Emọsụ 9 - Ika

Isi Nke Itenẹi Ihiẹn Osolobuẹ K'e Mẹ Izrẹlụ

¹ M hụn Osolobuẹ ebe o wuzo ẹhụ ukpo nchụn-ẹjan. Ọ nọ sị, “Gi ihiẹn fịansọnmẹ isi-adansụn ndị rị ihun Ụlọ-nsọ, d'e ru ni ọnụmụzọ e mẹhunmẹ. Mẹ wẹ dankpọsọnmẹ isi ndị alịnị ile; e gi m ọpịa-agha gbu ndị họdụnị; onwọnni onyẹ m k'a nị gbapụ, onwọnni onyẹ m k'a nị wanahịn.

² Wẹ tụdẹ ọnụ shi alị-mmọn, m k'a dọkpụnpụha wẹ ebẹhụ; ọsụọn'a nị wẹ nyinshi elu-igwee, m sikọ d'a gha ebẹhụ dọtu wẹ.

³ Ọsụọn'a elu Ugu Kamẹlụ, m k'a chọ wẹ ru ebẹhụ kpụnrụn wẹ; wẹ hụarị akpakalị ohimin amamgbe m'a hụn we, m k'a sị agwọ ta wẹ.

⁴ Ọsụọn'a nị ndị iṅẹnrẹn e mẹri wẹ kpụnshi wẹ alị ọzọ, m k'a sị ọpịa-agha gbu wẹ ebẹhụ; m k'e bu ẹnya zinmẹ wẹ, elekọ m ẹnya hụn m'e gi mẹyeni wẹ, kanị hụn m'e gi mẹshi wẹ ikẹn.”

⁵ Di-nwọnni-ẹnyi Osolobuẹ ihiẹn ile rị okpuru ẹ, onyẹ hụn e mẹtụ ụwa ẹka, ọ rịnranpụ, ndị ile rị imẹ ẹ a kwanma, alị lẹ enwẹn ẹ e buli kẹ Iyi Naịlị, buli, ziẹnban, nọkẹ Iyi Naịlị Ijiptu;

⁶ Di-nwọnni-ẹnyi hụn tụn mmughẹ-elu ẹ ye elu-igwere, gbe iyetọ a ye elu ụwa; Onyẹ hụn a kpọ mirin ohimin oku, e hu ẹ e kpu elu ụwa — Ẹfan a wụ Osolobuẹ:

⁷ Ọ sị: Ẹnya m, kị rịdẹ nwan ichẹn imẹ ụnụ ndị Izrẹlụ lẹ ndị Ẹtiopịa? Mmẹ gha alị Ijiptu wepụha ndị Izrẹlụ, ẹlẹ ịya? Kanị mmẹ ghazị alị Kaftọ wepụha ndị Filistia; mmẹ ghazị alị Kiri wepụha ndị Aram.

⁸ “Ile kẹ Di-nwọnni-ẹnyi Osolobuẹ e lee alị-ezeni rị e mẹ njọ. M k'e tikpọ a, wepụ a elu ụwa, kanị, etikpọchanrịnkọ m ikpụlọ Jekọpụ ile.” Osolobuẹ e kugụọ a!

⁹ “M k'a sị wẹ mẹ wẹ ihiẹn ẹ, e gi m alị ndị ọzọ ile zinzin Izrẹlụ, kẹ w'e gi adana e zinzin ọka, onwọnni ẹfịfịa k'a ghafeni.

¹⁰ Wẹ k'e gi ọpịa-agha gbuchanrịn ndị nke m ile e mẹ njọ, ndị hụn a sị, ‘Eje-ihiẹn erukọ ẹnyi ẹhụ, o kunrunkọ ẹnyi.’

Osolobuẹ K'e Welizi Ukpo-eze Defidi Lẹ Alị Izrẹlụ

¹¹ “O ru ogẹn hụ, m jẹnkọ d'e weli ụlọ Defidi dannị, tụnkinchanrịn ebe ile oghe rị; a rụndọnzi m ebe ile tikpọnị, a tụn m'a, ọ rịzị k'ọ rị mbụ,

¹² kẹni wẹ nwọnrin ndị ile họdụ imẹ alị Ẹdọm lẹ alị ndị ọzọ ile k'a za ẹfan m.” Osolobuẹ hụn k'e mẹ ihiẹnni e kugụọ a.

¹³ Osolobuẹ sị, “Ezioku-ezioku, ihiẹn jẹnkọ d'a rịzị mma; ọka e jun bụ ogẹn ọka eke ru; vaịnị lẹ manya a e jun bụ ogẹn vaịnị eke ru. Vaịnị lẹ manya vaịnị a sụọnị e jun elu-ugu, manya vaịnị e huru elu-òke ile.

¹⁴ M k'e wekinhẹn ndị nke m wẹ kpụnrụn alị wẹ; a tụndọnzi wẹ obodo wẹ ile tikpọnị, birisọnmẹ imẹ wẹ. Wẹ k'a kụn vaịnị, ra manya a; wẹ k'a rụn ugbo, ri ihiẹn rị imẹ ẹ.

¹⁵ M jẹnkọ d'a kụn Izrẹlụ ye alị wẹ, onwọnni ogẹn wẹ e gi bụpụzị wẹ alị hụn m ye wẹ.” Osolobuẹ wụ Chuku ụnụ e kugụọ a!