Ẹzra 5 - Ika

Isi Nke Isẹn A Tụndọnzimẹ Wẹ Ụlọ-nsọ

¹ Ogẹn hụ, ndị-amụma wụ Hagaị lẹ Zẹkaraya nwa Ido nọ gi ẹfan Chuku Izrẹlụ, hụn ndị Izrẹlụ rị okpuru ẹ, bu ni ndị Ju hụn rị Juda lẹ Jerusalẹm amụma.

² Ya kẹ Zerubabẹlụ nwa Shiẹtiẹlụ lẹ Jeshụa nwa Jozadakị nọ kọnrin ọrụn, tụndọnzimẹ Ụlọ Chuku imẹ Jerusalẹm; ndị-amụma Chuku ndị ahụn hụ imẹ igunrun wẹ, a kwadọn wẹ.

³ Ogẹn ahụn, Tatenaị hụn wụ gọvanọ rị a kị Nfetu Iyi-Yufretisi ahụn alị Juda rị lẹ Shẹta-Bozenaị lẹ itu wẹ nọ jẹnburu wẹ, sị wẹ, “Onyẹ sị ụnụ d'a tụndọnzi Ụlọ-nsọnị? Onyẹ sị ụnụ dọnzi ẹ?”

⁴ Wẹ nọzị sị wẹ: “Gwa nị ẹnyi ẹfan ndị rị a tụnn'a?”

⁵ Kanị ẹnya Chuku ndị Ju rị ebe ndị-isi ndị Ju rị, akụsịnị wẹ wẹ, makẹni gọvanọ sikọ d'e bu ụzọ zigụ ozi jẹnni eze Pẹshịa wụ Dariọsụ, ọ zakịngụ wẹ wẹ kebe marịn ihiẹn o ku.

Ẹkụkwọ Tatenaị Dejẹnni Dariọsụ

⁶ Ọnwan wụ ihiẹn rị ẹkụkwọ-ozi Tatenaị wụ gọvanọ Ẹgbẹrẹni wụ Nfetu Iyi-Yufretisi lẹ Shẹta-Bozenaị lẹ itu wẹ, ndị-isi rị Nfetu Iyi-Yufretisi, dejẹnni eze wụ Dariọsụ:

⁷ Dariọsụ, Agụ! Isi-i-chei!

⁸ O furu nị eze marịn nị ẹnyi jẹn Ẹgbẹrẹ Juda, jẹn Ụlọ-nsọ Chuku uku. Ndị ahụn rị e gi ọmụma hi-ogbe a tụn a, a dọ ogwe osisi e ye ụsụọ-ẹjan a. Wẹ rị a rụnshi ọrụn hụ ikẹn, ọ hụ a gha ihun ọhụnma-ọhụnma ẹka wẹ.

⁹ Ya ẹnyi nọ jụ ndị-isi wẹ ụtaa, sị wẹ: Onyẹ gwa ụnụ tụndọnzi Ụlọ-nsọnị lẹ ihiẹnni ụnụ rị a tụnkin?

¹⁰ Ẹnyi a jụzịghọ wẹ ẹfan wẹ, kẹni ẹnyi hụn ụzọ deri ẹfan ndị-isi wẹ, wẹhẹn'i.

¹¹ Ọnwan wụ ihiẹn wẹ za ẹnyi: “Ẹnyi wụ idibo Chuku hụn nwọn elu-igwee lẹ ụwa. Ẹnyi rịhụ a tụndọnzi Ụlọ-nsọnị wẹ tụngụ kete ahụa ole-lẹ-ole, hụn eze uku hụn kị Izrẹlụ mbụ tụn, tụngụ a,

¹² kanị, makẹni ndị nẹdi ẹnyi wẹ kanị kpasu Chuku elu-igwee iwe, ọ nọ we wẹ che ẹka Nebukadineza onyẹ Kal'di, eze Babilọnụ. Ọ nọ tikpọ ụlọ-nsọnị, kpụn ndị alịnị shi Babilọnụ.

¹³ “Kanị o ru nwan ahụa ibuzọ Saịrọsị eze Babilọnụ kịma, Saịrọsị nọ yi uhi sị wẹ tụndọnzi Ụlọ Chukuni.

¹⁴ Ọ ghadẹ ụnọ-mmọn Babilọnụ kwapụha ihiẹn goru lẹ ihiẹn siliva Ụlọ Chuku, hụn Nebukadineza gha Ụlọ-nsọ rị Jerusalẹm kwashi ụlọ-mmọn Babilọnụ. “Saịrọsị e bupụha wẹ, we wẹ ye okẹnnyẹ w'a kpọ Shẹshibaza hụn o tumẹ gọvanọ Ẹgbẹrẹ Nfetu Iyi-Yufretisini,

¹⁵ sị a, ‘Buru ihiẹn ndịnị; jẹn d'e bu wẹ che imẹ Ụlọ-nsọ rị Jerusalẹm; tụndọnzi Ụlọ Chuku ebe ọ rị mbụ.’

¹⁶ Okẹnnyẹni wụ Shẹshibaza nọ bịa, gbe iyetọ Ụlọ Chuku rị Jerusalẹm. Wẹ rịkwọ nwan a tụn a kete mgbẹhụ; w'e k'e tụngụ a.

¹⁷ “Agụ, o mẹ nwan n'ọ sụọghọ ị, sị wẹ lele ebe wẹ detọsọnmẹ ihiẹn mẹ imẹ Babilọnụ mbụ, nị wẹ lele kẹ o nwọnghọ ogẹn eze wụ Saịrọsị gi yi uhi sị wẹ d'a tụndọnzi Ụlọ Chukuni rị Jerusalẹm. Omẹgụ y'e zi ozi gwa ẹnyi uche i banyeni okuni.”