Emọsụ 8 - Ika

Isi Nke Ẹsatọ Ụkpalị Mkpụrụ-osisi Channị

¹ Ọnwan wụ ihiẹn Di-nwọnni-ẹnyi wụ Osolobuẹ ghọsị m: Ọ ghọsị m ụkpalị mkpụrụ-osisi channị.

² Ọ nọ sị, “Emọsụ, kị ị rị a hụn?” M nọ sị, “Mkpụrụ osisi channị hụn rị imẹ ụkpalị.” Ya kẹ Osolobuẹ nọ sị m, “Gi ẹ marịn nị ọgụgụ e kunrunọlẹ ndị nke m ndị Izrẹlụ: ahatukọzị m wẹ, m k'e yerịrị wẹ afụnfụn njọ wẹ.

³ Osolobuẹ sị, ‘O ru ogẹn hụ, ẹkwan jẹnkọ d'a nọkin ẹnya ẹbụ imẹ Ụnọ-NSỌ. Ozun ịhịan k'e jun — fiẹnrin ebe ile! Alị k'e mẹ hịaị!’ ”

⁴ Nụ nị ọnwan, ụnụ ndị hụn a zọgbu ndị ẹka rulẹni, e nutu ndị igbẹnnyẹ rị alịnị,

⁵ a sị, “Mmẹmmẹ Ifọn gi pụ ya mẹdẹ nwan n'ọ gụ, nị ẹnyi hụn ụzọ re ọka ẹnyi! Ụhụọhịn Ezumikẹn ya mẹdẹ nwan n'ọ gụ, nị ẹnyi d'e remẹzi ọka! Ẹnyi k'e bebelụa mkpu ẹnyi, bushi ọnụ a elu, gidẹ eje-mkpu zụ afịa-mmẹgbu;

⁶ ẹnyi k'e ṅọn ndị-igbẹnnyẹ nru-ọnụ, gi ọnụ akpụkụ ṅọnrin ndị elu rị a fụ, gwọgbama ọka lẹ ẹfịfịa a re.”

⁷ Osolobuẹ e kunọlẹ enwẹn ẹ, sị, “Makẹ mpacheni ụmụ Jekọpụ rị a pache, onwọnni eje-ihiẹn ọwụlẹ wẹ mẹ m k'a zọ!

⁸ Ẹlẹ ọnwan haịn alịnị k'e gi mẹhunmẹ onyẹ ọwụlẹ rịn'a a kwan ụya? Alị k'e buli kẹ Iyi Naịlị, o k'e buli kẹ Iyi Naịlị, ziẹnban.”

⁹ Di-nwọnni-ẹnyi wụ Osolobuẹ sị, “O ru ogẹn hụ, m k'e mẹ anwụn dan ogẹn efinaị, mẹ ọhịhị gba elu-ụwa ebe eki rị elu.

¹⁰ M k'a napụ ụnụ oriri ụnụ, ye ụnụ ẹkwan, napụ m ụnụ ẹbụ, ye ụnụ ịkwan-ụya. M k'e mẹ ụnụ ile yirisọnmẹ ẹkwa-achọ, mẹ ụnụ ile kpụnpụ ntutu. M k'e mẹ ẹ n'ọ rịkẹ ebe wẹ rị a kwan akpụ nwa-okẹnnyẹ ohu; eje-ogẹn e lu ilu k'o k'a wụ!”

¹¹ Di-nwọnni-ẹnyi Osolobuẹ sị, “Ogẹn lalarịrị hụn m k'e gi zi ụnwụn ye alịnị: ẹlẹ ụkọ ihiẹn-oriri mọbụ ụkọ mirin, kanị ụkọ oku-Osolobuẹ.

¹² Wẹ k'a rị a wahunmẹ, a gha ohimin a pụ ohimin; a gha ẹbamịn-ugu e shi ẹbamịn ọwụwa-ẹnyanwụn, a gbajẹn, a gbalụa, a chọhunmẹ oku Osolobuẹ, kanị ahụnkọ w'a.

¹³ O ru ogẹn ahụn, ịgbagba magbu enwẹn wẹ mma lẹ ikorọbịa sikọ d'a sọhị yeni ẹgụn-mirin;

¹⁴ uwẹ ile hụn a rụa mmọn, mmọn ndị ahụn ikpe gi ma obodo Sameria: a sị ‘Ma mmọn rị Danị’, a sị ‘Ma mmọn rị Biẹshẹba’. Wẹ k'a dan, danchanrịn.”