Ẹzra 4 - Ika

Isi Nke Ẹnọ E Bu Wẹ Uke Cheni Ndị Rị A Tụndọnzi Ụlọ-nsọ

¹ Ogẹn ndị-iṅẹnrẹn alị Juda lẹ Bẹnjamini gi nụ nị ndị lụaha ebe wẹ kpụnshi wẹ rị a tụnnị Osolobuẹ wụ Chuku Izrẹlụ Ụlọ-NSỌ,

² wẹ nọ bịa d'e kunrun Zerubabẹlụ lẹ ndị-isi ebọn ichẹn-ichẹn, sị wẹ, “Nị ẹnyi sọn ụnụ tụn a, makẹni ẹnyi nwẹn e fezikwọ Chuku ụnụ. Ẹnyi hụ a chụnyen'ẹ ẹjan kete Ẹsahadọnụ eze Asiria wẹhẹlẹ ẹnyi ebeni.”

³ Kanị, Zerubabẹlụ, Jeshụa lẹ ndị isi ọzọ hụn kịsọnmẹ ikpụlọ ndị rị Izrẹlụ nọ sị wẹ, “Onwọnni hụn biri ẹnyi lẹ ụnụ ebe ịtụnnị Chuku ẹnyi Ụlọ-nsọ rị. Ẹnyi sụọ k'a tụnnị Osolobuẹ wụ Chuku Izrẹlụ ya: ịya kẹ Saịrọsị eze Pẹshịa gwa ẹnyi.”

⁴ Ya kẹ alị ndị nọkunmẹ ndị Juda nọ mẹmẹ nị ndụn gụ wẹ; e rọnmẹ wẹ ndị Juda egun nị wẹ tụnbehi.

⁵ Wẹ hụ e gi egho e ṅọnrin ịhịan d'e mẹ wẹ uke ọrọgbọ hụ ile Saịrọsị wụ eze Pẹshịa gi kị d'e ru ogẹn Dariọsụ eze Pẹshịa.

E Mẹsọnmẹ Wẹ Ndị Juda Uke

⁶ Ogẹn Ahazẹrusu wụ Zẹzẹsi gi kịma Pẹshịa, ndị-iṅẹnrẹn nọ dejẹnn'ẹ ẹhụhụọ, kpe ndị Juda lẹ Jerusalẹm ẹka a.

⁷ O ruzi ogẹn Atazẹzẹsi gi wụ eze Pẹshịa, Bish'lam, Mitrẹdatị, Tabilu lẹ ndị itu wẹ nọ dejẹnni eze wụ Atazẹzẹsi ẹkụkwọ, kpe wẹ. Asụsụ ndị Aram ịhịan ile a sụ ogẹn hụ kẹ wẹ gi de ẹ, nị wẹ d'e gi asụsụ ọzọ de ẹ. Lee kẹ wẹ dọn de ẹ asụsụ Aram:

⁸ Rehum onyẹ-isi lẹ Shimshaị hụn wụ akanwe de ẹkụkwọ-ozini gi kpe ndị Jerusalẹm ẹka eze wụ Atazẹzẹsi. Ihiẹn wẹ de wụ:

⁹ Ẹkụkwọ-ozini gha ẹka ndịnị bịa: Rehum hụn wụ onyẹ-isi lẹ Shimshaị hụn wụ akanwe. Uwẹ lẹ ndị-isi ibe wẹ wụ ndị ọka-ikpe lẹ ndị gisọnmẹ ọkwa ichẹn-ichẹn imẹ ndị rị ebeni — ẹnyi ndị ghasọnmẹ Tripolisi lẹ Pẹshịa lẹ Ẹrẹkị lẹ Babilọnụ bịa, ẹnyi lẹ ndị Ẹlam obodo Susa

¹⁰ lẹ ndị ọzọ hụn eze uku nwọn ọghọ wụ Ashọbanipalụ (Osinapa) chụpụsọnmẹ alị wẹ, kpụnhan wẹ ebeni d'e biri obodo Sameria lẹ ụzọ ọzọ rị nfetu Iyi-Yufretisi.

¹¹ Ihiẹn wẹ dejẹnn'ẹ wụ: “Eze wụ Atazẹzẹsi kẹ ẹnyi dejẹnni ẹkụkwọnị: “Idibo i hụn rị Nfetu Iyi-Yufretisi rị e de:

¹² “O furu nị eze marịn nị ndị Ju ahụn gha ebe ị rị lụaburuhẹ ẹnyi e shigụọ Jerusalẹm. Wẹ rị nwan a tụndọnzi obodo nnupụ-isi hụ e mẹgbu enwẹn ẹ eje-ihiẹn. Wẹ rị a tụndọnzi mgbọn ẹ, e dọnzi iyetọ a.

¹³ “O furu nị eze marịnzị nị wẹ tụndọnzigụ obodoni, rụndọnzichanrịn mgbọn ẹ, akụkọzị wẹ ụgwọ-isi, atụkọzị wẹ ụtụ-eze lẹ ụtụ ibu-afịa; o rukwọ ẹkpa eze e belụa.

¹⁴ Ebe o mẹ nwan nị okpuru ịyụ wụ eze kẹ ẹnyi rị lẹni o furuni nị ẹnyi nị wẹ budan eze, ya kẹ ẹnyi gi rị e zihẹn'i ozini, nị ẹnyi gi ẹ mẹ eze a marịn ihiẹn rị e mẹni,

¹⁵ kẹni eze lele ebe wẹ detọsọnmẹ ihiẹn mẹ ogẹn ndị nẹdi ẹ. I k'a hụn a ebẹhụ nị obodoni wụ obodo nnupụ-isi, hụn e ye ndị-nze lẹ ndị a nọkin ẹnya wẹ Ẹgbẹrẹni nsọngbu; obodo nnupụ-isi k'ọ wụ ẹdẹi. Ya haịn wẹ gi tikpọ obodoni.

¹⁶ Ẹnyi rịkwọ nwan e mẹ eze a marịn nị wẹ tụndọnziọlẹ obodoni, rụnchanrịn mgbọn ẹ, y'e nwọnkọzị ihiẹn ọwụlẹ Ẹgbẹrẹni wụ Nfetu Iyi-Yufretisi.”

¹⁷ Ya eze nọ gi hụnnị za wẹ: Rehum hụn wụ onyẹ-isi lẹ Shimshaị hụn wụ akanwe lẹ itu wẹ ndị bi imẹ Sameria lẹ ụzọ ọzọ Ẹgbẹrẹ Nfetu Iyi-Yufretisi kẹ m rị e deni: E kele m ụnụ.

¹⁸ A nọgụọ wẹ idẹnya m gụn ẹkụkwọ ụnụ dehẹni ẹnyi.

¹⁹ Ya m nọ sị wẹ chọ ihiẹn ụnụ sị m chọ, m nọ hụn a n'o tekẹ obodoni nupụma isi okpuru ndị-nze lẹ n'o tekẹ wẹ gi nnupụ-isi lẹ ihiẹn a kwadọn nnupụ-isi marịn wẹ.

²⁰ Jerusalẹm e nwọnọlẹ ndị-nze hụn kpa ikẹn, ndị nze hụn kị alị ile rị Nfetu Iyi-Yufretisi, wẹ hụ a kụhanị wẹ ụgwọ-isi, a tụhanị wẹ ụtụ alị lẹ ụtụ ibu-afịa.

²¹ Ye ni nwan iwu nị ndịnị kụsị ọrụn hụ, sịzị wẹ atụndọnzilẹ obodo ahụn d'e ru nị a gwa m wẹ.

²² Kpachanpụkwọ nị ẹnya amamgbe ụnụ e gi okuni gupụ egu; kị wẹ k'a nịnị eje-ihiẹnni waye, wiwi eze ihiẹn?

²³ Hụn wẹ gihụ gụnnị Rehum lẹ Shimshaị lẹ itu wẹ ẹhụhụọ hụ eze wụ Atazẹzẹsi de, wẹ nọ jẹnburu ndị Ju imẹ Jerusalẹm ozigbo, gi ikẹn kụsị wẹ ọrụn.

²⁴ Ya kẹ ọrụn Ụlọ Chuku rị imẹ Jerusalẹm nọ kụsị d'e ru ahụa nke ẹbụọ Dariọsụ eze Pẹshịa kịma.