Ẹzra 7 - Ika

Isi Nke Ẹsa Ẹzra A Bịa Jerusalẹm

¹ O tebe ọhụnma-ọhụnma, ogẹn Atazẹzẹsi gi wụ eze Pẹshịa, Ẹzra nọ bịa. Ẹzra wụ nwa Sẹraya nwa Azaria nwa Hil'kia.

² Shalum nẹdi Hil'kia wụ nwa Zadọkụ nwa Ahitubu

³ nwa Amaria nwa Azaria nwa Mẹrayotu.

⁴ Zẹrahịa nẹdi Mẹrayotu wụ nwa Uzi nwa Buki

⁵ nwa Abishụa nwa Finẹhasị nwa Ẹliẹza. Ẹliẹza wụ nwa Ẹrọnụ onyẹ-isi nchụn-ẹjan ibuzọ.

⁶ Okẹnnyẹni wụ Ẹzra gha Babilọnụ bịa Jerusalẹm. Onyẹ-nkuzi Iwu Mozizi rọ, hụn marịn Iwu Mozizi ru alị — Iwu hụn Osolobuẹ wụ Chuku Izrẹlụ ye. Eze Pẹshịa e yegụọ a ihiẹn ile ọ rịọ a n'o d'a bịa Jerusalẹm, makẹni Osolobuẹ wụ Chuku ẹ nọyen'ẹ.

⁷ O nwọnzighọ ndị Izrẹlụ ọzọ gha Babilọnụ lụaha Jerusalẹm ahụa nke ẹsa ahụn eze-kanị wụ Atazẹzẹsi kịma — kẹ ndị nchụn-ẹjan kẹ ndị Livaị ibe wẹ a rụnyeni wẹ ọrụn kẹ ndị ọzọ e jẹn ozi imẹ Ụlọ-nsọ; ụfọdụ ndị Livaị hụ wụ ndị a bụ ẹbụ, ụfọdụ wụ ndị-nche ọnụ-mgbọn Ụlọ-nsọ.

⁸ Ifọn nke isẹn imẹ ahụa nke ẹsa eze wụ Atazẹzẹsi kịma kẹ Ẹzra gi ru Jerusalẹm.

⁹ Ụhụọhịn ibuzọ imẹ ifọn ibuzọ k'ọ gha Babilọnụ buli, ọ nọ ru Jerusalẹm ụhụọhịn ibuzọ imẹ ifọn nke isẹn, makẹni Chuku yen'ẹ ẹka ọda-ọda.

¹⁰ Makẹni Ẹzra e wegụọ enwẹn ẹ ye ịmụ Iwu Osolobuẹ lẹ imẹn'ẹ lẹ ikuzi Izrẹlụ ụmụ-iwu ndị rịn'a lẹ ihiẹn ndị Osolobuẹ sị wẹ mẹ.

Ẹkụkwọ-ozi Atazẹzẹsi Deye Ẹzra

¹¹ Ọnwan wụ ẹkụkwọ-ozi eze wụ Atazẹzẹsi gi kwadọn onyẹ nchụn-ẹjan lẹ onyẹ nkuzi-iwu wụ Ẹzra, hụn mụ iwu lẹ uhi Osolobuẹ butọnị ndị Izrẹlụ, marịn a ru alị:

¹² Atazẹzẹsi, eze ndị-nze alị ichẹn-ichẹn, de ẹkụkwọ-ozini jẹnni onyẹ nchụn-ẹjan wụ Ẹzra hụn wụ onyẹ-nkuzi Iwu Chuku rị elu-igwee: Ekele m'i.

¹³ M rị nwan e ye iwuni: onyẹ ọwụlẹ imẹ ndị Izrẹlụ rị alị-eze m hụn chọ n'o sọn i la Jerusalẹm, ya sọnmẹ i, kẹ onyẹ-mmaka kẹ ndị nchụn-ẹjan kẹ ndị Livaị.

¹⁴ Eze lẹ ịhịamẹ ẹ ẹsa zijẹnkọ ị d'e lele kẹ ndị rị Juda lẹ Jerusalẹm dọn rị e dọnmẹ Iwu Chuku i hụn o mẹni ẹka ị k'ọ rị.

¹⁵ Buruzikwọ egho siliva lẹ goru eze lẹ ịhịamẹ ẹ rị e gi uche wẹ e ye Chuku Izrẹlụ, hụn bi imẹ Jerusalẹm,

¹⁶ cheni egho siliva lẹ goru ile ị k'e nwọnhẹn Ẹgbẹrẹ Babilọnụ lẹ oyiye ghapụha ndị Izrẹlụ lẹ ndị nchụn-ẹjan wẹ obi ye makẹ Ụlọ-nsọ Chuku wẹ imẹ Jerusalẹm.

¹⁷ Hụn a n'i gi eghoni ile ṅọn okẹn-efin lẹ ebulu lẹ ụmụ-ebulu lẹ ọka lẹ manya ndị wẹ gisọnmẹ a chụn ẹjan, y'e gi wẹ chụn ẹjan elu ukpo nchụn-ẹjan rị Ụlọ Chuku i imẹ Jerusalẹm,

¹⁸ yụ lẹ ndị Ju ibe i e gi egho siliva lẹ goru k'a họdụnị mẹ ihiẹn ọwụlẹ rị ụnụ mma ẹnya hụn wụ uche Chuku ụnụ.

¹⁹ Hụn a nị ihiẹn ile wẹ buche i ẹka wẹ gi e fe ofufe imẹ Ụlọ-nsọ Chuku i e rughọ ihun Chuku imẹ Jerusalẹm.

²⁰ Ihiẹn ọzọ ọwụlẹ wẹ chọ imẹ Ụlọ Chuku i hụn o mẹni ịyụ k'e wẹhẹ ẹ, i nwọn ikẹn nọ ẹkpa eze weri ẹ.

²¹ Mmẹ, Atazẹzẹsi hụn wụ eze, rị nwan a sị ndị ihaza ile e kwọndọn ẹkpa eze Ẹgbẹrẹ Nfetu Iyi-Yufretisi wẹ weru ẹnya alị yechanrịn onyẹ nchụn-ẹjan wụ Ẹzra hụn wụ onyẹ-nkuzi Iwu Chuku elu-igwee ihiẹn ọwụlẹ o k'a sị ụnụ ye ẹ —

²² yerun'ẹ ẹkpa siliva uku ọgụn-isẹn (100), ẹkpa ọka-witi uku ọgụn-isẹn (100), galọnụ manya ọgụn-isẹn (100), galọnụ ofigbọn-olivu ọgụn-isẹn (100), yezin'ẹ nnu ọda-ọda.

²³ Ihiẹn ile Chuku rị elu-igwee ku imẹ Iwu ẹ, weru nị ẹnya alị mẹni Ụlọ-nsọ Chuku elu-igwee ya. Kị ẹnyi k'a nị nị Chuku gi ọnụma sọn alị-eze eze lẹ ụmụ a?

²⁴ Ya wezikwọ ụnụ ile e kwọndọn egho eze ẹnya nị ẹnyi asịnị ụnụ na onyẹ ọwụlẹ a rụn ọrụn imẹ Ụlọ-nsọ hụ ụgwọ-isi mọbụ ụtụ-eze mọbụ ụtụ ibu-afịa — kẹ ndị nchụn-ẹjan kẹ ndị Livaị kẹ ndị a bụ ẹbụ kẹ ndị-nche ọnụ-mgbọn Ụlọ-nsọ hụ kẹ ndị idibo Ụlọ-nsọ kẹ ndị ọzọ a rụn ọrụn imẹ Ụlọ-Chukuni.

²⁵ Ịyụ wụ Ẹzra, gi amamihiẹn Chuku i, hụn rị imẹ i, tumẹsọnmẹ ndị ọka-ikpe uku lẹ ọka-ikpe nta hụn marịn Iwu Chuku i, nị wẹ hụn ụzọ e dọnzini ndị ile rị Ẹgbẹrẹ Nfetu Iyi-Yufretisi oku. Ndị ile marịnlẹni Iwu Chuku i, y'a kuzi wẹ ya.

²⁶ Onyẹ jụ n'o mẹkọ dọnmẹkọ iwu Chuku i lẹ iwu eze sikọ d'a narịnrịrị afụnfụn ya lẹ wị — ọnwụn mọbụ ịchụpụ wẹ alị mọbụ ịnapụ wẹ ihiẹn wẹ mọbụ ịtụ wẹ ngan.

Ẹzra Sị Chuku “Y'e mẹkẹ!”

²⁷ Ịja-mma ya rịnị Osolobuẹ, Chuku ndị nẹdi ẹnyi, hụn bu ẹ che eze obi n'o ye ụlọ Osolobuẹ rị Jerusalẹm ọghọ ẹnịna,

²⁸ hụn mẹtụnị m eze lẹ ịhaịmẹ ẹ lẹ ndị-isi ẹ ẹka obi. Ndụn ban m ọhụnma-ọhụnma makẹni Osolobuẹ wụ Chuku m nọyeni m anọyeni, ya m nọ kpọkikomẹ ndị-isi Izrẹlụ hụn jẹnkọ d'e sọn m la Jerusalẹm.