹ nẹdi ẹ ghalẹni e ye afụnfụn ebe ọ n'a zụn a?

⁸ Omẹni eyeni wẹ ụnụ ọzụnzụn w'e ye onyẹ ọwụlẹ, ya wụ nị ụnụ ẹlẹ ụmụ nke-esi.

⁹ Ndị nẹdi ẹnyi rị elu ụwanị e mẹzi ẹnyi ihiẹn wẹ gha a zụn ẹnyi, ẹnyi e humẹni wẹ isi. Ẹnyi ehumẹkọnị nwan nẹdi ẹnyi imẹ Mmọn wụ Osolobuẹ isi, kẹni ẹnyi rị ndụn?

¹⁰ Ndị nẹdi ẹnyi a zụn ẹnyi ẹkẹrẹ ogẹn k'ọ rị wẹ, kanị Osolobuẹ rị a zụn ẹnyi nị ẹnyi ban erere pụ-ichẹn: nị ẹnyi sọn ẹ rị nsọ.

¹¹ Onwọnni afụnfụn w'e ye ịhịan a sụọ ụsụọ ogẹn ahụn; ụfụ k'ọ fụ. Kanị, omẹgụ, ọ mịpụhanị ndị wẹ gi ẹ zụn udọn lẹ ezi-omumẹ.

¹² Gbakẹnmẹ ni nwan ẹka lịlọhịnị lẹ mkpụkụ rị a ma nni.

¹³ Gha nị nwan ụzọ rị mma, kẹni ụkụ rịlẹni ikẹn hụn ụzọ dịnhịn, amamgbe ọ kwapụ.

Ajụkwọlẹ Ni Eyemẹka Osolobuẹ!

¹⁴ A lịlịma nị nị udọn a rị ẹgbata ụnụ lẹ ịhịan ile lẹ ni ụnụ a rịzị nsọ, makẹni onyẹ rịlẹni nsọ ahụnkọ Onyẹ-nwọnni-ẹnyi.

¹⁵ Hụn n'a n'o nwọnni onyẹ ẹfọma Osolobuẹ fie; nị ize ewerini ọnọdị imẹ igunrun ụnụ, buhẹ nsọngbu, mẹrụ ndị bu ọda.

¹⁶ Hụnzịkwọ n'a n'o nwọnni onyẹ rị a ghẹrẹni, mọbụ onyẹ nọkẹ Isọ nwọnlẹni ihiẹn ọ kpọ ihiẹn rị nsọ, nwa-ibuzọ gi afẹrẹ ihiẹn-oriri ohu ghatarị ukuu nwa-ibuzọ hụn te k'e ru ẹ ẹka.

¹⁷ Ụnụ a marịnghọ nị ogẹn o gi nwan chọ nị wẹ gọzi ẹ n'o nwọnrin ukuu nwa-ibuzọ, a jụ w'a; ọ sanị ẹka gbehutọ ihiẹn, ọsụọn'a n'o gi ẹnya-mirin chọ ngọzi hụ.

¹⁸ Makẹni, ebeni ụnụ bịa ẹlẹ Ugu Saịnaị wẹ e mẹtụ ẹka lẹ okẹn ọkụn rị e nwunni lẹ ishi lẹ ebe wẹ nọ a kwan ụya lẹ ebe okẹn ufere rị e fe.

¹⁹ Ẹlẹ olu opi rị a hannị lẹ olu rị e ku ihiẹn ndị nụn'a gi rịọma nị asa wẹ ẹka nụzị,

²⁰ makẹni obi wẹ asanị ẹka bu iwu o ti: nị, “Ihiẹn ọwụlẹ ẹhụ a mẹtụ ugu ahụn, wẹ magbu ẹ, ọsụọn'a nị anụ rọ!”

²¹ Ihiẹn ile wẹ rị a hụn a tụkẹnmẹkẹ egun, nke wụ nị, Mozizi lẹ enwẹn ẹ nọdẹ sị, “Egun rị a tụ m: ẹhụ rị a ma m nni!”

²² Kanị, Ugu Zayọnụ kẹ ụnụ bịa, obodo uku Osolobuẹ rị ndụn, Jerusalẹm hụn rị elu-igwee; ụnụ bịa d'e kunrun ndị mmọn-ozi oripiti-oripiti rị e mẹ mmẹmmẹ.

²³ Ụnụ a bịagụọ d'e kunrun igunrun ụmụ ibuzọ Osolobuẹ wẹ deye ẹfan wẹ elu-igwee lẹ Osolobuẹ lẹ enwẹn ẹ, hụn k'e kin ịhịan ile ikpe. Ụnụ a bịagụọ d'e kunrun ndị ezi-omumẹ Osolobuẹ mẹgụ nwan mmọn wẹ zu oke.

²⁴ Jizọsị kẹ ụnụ bịa d'e kunrun, onyẹ hụn e wegbama Osolobuẹ lẹ ịhịan imẹ nkwerigbama ọhụn, ya lẹ ẹdeke wẹ gi e fepụ njọ, hụn rị e ku ihiẹn ka mma karị ẹdeke Ebẹlụ sị wẹ mẹgwarị.

²⁵ Hụnkwọ n'a nwan nị ụnụ enupụnị isi okpuru onyẹ hụn rị nwan e kuni. Makẹni, omẹni ndị mbụ awanahịnnị ogẹn ahụn wẹ gi nupụ isi okpuru onyẹ nọ elu-ụwanị a dọ wẹ ẹka-ntịn, nanị ẹnyi a dọn nwan wanahịn, omẹni ẹnyi e nupụ isi okpuru onyẹ hụn gha nwan elu-igwee e ku.

²⁶ Ogẹn ahụn, ụwa kẹ olu ẹ zinzin; kanị, o kwegụọ nwan nkwa, sị, “Ẹlẹzi ụwa sụọ kẹ m sikọ nwan d'e zinzin, m k'e zinzinzikwọ elu-igwere.”

²⁷ Okuni o ku: “M k'e zinzinzi” rị a ghọsị nị Osolobuẹ sikọ d'e wepụ ihiẹn ndị wẹ a sa ẹka e zinzinpụ, ya wụ ihiẹn wẹ ke eke, kẹni ọ họdụ hụn wẹ ghalẹni a saẹka e zinzinpụ.

²⁸ Ebe o mẹ nwan nị ẹnyi rị e nwọnhẹn alị-eze wẹ ghalẹni a saẹka e zinzinpụ, nị ẹnyi kpanmịn nị Osolobuẹ, gi egun Osolobuẹ lẹ mgbaye fe Osolobuẹ ofufe ọ k'a nabanhan;

²⁹ makẹni ezioku-ezioku, Chuku ẹnyi wụ ọkụn hụn e bu ihiẹn e ri.