Hibru 11 - Ika

Isi Nke Mmanaị Okukwe

¹ Okukwe wụ igi ẹ dọn n'i k'e nwọnhẹn ihiẹn ị rị a tụ ẹnya a; igi ihiẹn dọn, bụ y'a rịnị e legha a.

² Okukwe ndị mbụ-mbụ haịn Osolobuẹ gi kunni wẹ ọhụnma:

³ Okukwe kẹ ẹnyi gi a ghọta nị oku-ọnụ kẹ Osolobuẹ gi ke ụwa, ya wụ nị ihiẹn ẹnya ghalẹni a legha kẹ wẹ gha mẹmẹpụha ihiẹn ẹnya e legha.

⁴ Okukwe kẹ Ebẹlụ gi chụnyeni Osolobuẹ ẹjan ka nke Keni mma, hụn Osolobuẹ gi kun'ẹ ọhụnma, kpọ a onyẹ ezi-omumẹ, shịan'a ẹri n'o ye ihiẹn rị mma. Okukwe k'o gi mẹni ọ nwụnhụngụ, ọ hụkwọ e ku oku.

⁵ Okukwe Ẹnọkụ ke Osolobuẹ gi weri ẹ shi elu-igwee, ọ hụnnị ọnwụn. Ahụnzịnị w'a makẹni Osolobuẹ e werigụọ a. Makẹni, Osolobuẹ e kugụọn'a ọhụnma n'o d'e weri ẹ nị o mẹ ihiẹn a sụọ Osolobuẹ —

⁶ bụ ịhịan as'ẹka mẹ ihiẹn a sụọ Osolobuẹ mmanị o nwọn okukwe. Makẹni, onyẹ ọwụlẹ bịa d'e kunrun Osolobuẹ k'e girịrị a dọn nị Osolobuẹ rị arị lẹ nị ọ kụ ndị e gichanrịn obi wẹ a chọ a ụgwọ.

⁷ Makẹni Nụa nwọn okukwe, ogẹn Osolobuẹ gi gwatọ a ihiẹn mẹtulẹni jẹnkọ d'e mẹni, o gi ẹ dọn, gi egun Osolobuẹ rụn ụgbọ-mirin ahụn pụ-ichẹn, hụn Osolobuẹ gi nwan zụọpụha ezi-lẹ-ụlọ a. Nụa gi ihiẹnni o mẹ shịagbu ụwa ẹri, gi okukwe ẹ họnrin onyẹ ezi-omumẹ.

⁸ Okukwe kẹ Ebraham gi kweri ogẹn Osolobuẹ gi kpọ a, sị a shi ebe o jẹnkọ d'e ye ẹ; ọ nọ jẹnmẹ bụ ọ marịn ebe o jẹnkọ.

⁹ Okukwe k'o gi kwashi alị hụ Osolobuẹ kwe ẹ nkwa d'e biri rịkẹ otumunyẹ, a kwahunmẹ — bikọ ụlọ w'a kpụkpọrị, kẹ ya kẹ Aziki lẹ Jekọpụ, ndị Osolobuẹ kwe ya lẹ wẹ nkwa hụ.

¹⁰ Ebraham mẹ ẹrịra makẹni obi ẹ rịchanrịn obodo ahụn k'a rị jẹnrin ejẹn, obodo ahụn Osolobuẹ gi ẹka a ropụha, tụn.

¹¹ Okukwe kẹ Sẹra nkẹ gi saẹka mụ nwa, ọsụọn'a n'ọ karịgụọ hụn a mụ nwa, makẹni o gi ẹ dọn nị Chuku hụn kwe nkwa furu wẹ gi e dọn ẹnya.

¹² Ya okẹnnyẹ ohuni ẹhụ a nwụnhụngụ nọ mụ ụmụ bu ọda kẹ kokisẹ rị igwere lẹ ẹjan rị mkpẹnrẹn ohimin wẹ ghalẹni a saẹka a gụn.

¹³ Ndịnị ile kwọndọn okukwe nwụnhụn bụ enwọnhẹnni wẹ ihiẹn Osolobuẹ kwe nkwa a, kanị, e lechegụọnị wẹ wẹ, nabanhan wẹ, ku ẹ nị wẹ wụ itumunyẹ imẹ ụwanị.

¹⁴ Ndị e ku ẹnịna rị a ghọsị n'o nwọn alị wụ nke wẹ ẹnya wẹ rị.

¹⁵ Omẹni alị hụ wẹ gha pụha kẹ wẹ te rị e ro, efe te hụ a w'e gi kin azụụn.

¹⁶ Kanị, ẹnya wẹ rị alị ka mma, hụn rị elu-igwee. Ya haịn ifẹnrẹn gilẹni e mẹ Osolobuẹ ịza Chuku wẹ, makẹni o nwọnghọ obodo ọ kwademẹni wẹ nke-esi.

¹⁷ Okukwe kẹ Ebraham gi wepụha Aziki n'o gi ẹ chụn ẹjan, ogẹn Osolobuẹ gi lele ẹ. Onyẹ nwẹn Osolobuẹ kwe nkwa ndị ahụn nọ wepụha akpụ nwa a ohu!

¹⁸ Nwa nwẹn Osolobuẹ sị a, “Ẹka Aziki kẹ ụmụ wẹ jẹnkọ d'a kpọ nke i k'a gha bịa.”

¹⁹ Ebraham sị enwẹn ẹ nị Osolobuẹ k'a sadẹ ẹka weli onyẹ nwụnhụnnị. Ya wụ nwan n'ọ ghaghọ ọnwụn nwọnhẹnzi Aziki nke-esi!

²⁰ Okukwe kẹ Aziki gi gọzi Jekọpụ lẹ Isọ, ku k'o k'a rịnị wẹ ihun.

²¹ Okukwe kẹ Jekọpụ gi nọ ebe ọ nwụnkọ gọzi ụmụ Josẹfụ ẹbụbụọ, kwọndọn ọkpọ, hulụa isi fe Osolobuẹ.

²² Okukwe kẹ Josẹfụ gi nọ ebe ọ nwụnkọ ku oku ọpụpụ ụmụ Izrẹlụ jẹnkọ d'a pụ Ijiptu, gwa wẹ kẹ w'e mẹ ọkpụkpụ a.

²³ Okukwe kẹ ndị mụ Mozizi gi bu ẹ zuemẹ ọrọgbọ ifọn ẹtọ kẹ wẹ mụgụ a, makẹni wẹ hụn a nị ọ wụ nwa pu okorọbịa ọda, egini wẹ egun iwu eze ha a ye.

²⁴ Okukwe kẹ Mozizi gi suepụha, jụ, w'a kpọl'a nwa ada Fẹro, eze alị Ijiptu.

²⁵ Ọ hanrịn isọn ndị nke Osolobuẹ ta afụnfụn karị imẹ Osolobuẹ njọ n'o ri ụwa ẹkẹrẹ ogẹn.

²⁶ Ọ sị enwẹn ẹ nị mkpari lẹ nlegberi o k'a narịn makẹ Kraịstị wụ ezigbo akụ-lẹ-ụba hụn ka akụ-lẹ-ụba alị Ijiptu, makẹni o bu ẹnya zinmẹ ụgwọ-ọrụn lalanị.

²⁷ Okukwe k'o gi gha Ijiptu pụ, o gini egun ihiẹn Fẹro k'e mẹ ẹ nọdị, kama, o dinsọnmẹ ndidin nọkẹ sị ọ rị e legha Onyẹ ahụn wẹ ghalẹni e legha.

²⁸ Okukwe k'o gi mẹ Mmẹmmẹ-nghafe, wẹ nọ fesọnmẹ ẹdeke ye ọnụmụzọ, hụn mmọn-ozi hụ rị e gbu ụmụ ikẹnnyẹ ibuzọ ndị Ijiptu gilẹni gbu ụmụ ikẹnnyẹ ibuzọ ndị Izrẹlụ.

²⁹ Okukwe kẹ ndị Izrẹlụ gi ghafe Ohimin ufie nọkẹ sị wẹ ghakọ akpakalị; ndị Ijiptu te chọ nị wẹ ghafe, wẹ nọ ragbu enwẹn wẹ.

³⁰ Okukwe ndị Izrẹlụ kẹ mgbọn Jẹriko gi dan kẹ wẹ jẹnhunmẹgụ a akpọhịn ẹsa.

³¹ Okukwe kẹ ịgbaraja wụ Rehabụ gilẹni sọn ndị nupụ isi la ntikpọ, makẹni ọ nabanhanghọ ndị Izrẹlụ gi nzuzue bịa d'e lele alị wẹ.

³² Kị m'e kuzi nwan? Ọ kẹrẹkọnị m ku oku Gidiọnụ lẹ Barakị lẹ Samsịn lẹ Jẹfta, Defidi lẹ Samuẹlụ lẹ ndị-amụma mbụ-mbụ:

³³ ndịnị ile gi okukwe mẹri alị rị ichẹn-ichẹn, gi ẹ kị ọkịkị rị mma; gi ẹ nwọnhẹn ihiẹn Osolobuẹ kwe wẹ nkwa a, gi okukwe kpukinsọnmẹ ọnụ ẹwọrọ;

³⁴ gi okukwe tinyụn okẹn ọkụn, gi ẹ wanahịn ọpịa-agha; gi ẹ nwọnhẹn ikẹn kẹ ndụn gụgụ wẹ; gi ẹ kpa ikẹn agha; gi ẹ chụzịza ndị-agha alị ọzọ;

³⁵ ikpoho e gighọdẹ okukwe nwọnhẹnzi ndị nke wẹ nwụnhụngụnị. O nwọnzighọ ndị wẹ mẹshi ikẹn ọda-ọda, kanị okukwe kẹ wẹ gilẹni kweri mẹ ihiẹn wẹ sị wẹ mẹ nị wẹ hatu wẹ, makẹni wẹ gi ẹ dọn ni wẹ sikọ d'a gha ọnwụn lihi, nwọnrin ndụn ka mma.

³⁶ O nwọnzighọ ndị wẹ gi gu egu, gbu wẹ mkpịnsịn, kẹndẹ ụfọdụ ẹgbụn, tụ wẹ ngan;

³⁷ e gi wẹ ọmụma magbu ụfọdụ; a kpọwa wẹ ụfọdụ ẹbụọ; e gi wẹ ọpịa-agha gbu ụfọdụ. Wẹ hụ a wahunmẹ, wẹ lẹ akpụkpọ atụnrụn lẹ ewu wẹ hụn yiri, e ye wẹ wẹ ụya ri; e kpokpo wẹ wẹ; e mẹja wẹ wẹ!

³⁸ Ụwanị efuruni ndị ezigbo ịhịan nọ ẹnịna! W'a wahunmẹ imẹ atụ lẹ elu-ugu lẹ imẹ okporo lẹ mgbugbu.

³⁹ Osolobuẹ e kughọ oku ndịnị ile ọhụnma yeni okukwe wẹ, kanị enwọnhẹnni wẹ ihiẹn ahụn Osolobuẹ kwe nkwa a.

⁴⁰ Makẹni, Osolobuẹ kwademẹni ẹnyi ọghọ ka mma, nị ezukọ wẹ oke bụ ẹnyi arịa.