Ẹsta 6 - Ika

Isi Nke Isin Eze E Ye Mọdikaya Ọghọ

¹ Ụran eburuni eze uhinhin ahụn. Ọ nọ sị wẹ wẹhẹ ẹkụkwọ wẹ e detọ ihiẹn rị e mẹni, hụn wẹ detu ihiẹn rị e mẹni kete ọ kịmalẹ; ọ sị wẹ d'a gụnn'a ya.

² Wẹ nọ hụn ebe wẹ detọ a ebẹhụ nị Mọdikaya kpu madụ ẹbụọ oro, Big'tana lẹ Tereshi ndị idibo-uku eze e chen'ẹ ọnụmụzọ, ndị zu umẹ nị wẹ gbu eze wụ Ahazẹrusu.

³ Ya eze nọ sị, “Elee ọghọ kẹ wẹ ye Mọdikaya? Kị wẹ gi ghọsị n'o mẹ okẹn ihiẹnni?” Ndị e jẹnn'ẹ ozi sị a, “Onwọnni ihiẹn wẹ mẹn'ẹ.”

⁴ Eze nọ jụma wẹ, “Onyẹ rị ezi-ọgwa ibuzọ hụ?” Hamanị banhangụhụ ezi-ọgwa ahụn w'e bu ụzọ e ru imẹ obi-eze, n'o d'a gwa eze oku ihogbu Mọdikaya elu ihiẹn nwẹn ọ rụntọn'a.

⁵ Ndị hụ e jẹnni eze ozi nọ sị, “Hamanị rọ.” Eze nọ sị wẹ, “Ya banhan.”

⁶ Ogẹn Hamanị gi banhan, eze nọ jụ a, “Kịnị kẹ wẹ k'e mẹni onyẹ eze chọ n'o ye ọghọ?” Hamanị nọ sị enwẹn ẹ, “Onyẹ kẹ eze k'e yezi ọghọ karị mmẹ?”

⁷ Ya ọ nọ sị eze, “Omẹni eze chọn'o ye ịhịan ọghọ,

⁸ ya sị wẹ wẹhẹ ẹwuru-nze hụn o mẹni eze lẹ enwẹn ẹ e yiọlẹ mbụ lẹ ẹshin hụn o mẹni eze e nyinọlẹ mbụ, wẹ kpumẹ ẹshin hụ okpu-eze isi;

⁹ Wẹ we ẹwuru hụ lẹ ẹshin ahụn che ẹka onyẹ kachanrịnnị imẹ ndị-isi eze. Wẹ yimẹ okẹnnyẹ hụ eze chọ n'o ye ọghọ ẹwuru hụ, e bu w'ẹ che elu ẹshin hụ, we ẹ ghahunmẹ ọgbara-ogbe ile rị obodoni, a hị, ‘Lee ni ihiẹn wẹ e mẹni onyẹ eze chọ n'o ye ọghọ!’ ”

¹⁰ Ịya kẹ eze nọ sị Hamanị, “Jẹnmẹ ozigbo: d'e wẹhẹ ẹwuru hụ lẹ ẹshin ahụn, n'i mẹni Mọdikaya onyẹ Ju hụn a rụn ọrụn ọnụ-mgbọn m k'i dọn ku. Y'e nwọnkwọlẹ hụn k'a pụn'a imẹ ihiẹn ile i ku.”

¹¹ Hamanị nọ weri ẹwuru hụ lẹ ẹshin ahụn; o yimẹ Mọdikaya ẹwuru hụ, Mọdikaya a nọdị elu ẹshin, Hamanị nọ duru ẹ ghagbarị ọgbara-ogbe ile rị obodo hụ, a hị, “Lee ni ihiẹn wẹ e mẹni onyẹ eze chọ n'o ye ọghọ!”

¹² Omẹgụ, Mọdikaya nọ lakin ọnụ-mgbọn eze. Kanị Hamanị a lakin iwe ẹ, ụya e ru ẹ isi —

¹³ ọ nọ gwa nwunyẹ ẹ wụ Zẹrẹshi lẹ ndị ọwụ a ihiẹn ile mẹn'ẹ. Ndị a dụn a ọdụn lẹ Zẹrẹshi nwunyẹ ẹ nọ sị a, “Omẹni onyẹ Ju kẹ Mọdikaya wụ bụ oku ẹ e gbumẹgụọlẹ ị, onwọnni nwan ihiẹn i k'a saẹka mẹ ẹ — n'o mẹdẹ i nwan dangungwọn!”

¹⁴ Ebe wẹ nọkwọ e du ẹ e ku oku hụ, idibo-uku eze nọ bịa, wẹ nọ weri Hamanị ozigbo shi oriri hụ Ẹsta kpọ wẹ.