Ẹsta 5 - Ika

Isi Nke Isẹn Eze A Nabanhan Ẹsta

¹ Hụn mẹ akpọ ụhụọhịn ẹtọ, Ẹsta nọ yiri ẹwuru-nze ẹ, wuzo ezi-ọgwa rị imẹ-imẹ obi-eze ebẹhụ, nchetarị ihun ebe eze a nọdị a hụn ịhịan. Eze nkẹ nọdị elu ukpo-eze ẹ, bu ihun zinmẹ ọnụmụzọ.

² Ogẹn o gi hụn Alasị a wụ Ẹsta k'o wuzo ihun ezi hụ, ọ nọ bu ọkpọ goru rị a ẹka zinmẹ ẹ. Ẹsta nọ jẹnhẹn, mẹtụ ọnụnụ ọkpọ hụ ẹka.

³ Eze nọ jụ a, “Ẹsta, kị rọ, Alasị m? K'ị chọ? Ọ sụọn'a ahanmahan alị-ezeni rọ, m k'e ye y'ẹ.”

⁴ Ẹsta nọ sị eze, “Agụ! Omẹni ọ hụghọ Agụ mma, Agụ ya dodo wẹhẹ Hamanị tannị d'e sọn Agụ ri ihiẹn-oriri m mẹmẹni Agụ.”

⁵ Eze nọ sị, “Sị nị Hamanị bịa ozigbo-ozigbo, nị ẹnyi d'e mẹ ihiẹn Ẹsta rịọ!” Omẹgụ eze lẹ Hamanị nọ jẹn d'e ri oriri Ẹsta kpọ wẹ.

⁶ Ebe wẹ rị a ra manya, eze nọzị jụma Ẹsta, “Kị rị a rịọ nwan? M k'e ye y'ẹ. K'ị chọ? Ọsụọn'a ahanmahan alị-ezeni rọ, m k'e ye y'ẹ.”

⁷ Ẹsta nọ sị, “Ọnwan wụ ihiẹn m rị a rịọ, ịya kẹ m chọ:

⁸ Omẹni ihiẹn m a sụọghọ Agụ, omẹni ọ hụghọ mma ẹnya Agụ n'o ye m ihiẹn m rị a rịọ, mẹni m ihiẹn m chọ, Agụ lẹ Hamanị wẹ bịazị d'e ri oriri eki; m k'a nọ ebẹhụ za Agụ ihiẹn ọ rị a jụ m.”

Hamanị A Kwademẹ N'o Gbu Mọdikaya

⁹ Ogẹn Hamanị gi gha nke Ẹsta pụkọ ụhụọhịn ahụn, ẹfọ hụ a sụọ a ụsụọ, ẹhụ hụ a tụ a. Kanị ogẹn o gi hụn Mọdikaya ọnụ-mgbọn eze, hụn a n'o lihinin'ẹ ọtọ, o yeni ẹ ọghọ kaka, iwe Mọdikaya nọ we Hamanị ọda-ọda.

¹⁰ Kanị Hamanị nọ kwọndọn enwẹn ẹ, lashi iwe ẹ. O ru ẹ, ọ nọ kpọkwama ndị ọwụ a lẹ nwunyẹ ẹ wụ Zẹrẹshi.

¹¹ Ọ nyanma ishi, gwama wẹ k'o hihan ọdanfịn, k'ọ mụhan ikẹnnyẹ, kẹ eze dọn e yesọnmẹ ẹ ọghọ, k'o dọn bushi ẹ elu karị ndị-isi ile lẹ ndị-ọrụn ile.

¹² Hamanị sịzị, “Ẹlẹdẹ ọhụn sụọ, mmẹ sụọ kẹ Ẹsta wụ Alasị kpọ d'e sọn eze ri oriri ọ kpọ tannị! Ọ sịzị m nwan sọnhẹn eze oriri ekile!!

¹³ Kanị ihiẹn ndịnị ile enwọn ihiẹn wẹ wụ ẹnya m m gha a hụn onyẹ Ju ahụn wụ Mọdikaya k'ọ rị ọrụn ọnụ-mgbọn eze.”

¹⁴ Ya nwunyẹ ẹ wụ Zẹrẹshi lẹ ndị ọwụ a hụ ile nọ sị a, “Rụn ebe wẹ nọ e hogbu ịhịan: ojijẹn-elu ẹ k'a wụ ọb'ụkụ mmisẹn kwasị ọgụn-ẹtọ (75). Ụtụntụn ekile y'a gwa eze n'ọ sị wẹ gi ẹ hogbu Mọdikaya, kẹni ẹfọ sụọma ị ụsụọ nị ị sọnjẹn eze oriri hụ.” Iroroni wẹ tụ sụọ Hamanị ụsụọ, ọ nọ kpọ ndị a rụnn'a, wẹ nọ rụnn'a ebe wẹ nọ e hogbu ịhịan.