Ẹzra 6 - Ika

Isi Nke Isin Kẹ Eze Dọn Kwadọn Ịtụndọnzi Ụlọ-nsọ

¹ Ya kẹ eze wụ Dariọsụ nọ yi uhi, wẹ nọ chọ imẹ ebe wẹ detọsọnmẹ ihiẹn mẹ ogẹn mbụ, hụn rị ebe w'e dọnmẹ ihiẹn rị mkpa imẹ Babilọnụ.

² Wẹ nọ hụn ẹhụhụọ ohu wẹ deye ẹ. Kanị imẹ obi-eze rị Ẹk'batana, Ẹgbẹrẹ Mẹdịa, kẹ wẹ nọ hụn a; ihiẹn wẹ deye ẹ wụ: Marịn nị nị:

³ Ahụa ibuzọ eze wụ Saịrọsị kịma, ọ nọ yi uhi banyeni Ụlọ Chuku rị Jerusalẹm, sị: Wẹ tụndọnzi Ụlọ-nsọ hụ n'ọ wụrụ ebe wẹ nọ a chụn ẹjan; wẹ gbe iyetọ a ebe ọ rị mbụ. Ojijẹn-elu ẹ k'a wụ ụbụkụ iri kwasị ọgụn-ẹnọ (90), ụshịa a ụbụkụ iri kwasị ọgụn-ẹnọ (90).

⁴ Wẹ sikọ d'e gi ọmụma hi-ogbe lẹ osisi dọn ẹ: wẹ dọye ọmụma, dọyekwasị a, mgbe ẹbụọ, a dọye wẹ akp'osisi ohu. Egho eze kẹ wẹ k'e gi rụn a.

⁵ Wẹ wekinzikwọ ihiẹn-goru lẹ ihiẹn-siliva Ụlọ Chuku, ndị hụ Nebukadineza gha Ụlọ Chuku rị Jerusalẹm kwaha Babilọnụ — wẹ wekin wẹ ọnọdị wẹ imẹ Ụlọ-nsọ rị Jerusalẹm; wẹ bu wẹ che imẹ Ụlọ Chuku.

⁶ “Lee ẹ nwan, Tatenaị hụn wụ gọvanọ Nfetu Iyi-Yufretisi lẹ Shẹta-Bozenaị, ụnụ lẹ ibe ụnụ ndị-isi Ẹgbẹrẹ hụ, ụkụ ụnụ erukwọlẹ ebẹhụ.

⁷ Ye ni ni wẹ rụn ihiẹn wẹ rị a rụn Ụlọ Chuku. Hapụ nị gọvanọ ndị Ju lẹ ndị-isi ndị Ju nị wẹ tụndọnzi Ụlọ Chuku ebe ọ rị mbụ.

⁸ “Ẹlẹ ọhụn sụọ: m rị nwan e ye ụnụ iwu ihiẹn ụnụ k'e mẹni ndị-isi ndị Ju ndịnị gi kwadọn Ụlọ-Chukuni wẹ rị a tụndọnzi: a gha nị ẹkpa eze, ihiẹn ndị rị Nfetu Iyi-Yufretisi a tụ, e wepụha egho ikẹnnyẹ ndịnị e gi a rụn ọrụn, e mẹ ẹ ozigbo-ozigbo, makẹ ọrụn ahụn gha a kụsị.

⁹ Ihiẹn ọwụlẹ wẹ chọ — kẹ okoro-efin kẹ ebulu kẹ atụnrụn w'e gi chụnyeni Chuku elu-igwee ẹjan w'a kpọ ọkụn, kẹ ọka-witi kẹ nnu kẹ manya kẹ ofugbọn-olivu — wẹ ye ndị nchụn-ẹjan rị imẹ Jerusalẹm ya ụhụọhịn-ụhụọhịn kẹ wẹ dọn ku, egberikwọlẹ ni,

¹⁰ kẹni w'a chụnyeni Osolobuẹ elu-igwee ẹjan hụn a sụọ a ụsụọ, e mẹni eze lẹ ụmụ a ekpere.

¹¹ “M rịzịkwọ e yi uhini: onyẹ buche mọbụ wepụ ihiẹn ọwụlẹ iwuni, wẹ sepụha osisi wẹ gi dụnmịn ụlọ a, zumẹ ẹ alị, hogbu hụnyẹ elu ẹ. Wẹ gi ufiri njọnị tikpọchanrịn ụlọ onyẹ hụ, n'o họnrin ikpọnfin.

¹² Chuku hụn mẹ Ẹfan a rị ebẹhụ ya tikpọ eze mọbụ alị ọwụlẹ hụn k'a ma-ama hutọ iwuni mọbụ tikpọ Ụlọ-nsọnị rị Jerusalẹm. “Mmẹ wụ Dariọsụ e kuọl'a. Wẹ mẹ ẹ ozigbo, mẹ ẹ ọhụnma.”

A Tụndọnzichanrịn Wẹ Ụlọ-nsọ

¹³ Ya kẹ Tatenaị wụ gọvanọ Ẹgbẹrẹ Nfetu Iyi-Yufretisi ahụn lẹ Shẹta-Bozenaị lẹ ibe wẹ nọ mẹ ihiẹn ile eze ku imẹ iwu hụ o zihẹni wẹ, mẹ ẹ mẹru ẹ alị.

¹⁴ Ya ndị-isi ndị Ju nọ tụnsọnmẹ Ụlọ-nsọ hụ, a gha ihun ọhụnma-ọhụnma, makẹni ndị amụma wụ Hagaị lẹ Zẹkaraya nwa Ido hụkwọ e gi oku Chuku a gba wẹ umẹ. Wẹ nọ tụnchanrịn Ụlọ-nsọ hụ kẹ Chuku Izrẹlụ dọn gwa wẹ lẹzi kẹ ndị-nze Pẹshịa wụ Saịrọsị, Dariọsụ lẹ Atazẹzẹsi dọnsọnmẹ yi uhi ẹ.

¹⁵ Nke akp'ọhịn ẹtọ imẹ ọnwan ikpanzụụn wụ Ada imẹ ahụa nke isin eze wụ Dariọsụ kịma kẹ wẹ tụnchanrịn Ụlọ-nsọ hụ.

A Ha Wẹ Ụlọ-nsọ Hụ Ye Ẹka Osolobuẹ

¹⁶ Ya kẹ ndị Izrẹlụ nọ gi ịghọghọ mẹ mmẹmmẹ gi ha Ụlọ Chuku hụ ye Chuku ẹka: kẹ ndị nchụn-ẹjan wẹ kẹ ndị Livaị ibe wẹ e yeni wẹ ẹka kẹ ndị ọzọ ile lụaha ebe wẹ kpụnjẹn wẹ.

¹⁷ Anụ wẹ gi chụn ẹjan ogẹn wẹ gi ha Ụlọ Chuku ye ẹ ẹka wụ: okẹn-efin ọgụn-isẹn (100), ebulu ọgụn-iri (200), ụmụ ebulu nnụ (400); hụn wẹ gi chụnnị Izrẹlụ ile ẹjan njọ wụ mkpịn mmẹbụọ (12), ohu-ohu wụ nke ebọn ohu-ohu rị Izrẹlụ.

¹⁸ Ya wẹ nọ dọnmẹsọnmẹ ndị nchụn-ẹjan itu wẹ rị ichẹn-ichẹn, dọnmẹsọnmẹ ndị Livaị itu nke wẹ — itu ndị w'a nọ rụn ọrụn w'a rụn imẹ ofufe Chuku imẹ Jerusalẹm, k'o dọn rị imẹ Ẹkụkwọ Mozizi.

E Mẹ Wẹ Mmẹmmẹ-nghafe

¹⁹ Nke akp'ọhịn mmẹnọ imẹ ifọn ibuzọ, ya ndị hụ lụaha ebe wẹ kpụnjẹn wẹ nọ mẹ Mmẹmmẹ-nghafe.

²⁰ Ndị nchụn-ẹjan lẹ ndị Livaị bu ụzọ fepụgụ ẹhụ kẹ iwu Osolobuẹ dọn ku, wẹ ile nọ rị ọchan. Ya ndị nchụn-ẹjan ọ rị ẹka nọ gbuni ndị hụ ile lụahanị nwa-ebulu nghafe — kẹ ndị mmaka kẹ ndị nchụn-ẹjan ibe wẹ kẹ enwẹn wẹ.

²¹ Ya kẹ ndị Izrẹlụ lụaha ebe wẹ kpụnjẹn wẹ nọ ri ẹ, uwẹ lẹ ndị ile jụgụ ihiẹn w'a sọ hụn alị ndị nọkunmẹni wẹ e mẹ kẹni wẹ hụn ụzọ femẹ Osolobuẹ, Chuku Izrẹlụ.

²² Wẹ nọ gi ịghọghọ mẹ Mmẹmmẹ Brẹdi Yisti rịlẹni — ọrọgbọ akp'ọhịn ẹsa hụ wẹ gi e mẹ ẹ, makẹni Osolobuẹ e mẹgụọ ịghọghọ jun wẹ obi ebe ọ nọ mẹtụnị wẹ eze Asiria ẹka obi hụn o gi yeni wẹ ẹka rụn ihiẹn wẹ rụn imẹ Ụlọ Chuku, Chuku Izrẹlụ.