Ẹsta 3 - Ika

Isi Nke Ẹtọ Hamanị A Mamanị Ndị Ju Ọnwụn

¹ O mẹgụ, eze wụ Ahazẹrusu nọ bushi Hamanị nwa Hamẹdata hụn wụ onyẹ ebọn Agagị elu, ye ẹ ocho lẹ ọkwa kachanrịn nke ndị-isi ile họdụnị.

² Ndị-isi ọrụn eze ile rị ọnụ-mgbọn obi-eze a rụn ọrụn nọ gbumẹni Hamanị osekpu, e ye ẹ ọghọ, makẹni ịya kẹ eze sị wẹ e mẹn'ẹ. Kanị Mọdikaya ekweni gbun'ẹ osekpu mọbụ ye ẹ ọghọ.

³ Ya kẹ ndị-isi ọrụn eze ndị hụ a nọ ọnụ-mgbọn eze a rụn nọ jụma Mọdikaya, “Kị haịn i gi a pa oku eze?”

⁴ Wẹ hụ a gwa a ihiẹnni ụhụọhịn-ụhụọhịn, kanị o gọnni wẹ ntịn. Ya wẹ nọ gwa Hamanị, nị wẹ marịn kẹ wẹ k'e yeni Mọdikaya efe; wẹ mẹ ẹrịra makẹni Mọdikaya a gwagụọ wẹ n'ọ wụ onyẹ Ju.

⁵ Mgbe Hamanị gi hụn a nị Mọdikaya a rị e gbun'ẹ osekpu mọbụ ye ẹ ọghọ, olulu nọ jun ẹ obi.

⁶ Makẹni a gwagụọ w'a onyẹ alị Mọdikaya wụ, ọ nọ sị ẹfọ ejunkọ a o gbu Mọdikaya sụọ. Ọ nọ chọma ụzọ o k'e gi gbuchanrịn ndị nke Mọdikaya ile, ndị Ju ile rị alị-eze Ahazẹrusu.

⁷ Imẹ ahụa nke mmẹbụọ eze wụ Ahazẹrusu kịma, imẹ ifọn nke ibuzọ hụ wụ ọnwan Nisanị, wẹ nọ gi Puri hụn wụ ịtụ-mkpọ gi uri-uri họye Hamanị ụhụọhịn lẹ ifọn o k'e gi mẹ ihiẹn o romẹni ndị Ju. Mkpọ wẹ tụ hanrịn ụhụọhịn nke mmẹtọ imẹ ifọn nke mmẹbụọ, ọnwan Ada.

⁸ Ya Hamanị nọ sị eze wụ Ahazẹrusu, “O nwọn ndị rị ichẹn hụn rị imẹ igunrun alị ichẹn-ichẹn Azụụn ile rị alị-eze i. Ọdịnanị wẹ rị ichẹn ebe nke alị ndị ọzọ ile rị, w'ara dọnmẹ iwu eze. Ọ rịnị mma nị eze gba wẹ nkịtịn.

⁹ Omẹni ọ sụọghọ eze, ya ti iwu nị wẹ gbuchanrịn wẹ. M k'a kụ ndị hụ ọrụnnị k'a rị ẹka wẹ ẹkpa-siliva-uku nnụ-uku iri (10,000) hụn wẹ k'a kụye ẹkpa eze rịsọnmẹ wẹ ẹka.”

¹⁰ Eze nọ gbụpụha ọla mkpịnsịn ẹka o gi e biye ẹka ihiẹn o de, we ẹ ye Hamanị nwa Hamẹdata onyẹ ebọn Agagị, Hamanị eṅẹnrẹn ndị Ju.

¹¹ Ọ nọ sị Hamanị, “La oku egho tọ; mẹ ndị hụ k'ọ sụọ ị.”

¹² Nke akp'ọhịn mmẹtọ imẹ ifọn ibuzọ hụ, wẹ nọ kpọ ndị akanwe eze. Wẹ nọ de ihiẹn Hamanị sị ndị ọkịkị ile mẹ — kẹ ndị a nọkin ẹnya eze Azụụn ichẹn-ichẹn kẹ ndị gọvanọ Azụụn ichẹn-ichẹn kẹ ndị-isi kị ndị alị ichẹn-ichẹn. Hamanị sị wẹ gi mkpụrụ-ẹkụkwọ Azụụn ichẹn-ichẹn gi e de ihiẹn deni wẹ ịya, gizi asụsụ alị ichẹn-ichẹn rị azụụn hụ deni ndị ọwụlẹ ya. Ẹfan eze wụ Ahazẹrusu kẹ wẹ gi de ihiẹn hụ, gi ọla mkpịnsịn ẹka o gi e biye ihiẹn ẹka biye ẹ ẹka.

¹³ Wẹ nọ we ẹkụkwọ-ozi ndị hụ yesọnmẹ ndị-ozi a gba ọsọ, e weri wẹ ozini ghagbarị Azụụn ile Ahazẹrusu rị a kị, a sị ịhịan ile wẹ gi akp'ọhịn ohu, nke akp'ọhịn mmẹtọ imẹ ifọn nke mmẹbụọ, hụn wụ ọnwan Ada, tikpọ ndị ju ile, gbuchanrịn wẹ — kẹ ikoro kẹ ndị ẹgẹdi, kẹ ikpoho kẹ ụmụ-ẹka; ọ sịzịkwọ wẹ kwarịchanrịn ihiẹn wẹ.

¹⁴ Wẹ sịzị wẹ tini ndị rị Azụụn ọwụlẹ Iwu hụ wẹ de imẹ ẹkụkwọ-ozi hụ, mẹ ndị alị ọwụlẹ marịn, kẹni wẹ kwademẹ cheri ụhụọhịn hụ.

¹⁵ Ndị ọsọ hụ nọ jẹnmẹ ozigbo-ozigbo kẹ eze dọn gwa wẹ; wẹ nọzịkwọ ti iwu hụ imẹ obodo Susa hụ eze nọ a kị. Eze lẹ Hamanị a nọdị alị a ra manya kanị isusu hụ obodo Susa.