Ẹsta 4 - Ika

Isi Nke Ẹnọ Mọdikaya E Sị Ẹsta N'o K'e Yerịrị Ẹka

¹ Ogẹn Mọdikaya gi marịn ihiẹn ile rị e mẹni, ọ nọ tika ẹwuru ye enwẹn ẹ olu, yiri ẹkpa-mkpụrụ wẹ gi a kwan ụya, kpọn ntụn kpu enwẹn ẹ, shi imẹ obodo hụ, e goo, a kwan ụya.

² Kanị ọnụ-mgbọn eze sụọ k'ọ sa ẹka jẹnru, makẹni w'a ra nị ịhịan yiri ihiẹn wẹ gi a kwan ụya banye obi-eze.

³ Azụụn ọwụlẹ iwu eze ru, ndị Ju rị ebẹhụ a kwanma ụya, e bu ọnụ, a kwan ẹkwan, e goo. Ndị bu ọda imẹ wẹ e yiri ẹkpa-mkpụrụ wẹ gi a kwan ụya, dinẹsọnmẹ ikpọn-ntụn.

⁴ Ogẹn ịgbagba Ẹsta lẹ idibo-uku ndị hụ wẹ wara hụn e jẹnn'ẹ ozi gi gwa Ẹsta oku Mọdikaya, ọ nọ fụ a ọda-ọda. Ọ nọ kịye wẹ ẹwuru jẹnni Mọdikaya n'o yiri, kẹn'ọ gbụpụ ẹkpa-mkpụrụ hụ ọ rị e gi a kwan ụya; kanị Mọdikaya ekweni yiri ẹwuru ndị hụ.

⁵ Ya kẹ Ẹsta nọ kpọ Hatakị, onyẹ ohu imẹ idibo-uku eze ndị hụn eze hanyeni Ẹsta n'ọ hụn ụzọ e jẹnn'ẹ ozi. Ẹsta nọ zi Hatakị d'a jụ Mọdikaya kẹ kị rọ? Kị haịn?

⁶ Ya Hatakị nọ jẹn d'e kunrun Mọdikaya ebe ọ rị ebe wẹ nọ e zu imẹ obodo hụ, ihun ọnụ-mgbọn eze.

⁷ Mọdikaya nọ gwa a ihiẹn ile mẹn'ẹ, gwapụ a ọnụ-egho Hamanị kwe nkwa n'o k'a kuye ẹkpa eze, kẹni wẹ gbuchanrịn ndị Ju.

⁸ Mọdikaya nọzị ye Hatakị ẹhụhụọ wẹ gi de iwu eze hụ imẹ Susa, sị wẹ gbuchanrịn ndị Ju, ọ sị Hatakị d'a ghọsị Ẹsta ya, ya kọwan'a ya; ya gwashi Ẹsta ikẹn ya jẹn ebe eze rị d'a rịọdọnni ndị nke wẹ.

⁹ Hatakị nọ kin azụụn d'a gwa Ẹsta ihiẹn Mọdikaya ku.

¹⁰ Ẹsta nọ zi ẹ d'a sị Mọdikaya,

¹¹ “Ndị ile wẹ lẹ eze gba a rụn lẹ ndị ile rị Azụụn ile eze rị a kị a marịngụọ nị iwu ohu sụọ kẹ wẹ gi e sọn okẹnnyẹ mọbụ okpoho ọwụlẹ jẹn imẹ ọgwa hụ rị imẹ d'e kunrun eze bụ eze akpọn'a: wẹ k'e gburịrị hụnyẹ, mmanị eze bu ọkpọ siliva a zinmẹ onyẹ hụ, ya wụ onyẹ hụ a hụn isi. Mmẹ nwẹn, o zugụọdẹ nwan akp'ọhịn iri kwasị ọgụn kete wẹ kpọlẹ m, kete m jẹnlẹ d'a hụn eze.”

¹² Ogẹn wẹ gi gwa Mọdikaya ihiẹn Ẹsta ku,

¹³ Mọdikaya nọ zikin wẹ d'a sị a, “Erokwọlẹ nị wẹ k'e gbuchanrịn ndị Ju yụ nwẹn a wanahịn makẹni ị rị iwe eze!

¹⁴ Ịgba nkịtịn ogẹnni, eyemẹka lẹ nzụọpụha k'a gha ụzọ ọzọ bịanị ndị Ju — kanị ịyụ lẹ ikpụlọ nẹdi i k'a la iwi. Onyẹ marịndẹ nwan kẹ ogẹn nọ ẹnịna haịn i gi nwọn ọkwanị i nwọn nke eze?”

¹⁵ Ẹsta nọ zikin wẹ d'a sị Mọdikaya:

¹⁶ “Jẹn d'a kpọkwama ndị Ju ile rị imẹ Susa, ụnụ e buni m ọnụ — erilẹ ni, aralẹ ni — akpọhịn ẹtọ, kẹ uhinhin kẹ efinnaị; mmẹ nwẹn lẹ ịgbagba ndịnị e feni m k'e buzikwọ ọnụ kẹ ụnụ dọn rị e bu. O mẹgụ, m k'e jẹn d'e kunrun eze, ọ sụọn'a nị ịdan iwu rọ. Omẹni ọnwụn rọ, a nwụn m.”

¹⁷ Mọdikaya nọ pụ d'e mẹ ihiẹn Ẹsta sị a mẹ.