Habakọkụ 2 - Ika

Isi Nke Ẹbụọ

¹ M jẹnkọ nwan d'e weri ọnọdị m e che, a nọdị m ọdụ-nche e che; nị m hụn ihiẹn Osolobuẹ sikọ d'a gwa m, a hụn m ihiẹn m'a shịarị enwẹn m.

Osolobuẹ A Shịarịzị

² Ya kẹ Osolobuẹ nọ za m, sị m, “Detu ihiẹnni m k'a gwa ị, bụtọ; depụha a ọhụnma ye elu ihiẹn, hụn w'a saẹka a gụn a gba ọsọ.

³ Makẹni ogẹn ihiẹnni k'e rugụ o kebe mẹ; o sikọ d'e mẹzurịrị — omẹkọ ntụ; ọsụọn'a o bie ebie, cheri ẹ, n'o k'e mẹrịrị — o bieghafekọ ogẹn ẹ.

⁴ Ndị Babilọnụ rị e mẹkarị enwẹn wẹ, obi wẹ ezinrinni; kanị, onyẹ ezi-omumẹ k'e gi okukwe ẹ rị ndụn.

⁵ Manya rị e duhuhu wẹ, ndị mpache ghalẹni a nọdị ụzọ ohu; wẹ wụ ndị okẹn ẹkpịrị nọkẹ alị-mmọn, nọkẹ ọnwụn ẹfọ ghalẹni e jun, e kpọnrin alị ndị-ọzọ okpọnrin-okpọnrin.

Ọ K'a Jọ Ndị Babilọnụ Njọ

⁶ “Alị ndịnị ile o mẹ ihiẹn egikọ a kpa itẹn? Agbakọ w'a ẹbụ, gi ẹ lu ilu? Wẹ k'a sị, ‘O k'a jọ ị njọ, ịyụ hụn e kpọnrin ihiẹn wụlẹni nke i, Elee mgbe y'e gibehi ihiẹn i gi fieri ụgwọ e hi ọdanfịn?’

⁷ Ndị ụnụ rị a na ụtụ elihikọ idẹnmizi maye ụnụ? Ndị k'e rọn ụnụ egun etẹnhinkọ, ụnụ nwẹn e họnrin ihiẹn wẹ kpọnlụa agha?

⁸ Makẹni ụnụ e gbugụọ ndị alị bu ọda kwarị ihiẹn wẹ, ndị họdụsọnmẹ alị ndị hụ k'e gbu ụnụ, kwarị ihiẹn ụnụ — makẹ ndị ụnụ gbu lẹ eje-ihiẹn ụnụ mẹ alị lẹ obodo rị ichẹn-ichẹn lẹ ndị bi imẹ wẹ.

⁹ O k'a jọ ị njọ, ịyụ rị a kpanị ikpụnọ ị eje-egho, a kụ ẹkụ ị e ye ebe ẹka ghalẹni e ru, makẹ eje-ihiẹn gha e ru i ẹhụ!

¹⁰ Y'e bugụọ ifẹnrẹn tọnị ikpụlọ ị, ebe ị nọ gbupụ alị ndị hụ bu ọda i gbu; y'e mẹgụọ nwan enwẹn i njọ.

¹¹ Ọmụma wẹ gi tụn ụlọ hụ gha a shịagbu i ẹri, osisi wẹ gi tụn a hụ e kwe ẹ.

¹² O k'a jọ ị njọ, ịyụ hụn gi igbu-ọchụn a tụn obodo, onyẹ gi mmẹgbu e pumẹ obodo!

¹³ Osolobuẹ ihiẹn ile rị okpuru ẹ ekugụọn'a, nị alị lụgbugụ enwẹn wẹ, ihiẹn wẹ rụn a la ọkụn? O kugụọn'a nị wẹ rụngbugụ enwẹn wẹ, ihiẹn wẹ rụn sikọ d'a la iwi?

¹⁴ Kanị, wẹ sikọ d'a marịn ọghọ Osolobuẹ elu-ụwa ile, kẹ mirin dọn e jun ohimin ụzọ ile.

¹⁵ O k'a jọ ị njọ, ịyụ hụn e ye ibe i ụya a ra kẹ manya, onyẹ hụn e gichanrịn ọnụma e sọn ibe ẹ d'e ru n'a dangbumẹ wẹ kẹ ndị manya, y'a hụn ọtọ wẹ ahụn ị chọkọ.

¹⁶ Ụya k'i k'a hụn hụnjun ẹfọ, ẹlẹ ọghọ; razị nwan ụya nke i tụ nị wẹ hụn ọtọ ị! Mkpu afụnfụn hụn rị ẹka Osolobuẹ k'e ru yụ nwẹn ẹka, e gi wẹ ifẹnrẹn nọkin ẹnya ọghọ ị ahụn.

¹⁷ Ogbukpọ wẹ gbukpọ ẹgboko alị Lẹbanọnụ k'e kunrun i, Babilọnụ; ogbugbu wẹ gbu anụ rịn'a k'e kunrunzikwọ ị, rọnzikwọ yụ nwẹn egun, yeni ndị ụnụ gbu lẹ eje-ihiẹn ụnụ mẹ alị lẹ obodo ichẹn-ichẹn lẹ ndị bi imẹ wẹ.

¹⁸ “Elee erere kẹ mmọn wẹ kpụ bandẹ, ebe o mẹni ịhịan kpụ a? Ẹlẹ ihiẹn mmaka wẹ kpụ hụn e dufie ịhịan k'ọ wụ? Onyẹ hụn kpụn'a gi ihiẹn ẹka a mẹmẹ e dọn ẹnya, bụ ọ kpụhụ ihiẹn ghalẹni e ku oku.

¹⁹ O k'a jọ ị njọ, ịyụ hụn a kpọku nkp'osisi, a kpọku ogbe ọmụma! N'ọ sa ẹka gwa ị ihiẹn i k'e mẹ? Y'a hụnnị nị ihiẹn wẹ gihụ goru lẹ siliva nyankwama rọ, nị ara kwọn?!

²⁰ Kanị Osolobuẹ nkẹ rị Ụlọ-NSỌ a: ụwa ile wẹ gba nwan nkịtịn ihun ẹ!!”