Ẹzra 8 - Ika

Isi Nke Ẹsatọ Ndị-isi Ikpụlọ Ichẹn-ichẹn Hụn Sọnlụa Ẹzra

¹ Ndịnị wụ ẹfan ndị-isi ikpụlọ ichẹn-ichẹn hụn gha Babilọnụ sọnlụa m ogẹn Atazẹzẹsi gi wụ eze:

² Onyẹ ikpụlọ Finẹhasị rịn'a wụ Gẹshọm. Onyẹ ikpụlọ Itama rịn'a wụ Daniẹlụ; onyẹ ikpụlọ Defidi rịn'a wụ Hatushi

³ nwa Shẹkania. Ndị ikpụlọ Parọshị rịn'a wụ Zẹkaraya lẹ ikẹnnyẹ iri kwasị ọgụn-ẹsa (150) wẹ detu ẹfan wẹ.

⁴ Ndị ikpụlọ Pahatị-Mụabụ rịn'a wụ Ẹliẹhonaị nwa Zẹrahịa lẹ ikẹnnyẹ ọgụn-iri (200).

⁵ Ndị ikpụlọ Zatu rịn'a wụ Shẹkania nwa Jahaziẹlụ lẹ ikẹnnyẹ ọgụn mmisẹn (300).

⁶ Ndị ikpụlọ Adini rịn'a wụ Ebẹdi nwa Jonatanị lẹ ikẹnnyẹ iri kwasị ọgụnnaị (50).

⁷ Ndị ikpụlọ Ẹlam rịn'a wụ Jẹshaya nwa Atalia lẹ ikẹnnyẹ iri kwasị ọgụn-ẹtọ (70).

⁸ Ndị ikpụlọ Shẹfatịa rịn'a wụ Zẹbadịa nwa Maịkẹlụ lẹ ikẹnnyẹ ọgụn-ẹnọ (80).

⁹ Ndị ikpụlọ Jụabụ rịn'a wụ Obadaya nwa Jehiẹlụ lẹ ikẹnnyẹ mmẹsatọ kwasị ọgụn-iri (218).

¹⁰ Ndị ikpụlọ Bani rịn'a wụ Shẹlomiti nwa Josifịa lẹ ikẹnnyẹ ọgụn-ẹsatọ (160).

¹¹ Ndị ikpụlọ Bebaị rịn'a wụ Zẹkaraya nwa Bebaị lẹ ikẹnnyẹ ẹsatọ kwasị ọgụn (28).

¹² Ndị ikpụlọ Az'gadị rịn'a wụ Johananị nwa Hakatanị lẹ ikẹnnyẹ iri kwasị ọgụn-isẹn (110).

¹³ Ndị ikpụnọ Adonikam rịn'a wụ ndị ikpanzụụn bịanị; ẹfan wẹ wụ Ẹlifẹlẹti, Jewuẹlụ lẹ Shẹmaya, uwẹ lẹ ikẹnnyẹ ọgụn ẹtọ (60).

¹⁴ Ndị ikpụlọ Big'vaị rịn'a wụ Ụtaị lẹ Zakọ, wẹ lẹ ikẹnnyẹ iri kwasị ọgụn ẹtọ (70).

Ẹzra A Chọrị Ndị-ọrụn Osolobuẹ K'e Sọn Ẹ La Jerusalẹm

¹⁵ Mkpẹnrẹn ote-mirin hụ shikọ Ahava kẹ m kpọkikomẹ ndị ahụn ogẹn hụ, ẹnyi nọ nọdị ebẹhụ akpọhịn ẹtọ. Ogẹn m gi lele ndị hụ lẹ ndị nchụn-ẹjan rị imẹ wẹ, ahụnnị m ndị Livaị.

¹⁶ Ya m nọ kpọ Ẹliẹza, Ariẹlụ, Shẹmaya, Ẹl'natanị, Jaribu, Ẹl'natanị, Natanị, Zẹkaraya lẹ Mẹshulam hụn wụ ndị ndu, lẹzi Joyaribu lẹ Ẹl'natanị ndị mụ ẹkụkwọ,

¹⁷ e zi m wẹ d'e kunrun Ido hụn wụ onyẹ-ndu imẹ Kasifịa. A gwagụọ wẹ ihiẹn wẹ k'a gwa Ido lẹ ndị nke ẹ, ndị idibo Ụlọ-nsọ bi Kasifịa, kẹni wẹ zihẹni ẹnyi ndị k'e jẹn ozi imẹ Ụlọ Chuku ẹnyi.

¹⁸ Ghahanị eyemẹka Chuku ẹnyi hụn nọyeni ẹnyi, wẹ nọ wẹhẹni ẹnyi Shẹrẹbịa hụn marịn ọrụn, onyẹ ikpụlọ Mali nwa Livaị nwa Izrẹlụ lẹ ụmụ-ikẹnnyẹ Shẹrẹbịa lẹ umunẹ ẹ ikẹnnyẹ: madụ mmẹsatọ;

¹⁹ lẹ Hashabia lẹ Jẹshaya onyẹ ikpụlọ Mẹrari lẹ umunẹ ẹ ikẹnnyẹ lẹ ụmụ a ikẹnnyẹ: mmadụ ọgụn.

²⁰ E wẹhẹzighọ wẹ mmadụ ọgụn mmanaị (220) imẹ idibo Ụlọ-nsọ, itu ahụn Defidi lẹ ịhaịmẹ ẹ tumẹ nị wẹ e yeni ndị Livaị ẹka. Wẹ detuchanrịn ẹfan ndịnị ile.

E Bu Wẹ Ọnụ, Rịọ Osolobuẹ Ijẹn Ẹwẹrẹ

²¹ Ebẹhụ ẹnyi rị ẹhụ Ote-mirin Ahava, m nọ kpọye ibu-ọnụ, kẹni ẹnyi welụa enwẹn ẹnyi alị ihun Chuku ẹnyi, rịọ a n'o ye ẹnyi lẹ ụmụ ẹnyi lẹ ihiẹn ẹnyi ijẹn-ẹwẹrẹ.

²² Ifẹnrẹn anịnị m sị eze ye ẹnyi ndị-agha lẹ ndị gi ẹshin a lụ agha k'e che ẹnyi nche ụzọ makẹ ndị-iṅẹnrẹn rị ụzọ, makẹni ẹnyi a gwagụọ eze nị Chuku ẹnyi rị onyẹ gi ẹ e dọn ẹnya azụụn, kanị o gi okẹn ọnụma e sọn ndị ile gbakitọ a azụụn.

²³ Ya ẹnyi nọ bu ọnụ, rịọ Chuku ẹnyi ihiẹnni, ọ nọ za ẹnyi ekpere.

Ndị Ẹzra Buyesọnmẹ Ibu Ụlọ-nsọ Buru

²⁴ Ya m nọ họpụha mmadụ mmẹbụọ imẹ ndị nchụn-ẹjan rị isi elu, wẹ lẹ Shẹrẹbịa lẹ Hashabia lẹ mmadụ iri imẹ umunẹ wẹ.

²⁵ M nọ mayesọnmẹ wẹ siliva lẹ goru lẹ ihiẹn ndị hụ eze lẹ ịhaịmẹ ẹ lẹ ndị-isi ẹ lẹ ndị Izrẹlụ ile rị ebẹhụ ye makẹ Ụlọ Chuku ẹnyi.

²⁶ Ihiẹn ile m detu buye ndị hụ m họpụha gba ẹkpa siliva iri kwasị ọgụn-mmẹbụọ kwasị nnụ (650), yezi wẹ ihiẹn-siliva ndị ọzọ hụn siliva wẹ k'e jun ẹkpa siliva ọgụn-isẹn; e yezi m wẹ ẹkpa goru ọgụn-isẹn,

²⁷ afẹrẹ goru ọgụn wẹ gi dariki goru nnụ-uku (1,000) mẹmẹ lẹzi ihiẹn igwe-bronzu e gbukeni hụn rị mkpa kẹ goru.

²⁸ M nọ sị wẹ, “Kẹ ụnụ ndị nchụn-ẹjan kẹ ihiẹn ndịnị wụchanrịn ihiẹn wẹ gi kwanị Osolobuẹ. Siliva lẹ goru ndịnị wụ oyiye gha wẹ obi pụha hụn wẹ ye Osolobuẹ wụ Chuku ndị nẹdi ụnụ.

²⁹ Kwọndọn ni wẹ nwan ọhụnma-ọhụnma d'e ru mgbe ụnụ jẹnkọ d'a kịpụha wẹ imẹ mmughẹ ndị rị ụlọ Osolobuẹ imẹ Jerusalẹm, ma wẹ detu idẹnya ndị-isi ndị nchụn-ẹjan lẹ ndị Livaị lẹ ndị-isi ikpụlọ ichẹn-ichẹn rị Izrẹlụ.”

³⁰ Ya ndị nchụn-ẹjan hụ lẹ ndị Livaị hụ nọ burusọnmẹ siliva lẹ goru wẹ lẹ arịa nsọ ndị hụ wẹ detugụ kẹ wẹ nyịnhan, hụn wẹ bukọ ụnọ Chuku ẹnyi rị Jerusalẹm.

A Lụapụha Wẹ Jerusalẹm

³¹ Nke akpọhịn mmẹbụọ imẹ ifọn ibuzọ, ẹnyi nọ gha Ote-mirin Ahava hụ buli, jẹnmẹ Jerusalẹm. Chuku ẹnyi nọyeni ẹnyi anọyeni, o chemẹ ẹnyi, onwọnni ihiẹn ndị-iṅẹnrẹn mọbụ ndị ohin mẹ ẹnyi ụzọ.

³² Ẹnyi e ru Jerusalẹm, ẹnyi nọ zu ikẹn akp'ọhịn ẹtọ.

³³ Nke akp'ọhịn ẹnọ, ẹnyi nọ nọ Ụlọ Chuku ẹnyi bupụha siliva lẹ goru lẹ arịa nsọ ndị hụ ẹnyi bulụa, detu kẹ wẹ nyịnhan, bu wẹ che ẹka onyẹ nchụn-ẹjan wụ Meremọtụ nwa Yuria. Ya lẹ Ẹliẹza nwa Finẹhasị lẹ ndị Livaị wụ Jozabadị nwa Jeshụa lẹ Nụadịa nwa Binui.

³⁴ Wẹ nọ gụnkwama wẹ ile, lele kẹ wẹ nyịnhan, detu ẹ.

³⁵ Ndị hụ gha ebe wẹ kpụnjẹn wẹ lụa ogẹn hụ nọ chụnyeni Chuku Izrẹlụ ẹjan w'a kpọ ọkụn. Okẹn-efin mmẹbụọ kẹ wẹ gi chụn nke ndị Izrẹlụ ile, ya lẹ ebulu mmisin kwasị ọgụn-ẹnọ (96) lẹ ụmụ ebulu mmẹsa kwasị ọgụn-ẹtọ (77). Hụn wẹ gi chụn ẹjan-njọ wụ mkpịn mmẹbụọ. Wẹ ile wụchanrịn ẹjan wẹ kpọnị Osolobuẹ ọkụn.

³⁶ Wẹ nọzị zi ndị a kịnị eze rịsọnmẹ Ẹgbẹrẹ Nfetu Iyi-Yufretisi hụ lẹ ndị gọvanọ rị ebẹhụ ozi eze lẹ iwu rịn'a, wẹ nọ kwadọn ndị Ju lẹ ọrụn Ụlọ Chuku.