Ẹsta 8 - Ika

Isi Nke Ẹsatọ Eze Sị Ndị Ju Zụọrị Isi Wẹ

¹ Eze wụ Ahazẹrusu nọ we ihiẹn ile wụ nke Hamanị, eṅẹnrẹn ndị Ju, ye Alasị wụ Ẹsta Ụhụọhịn ahụn. Mọdikaya nọ bịa d'a rụnma ọrụn ihun eze, makẹni Ẹsta a gwagụọ eze nị Mọdikaya zụn a.

² Eze nọ gbụpụ ọla mkpịnsịn ẹka o gi e biye ihiẹn ẹka, hụn ọ napụha Hamanị, we ẹ ye Mọdikaya. Ẹsta nkẹ nọ we ihiẹn Hamanị che ẹka Mọdikaya.

³ Ẹsta nọzị rịọma eze, ọ dan alị ụkụ eze, a kwan. Ọ rịọ a ya kagbu eje-ihiẹn ahụn Hamanị onyẹ Agagị romẹ, hụn ọ chọ n'o mẹ ndị Ju.

⁴ Eze nọ we ọkpọ goru ẹ zinmẹ Ẹsta, gi ẹ nabanhan a. Ẹsta nọ lihi ọtọ, wuzo ihun eze.

⁵ Ọ sị eze, “Dodo, omẹni ọ sụọghọ Agụ, omẹni ọ chọ n'o mẹni m ọhụnma, omẹni ọ hụghọ a mma n'o mẹ ẹ, omẹni ihiẹn m a sụọghọ a, ya ye iwu hụn k'a kagbu hụn Hamanị nwa Hamẹdata onyẹ Agagị ropụha de, hụn wẹ k'e gi gbucharịn ndị Ju ile rị Azụụn ile eze rị a kị.

⁶ Nanị m'a dọn saẹka din ẹ omẹni eje-ihiẹn m hụngụ e kunrun ndị nke m? Nanị m'a dọn saẹka din ẹ omẹni e gbuchanrịn wẹ ndị nke m?”

⁷ Eze wụ Ahazẹrusu nọ sị Alasị wụ Ẹsta lẹ Mọdikaya onyẹ Ju, “Lee ẹ, e wegụọ m ihiẹn Hamanị ye Ẹsta: a nọgụọ wẹ ebẹhụ Hamanị rụn n'o gi hogbu Mọdikaya hogbu Hamanị lẹ enwẹn ẹ, makẹni ọ chọ ndị Ju njọ.

⁸ Ụnụ nwẹn, de ni nwan iwu ọzọ hụn jẹnkọ d'e yeni ndị Ju ẹka; de n'ẹ k'ọ dọn rị mma ẹnya ụnụ. Gi ni ẹfan eze de ẹ, ọnụ e gi ọla mkpịnsịn ẹka eze gi e biye ẹka biye ẹ. Makẹni, w'ara saẹka kagbu ihiẹn wẹ gi ẹfan eze de, gi ọla mkpịnsịn ẹka eze biye ẹ ẹka.”

⁹ Ịya kẹ wẹ nọ kpọ ndị akanwe eze ozigbo. Nke akpọhịn ẹtọ kwasị ọgụn imẹ ifọn nke ẹtọ, hụn wụ ọnwan Sivanị kẹ ihiẹnni mẹ. Wẹ nọ detu ihiẹn ile Mọdikaya sị ndị Ju mẹ lẹ hụn ọ sị ndị ọkịkị mẹ, kẹ ndị ile a nọkin ẹnya eze Azụụn ichẹn-ichẹn kẹ ndị gọvanọ kẹ ndị-isi ile rị Azụụn ẹsa kwasị ọgụn-isin eze rị a kị: gha Ndịa d'e rukwọrị Ẹtiopịa. Wẹ nọ gi mkpụrụ-ẹkụkwọ Azụụn ichẹn-ichẹn gi e de ihiẹn deni wẹ ya, gi asụsụ alị ichẹn-ichẹn deni wẹ ya, gizi asụsụ ndị Ju lẹ mkpụrụ-ẹkụkwọ wẹ gi e de deni wẹ ya.

¹⁰ Ẹfan eze wụ Ahazẹrusu kẹ Mọdikaya gi de ẹkụkwọ ndị hụ o zipụ, gi ọla mkpịnsịn ẹka eze gi e biye ihiẹn ẹka biye wẹ ẹka; ọ nọ we wẹ ye ndị ozi gi ẹshin ndị a gba okẹn-ọsọ hụn wẹ zụntọnị eze wejẹnsọnmẹ Azụụn ichẹn-ichẹn.

¹¹ Iwu hụ, hụn wụ nwan iwu eze, sị nị e yegụọ wẹ ndị Ju rị obodo ọwụlẹ ikẹn w'e gi zu lẹ hụn w'e gi zụọrị isi wẹ; ikẹn w'e gi tikpọ, gbu, zachanpụ ndị-agha ọwụlẹ mọbụ alị ọwụlẹ mọbụ Azụụn ọwụlẹ, kẹ ikpoho wẹ kẹ ụmụ-ẹka, ndị ọwụlẹ k'a maye wẹ ọgụn — lẹ ikẹn w'e gi kwarị ihiẹn wẹ.

¹² Ụhụọhịn wẹ kaye ndị Ju k'e gi mẹ ihiẹnni imẹ Azụụn ile Eze wụ Ahazẹrusu rị a kị wụ nke akp'ọhịn mmẹtọ imẹ ọnwan nke mmẹbụọ, hụn wụ ọnwan Ada.

¹³ Wẹ sikọ d'e tizi iwuni Azụụn ile, mẹ ndị alị ile marịn ọhụnma-ọhụnma, kẹni ndị Ju kwademẹ imẹgwarị ndị-iṅẹnrẹn wẹ ụhụọhịn ahụn.

¹⁴ Ndị ozi hụ gi ẹshin e jẹn nọ nyinrinsọnmẹ ẹshin-ọsọ ndị ahụn wẹ gi e jẹnni eze ozi, gi okẹn-ọsọ pụ, makẹ iwuni eze ti. A hịghọzị wẹ iwu hụ imẹ isi-alị wụ obodo Susa.

¹⁵ Kẹ Mọdikaya gha ebe eze rị pụha, o yihụ ẹwuru ndị-nze nke ọchan lẹ nke bru; o kpuhụ okpu-eze goru hi ogbe; o yihụzị ẹwuru e nwun pọpụ-pọpụ wẹ gi linẹni riẹnni kwa elu. Ndị bi obodo Susa hụ e yi oro, a ghọghọ.

¹⁶ Nke ndị Ju, ukpẹ e nwunmẹzi, ẹfọ a sụọma wẹ ụsụọ, ịghọghọ lẹ ọghọ e jun.

¹⁷ Imẹ Ẹgbẹrẹ ọwụlẹ lẹ obodo ọwụlẹ, ebe ọwụlẹ iwu eze ru, ndị Ju rịn'a hụ a ghọghọ, ẹfọ hụ a sụọ wẹ ụsụọ, wẹ hụ e ri oriri, e mẹ mmẹmmẹ. Ndị bu ọda wụ ndị alị ọzọ nọ họnrin ndị Ju, makẹni egun ndị Ju rị a tụ wẹ.