Ẹzra 3 - Ika

Isi Nke Ẹtọ A Tụndọnzi Wẹ Ukpo Nchụn-ẹjan

¹ Ogẹn o gi ru ifọn nke ẹsa, ndị Izrẹlụ e birisọnmẹgụọ obodo wẹ. Ya kẹ wẹ ile nọ zu imẹ Jerusalẹm, onwọnni onyẹ pụn'a.

² Jeshụa nwa Jozadakị lẹ ndị nchụn-ẹjan ibe ẹ lẹ Zerubabẹlụ nwa Shiẹtiẹlụ lẹ ibe ẹ nọ rụn ukpo nchụn-ẹjan Chuku Izrẹlụ kẹ w'a rụn a, kẹni wẹ nọ elu ẹ chụmazị ẹjan w'a kpọ ọkụn kẹ wẹ dọn de ẹ imẹ Iwu Mozizi odibo Chuku.

³ A rụnghọ wẹ ukpo nchụn-ẹjan hụ, ọsụọn'a nị egun ndị fihunmẹni wẹ rị a tụ wẹ. Wẹ rụn ye ebẹhụ ukpo nchụn-ẹjan Osolobuẹ rị mbụ. Ya wẹ nọ chụnyemẹni Osolobuẹ ẹjan w'a dụn ọkụn elu ẹ — kẹ ẹjan ụtụntụn kẹ nke ẹnyasị.

⁴ Wẹ nọ mẹ Mmẹmmẹ Ibi-imẹ-ọdụ kẹ wẹ dọn de ẹ imẹ Iwu, a chụn wẹ ẹjan w'a kpọ ọkụn ole w'a chụ ụhụọhịn-ụhụọhịn imẹ Mmẹmmẹ hụ.

⁵ Omẹgụ, wẹ nọ chụnye ẹjan w'a kpọ ọkụn: kẹ hụn w'a chụn ogẹn ile kẹ ẹjan Ifọn-ọhụn kẹ ndị w'a chụn ogẹn Mmẹmmẹ nsọ Osolobuẹ ile lẹzi oyiye ndị gha wẹ obi pụha hụn wẹ wẹhẹsọnmẹ d'e ye Osolobuẹ.

⁶ Ụhụọhịn ibuzọ imẹ ifọn nke ẹsa kẹ wẹ chụnyemẹni Osolobuẹ ẹjan ahụn w'a dụn ọkụn, kanị wẹ eke gbedọnzimẹ iyetọ Ụlọ-NSỌ Osolobuẹ lẹ enwẹn ẹ ogẹn hụ.

E Gbedọnzi Wẹ Iyetọ Ụlọ-nsọ

⁷ Ya wẹ nọ gi egho we ndị e dọn ụlọ lẹ ndị kapịnta, gi ọka lẹ manya lẹ ofigbọn-olivu kụ ndị alị Sidọnụ lẹ alị Taya ụgwọ, wẹ nọ gha Lẹbanọnụ bu ogwe osisi sida che elu Ohimin-Mẹditeranịa buhẹni wẹ ya Jọpa hụn rị mkpẹnrẹn Ohimin hụ — makẹni Saịrọsị eze Pẹshịa a sịgụọ wẹ mẹ ẹ.

⁸ Ahụa mẹ ẹ ẹbụọ wẹ ru Ụlọ Chuku imẹ Jerusalẹm, o ru ifọn nke ẹbụọ, Zerubabẹlụ nwa Shiẹtiẹlụ lẹ Jeshụa nwa Jozadakị nọ bidọn ọrụn ịtụndọnzi Ụlọ-nsọ, uwẹ lẹ mmunẹ wẹ họdụnị — kẹ ndị nchụn-ẹjan kẹ ndị Livaị kẹ ndị ọzọ ile gha ebe wẹ kpụnjẹn wẹ lụaha Jerusalẹm. E tumẹ wẹ ndị Livaị rị nwa ahụa ọgụn shi elu nị w'e lepụ ọrụn ụlọ Osolobuẹ wẹ rị a rụn ẹnya.

⁹ Jeshụa wẹ hụ e lepụ ọrụn Ụlọ Chuku hụ ẹnya, ya lẹ ụmụ a lẹ umunẹ ẹ ndị ebọn Livaị — kẹ Kad'miẹlụ lẹ ụmụ a (ndị hụn Hodavia mụ) kẹ ụmụ Henadadị.

¹⁰ Ogẹn ndị rị e gbedọnzi iyetọ Ụlọ-NSỌ Osolobuẹ gi gbegụ a, ndị nchụn-ẹjan nọ yiri ẹwuru nchụn-ẹjan wẹ, burusọnmẹ opi; ndị Livaị wụ ụmụ Asafụ e burusọnmẹ kpajaị (simbalụ); wẹ ile nọ werisọnmẹ ọnọdị wẹ gi a ja Osolobuẹ mma kẹ eze Izrẹlụ wụ Defidi dọn ku ogẹn mbụ.

¹¹ Wẹ hụ a bụ ẹbụ wẹ gi a ja Osolobuẹ mma lẹ hụn wẹ gi a kpanmịn a, a sị: Ọ rịka mma: O nwọn ihiẹn-ọsụsụọ Izrẹlụ jẹnrin ejẹn. Ịhịan ile nọ yini Osolobuẹ okẹn oro ịja-mma, makẹni e gbegụọ wẹ iyetọ ụlọ Osolobuẹ.

¹² Kanị ndị ẹgẹdi bu ọda imẹ ndị nchụn-ẹjan lẹ ndị Livaị lẹ ndị-isi ikpụlọ ichẹn-ichẹn hụn gi ẹnya hụn Ụlọ-nsọ mbụ hụ wẹ tikpọ hụ a kwan a kwanshi elu, kẹ wẹ hụn iyetọ wẹ rị nwan e gbeni Ụlọ-nsọ hụnnị, kanị ndị bu ọda hụ e yi oro ịghọghọ,

¹³ Ọ nịzịnị ịhịan marịn hụn wụ oro ịghọghọ lẹ hụn wụ oro ẹkwan, makẹni e yikẹnmẹkẹ wẹ oro; a nụghọ wẹ oro wẹ ebe teni.