Ẹsta 7 - Ika

Isi Nke Ẹsa Ihiẹn Hamanị Te K'e Mẹ Mọdikaya E Mẹ Ẹ

¹ Eze lẹ Hamanị nọ jẹn d'e sọn Alasị wụ Ẹsta ri ihiẹn-oriri.

² Ebe wẹ rịzị a ra manya ụhụọhịn nke ẹbụọ hụ, eze nọzị sị, “Ẹsta Alasị m, k'ị rị a rịọ? M k'e ye y'ẹ. K'ị chọ ni m mẹn'i? Ọsụọn'a ahanmahan alị-eze m rọ, m k'e ye y'ẹ.”

³ Alasị wụ Ẹsta nọ sị, “Omẹni ihiẹn m a sụọghọ eze, omẹni ọ sụọghọ eze, dodo, anịlẹ wẹ gbu m; ịya kẹ m rịọ ị. Dọnmẹ ndị nke m ndụn, ịya wụ ihiẹn m chọ.

⁴ Makẹni, e regụọlẹ wẹ mmẹ lẹ ndị nke m kẹni wẹ tikpọ ẹnyi, gbu ẹnyi, kẹni ẹnyi gụchanrịn. Omẹni orire mmaka kẹ wẹ te re ẹnyi nị ẹnyi wụrụ igbọn, m kẹ m'a gba nkịtịn, makẹni ọhụn ẹlẹ hụn nkẹ m'e gi yemẹ eze nsọngbu.”

⁵ Ya eze wụ Ahazẹrusu nọ jụma Alasị a wụ Ẹsta, “Onyẹ rọ? Elebe kẹ okẹnnyẹ egun nị mẹ ihiẹn nọ ẹrịra rị?!”

⁶ Ẹsta nọ sị a, “Onyẹ-iwe lẹ eṅẹnrẹn hụ wụ eje ịhịannị wụ Hamanị!!” Okẹn egun nọ tụma Hamanị ebẹhụ ya lẹ eze lẹ Alasị a rị.

⁷ Ịya kẹ eze nọ gi ọnụma lihi ọtọ, la manya a tọ, shi imẹ ụgba-obobo hụ wẹ nọ e zu ikẹn rị obi-eze. Hamanị a hụn a nị eze a kwademẹgụọ n'o k'e gbu ẹ, ya ọ nọ nọdị, rịọma Ẹsta wụ Alasị eze n'o dọnmẹ ẹ ndụn.

⁸ Hụn eze gihụ gha ụgba-obobo obi-eze kinhẹn ebẹhụ wẹ nọ e ri oriri, Hamanị rị a tụ enwẹn ẹ ye ocho hụn Ẹsta nọdị. Eze nọ yi, “O k'e mẹrụzịdẹ nwan Alasị m hụnnị mmẹ lẹ okpoho-ịhịan rị imẹ ụlọ ra?!” Hụn okuni gihụ gha eze ọnụ pụ, wẹ nọ kpumẹ Hamanị ihun.

⁹ Habona hụn wụzị odibo-uku eze nọ sị, “Ihiẹn wẹ gi e hogbu ịhịan ojijẹn-elu wụ ụbụkụ isẹn kwasị ọgụn-ẹtọ rị ẹhụ iwe Hamanị. Hamanị te mẹmẹ ẹ n'o gi hogbu Mọdikaya hụn kpu ndị chọ nị wẹ gbu eze oro, zụọpụha eze.” Eze nọ sị “Gi n'ẹ hogbu Hamanị.”

¹⁰ Ya kẹ wẹ nọ gi ihiẹn Hamanị rụntọ n'o gi hogbu Mọdikaya, hogbu Hamanị lẹ enwẹn ẹ. Olulu eze nọ rọ.