Hagaị 1 - Ika

Isi Nke Ohu Osolobuẹ Sị Wẹ Tụndọnzi Ụlọ-nsọ Tikpọnị

¹ Hụn mẹ ẹ ahụa ẹbụọ eze-kanị wụ Dariọsụ kịma alị-eze ndị Mẹdịa, hụn ndị Izrẹlụ rị okpuru ẹ ogẹn hụ, ụhụọhịn ibuzọ imẹ ifọn nke isin, Osolobuẹ nọ gi onyẹ-amụma wụ Hagaị gwa gọvanọ kị alị Juda wụ Zerubabẹlụ nwa Shiẹtiẹlụ lẹ Onyẹ-isi Nchụn-ẹjan wụ Joshụa nwa Jehozadakị oku, sị wẹ:

² Osolobuẹ ihiẹn ile rị okpuru ẹ sị, “Ndịnị hụ a sị ‘O ke ru ẹnyi e gi tụndọnzi Ụlọ Osolobuẹ.’ ”

³ Osolobuẹ nọ nwan gi onyẹ-amụma wụ Hagaị, sị wẹ,

⁴ “Ezioku?! Ogẹn e rugụọ ụnụ e gi a tụnrụn ụlọ, a chọ wẹ mma, ụlọ m a tọ mkpọkọ-mkpọkọ?

⁵ Osolobuẹ ihiẹn ile rị okpuru ẹ sị: Ụnụ ahụnnị nwan kẹ ọnọdị ụnụ rị?

⁶ Ụnụ ahụnnị nị ụnụ kụngụ ọda, ẹkẹrẹ sụọ kẹ ụnụ a hụn a ghọrị; ụnụ hụ e ri, kanị ụnụ arị a hụn hụn e jun ụnụ ẹfọ; ụnụ hụ a ra, kanị ụnụ arị a hụn hụn e jun ụnụ ẹfọ; ụnụ hụ e yi ẹkwa, kanị ụnụ arị a hụn hụn e zu ụnụ a chụ oyi; ụnụ hụ a kpa egho a kpaye ẹkpa e hini.

⁷ Ẹghẹẹ, Osolobuẹ ihiẹn ile rị okpuru ẹ sị ụnụ: Ụnụ ahụnnị nwan kẹ ọnọdị ụnụ rị?

⁸ Jẹnmẹ ni nwan elu ugu ebe osisi rị d'e gbuhẹ ijẹdu d'a tụndọnzi Ụlọ m, kẹni ọ sụọ m ụsụọ lẹni wẹ gi ẹ ye m ọghọ. Ya kẹ Osolobuẹ ku.

⁹ Ụnụ hụ a tụ ẹnya ihiẹn-ugbo hini, kanị ẹkẹrẹ kẹ ụnụ a hụn; ụnụ wẹlụad'a ụlọ, a fụ m'a tuhu. Kị haịn? Makẹni ụlọ m nọkwọ mkpọkọ-mkpọkọ, kanị, ụnụ ile hụ a hụhụ a tụnrụnkẹnrin ụlọ ma mma. Ya kẹ Osolobuẹ ihiẹn ile rị okpuru ẹ ku.

¹⁰ Ịya haịn igwere gi kwọndọn mirin, alị a jụ n'o mẹkọ ihiẹn-anaị.

¹¹ E bugụọ m ụkọ-ihiẹn cheni ụnụ alị-aradan lẹ elu ugu, ụkọ ọka lẹ manya-vaịnị lẹ ofugbọn-olivu lẹ ihiẹn ugbo ụnụ ile, ụkọ ịhịan lẹ anụmanụ lẹ ihiẹn ile wẹ rị a rụnpụha.”

¹² Ya kẹ Zerubabẹlụ nwa Shiẹtiẹlụ lẹ onyẹ-isi nchụn-ẹjan wụ Joshụa nwa Jehozadakị nọ gi oku Osolobuẹ wụ Chuku wẹ lẹ ihiẹn onyẹ-amụma wụ Hagaị ku dọn, nọkẹ kẹ Osolobuẹ wụ Chuku wẹ dọn zi Hagaị gwa we, uwẹ lẹ ndị ahụn ile họdụ imẹ ndị Juda; wẹ ile nọ gbaye Osolobuẹ.

¹³ Ya kẹ Hagaị wụ onyẹ-ozi Osolobuẹ nọ sị wẹ nị Osolobuẹ sị wẹ nwan, “M hụ ụnụ azụụn. Mmẹ wụ Osolobuẹ ku ẹ!”

¹⁴ Ya kẹ Osolobuẹ nọ nwan kpọli mmọn gọvanọ alị Juda wụ Zerubabẹlụ nwa Shiẹtiẹlụ lẹ nke onyẹ-isi ndị nchụn-ẹjan wụ Joshụa nwa Jehozadakị lẹ ndị hụ ile họdụ imẹ ndị Juda, wẹ nọ pụha, tụndọnzimẹ ụlọ Osolobuẹ wụ Chuku wẹ.

¹⁵ Hụn mẹ ẹ akpọhịn ẹnọ kwasị ọgụn imẹ ifọn nke isin hụ kẹ ihiẹnni mẹ.