Emọsụ 5 - Ika

Isi Nke isẹn Rogharịnị Kẹni Ụnụ Rị Ndụn

¹ Ndị Izrẹlụ, gọn ni ntịn! Gọn ni ntịn ẹbụ m gi a kwan ụnụ:

² “Ọ dangụọ! Nwagbọọ wụ Izrẹlụ Ẹbamịn-ugu a dangụọ; o lihikọzị! A jụgụọ w'a tọ imẹ alị a, onyẹ k'e welin'ẹ arịa!”

³ Di-nwọnni ẹnyi Osolobuẹ e kuọl'a, sị, “Imẹ Izrẹlụ, obodo k'a kịrị ndị-agha nnụ-uku jẹn agha, kanị madụ ọgụn-isẹn sụọ k'a lụaha; hụn kị ndị-agha ọgụn isẹn jẹn agha, madụ iri sụọ k'a lụaha.”

⁴ Kanị Osolobuẹ sịzị ndị Izrẹlụ, “Chọburuhẹkwọ nị m kẹni ụnụ rị ndụn.

⁵ Agbajẹnzilẹ ni Bẹtẹlụ; abanyezilẹ ni Gil'galụ; efezilẹ ni mgbọn e shi Biẹshẹba. Makẹni, wẹ k'e mẹri Gil'galụ; wẹ k'a kpụnrịrị ndị Gil'galụ shi alị ọzọ; Bẹtẹlụ awụkọzị ihiẹn ọwụlẹ.”

⁶ Chọburukwọ nị Osolobuẹ kẹni ụnụ rị ndụn, amamgbe o nwunrun kẹ ọkụn imẹ ikpụlọ Josẹfụ — ọkụn hụn k'e bu obodo Bẹtẹlụ ri, onwọnni onyẹ sikọ d'a sa ẹka tinyụnn'a!

⁷ Ụnụ! Ụnụ ndị rị e mẹ ezigbo eṅẹn e lugbu enwẹn ẹ ilu, a tụ ezi-omumẹ e ye alị!

⁸ Onyẹ hụn ke kokisẹ rị igwere, hụn wụ Pleyadẹsi lẹ Oriọnụ; ịya e gi mkpọkịkị e họnrin ụtụntụn, e gi efinnaị e họnrin abalị. Ịya a hị mirin rị ohimin oku, we ẹ hukpu akpak'alị!! Osolobuẹ wụ ẹfan a!!

⁹ Ịya wụzị onyẹ hụn e tikpọ dikẹn idẹnmizi, e gungwọnpụ ebe a fụ ọrụn ọbanye o gi dọn ẹnya.

¹⁰ Onyẹ jụgbọ wẹ lẹ ntụ wẹ ọgwa ize ẹ a ban wẹ; onyẹ ku ezioku, ize ẹ e zemẹ wẹ.

¹¹ Ebe ụnụ rị a zọ ndị igbẹnnyẹ ụkụ isi, a sị wẹ tụnị ụnụ ọka, ụnụ ebikọ ezigbo ụlọ ndị ahụn ụnụ gi ọmụma wẹ chọ mma tụn! Ụnụ arakọ manya alị-vaịnị ndị ahụn rịgbu enwẹn ẹ mma hụn ụnụ rụn;

¹² makẹni a marịnghọ m isi ile ụnụ rị e nupụ lẹ okẹn njọ ụnụ rị e mẹ — kẹ ụnụ dọn e mẹshi ndị ezi-omumẹ ikẹn, a narịn egho-azụụn, a napụ ndị ẹka-rulẹni ihiẹn runi wẹ ọgwa.

¹³ Ya wụ, onyẹ nwọn uche a gba nkịtịn ogẹn nọ ẹnịna, makẹni eje-ogẹn rọ.

¹⁴ Lịlịma nị mẹmẹ ihiẹn rị mma, ẹlẹ eje-ihiẹn kẹni ụnụ hụn ụzọ rị ndụn; kẹni Osolobuẹ, Chuku ihiẹn ile rị okpuru ẹ, hụn ụnụ sị n'ọ nọyeni ụnụ, hụn ụzọ nọyeni ụnụ nke-esi.

¹⁵ Eje-ihiẹn ya zemẹ ụnụ ize; ihiẹn rị mma ya sụọma ụnụ; hụn n'a nị w'a han ezigbo eṅẹn ọgwa. Ikẹnkwọ Osolobuẹ, Chuku ihiẹn ile rị okpuru ẹ e gi ufiri ẹ mẹ omikẹn ụnụ, ụmụ Josẹfụ họdụnị.

¹⁶ Makẹ njọ ndị Izrẹlụ, Osolobuẹ, Chuku ihiẹn ile rị okpuru ẹ, sị, “Wẹ k'a rị e goo imẹ ughere ile; wẹ k'a rị a kwan ‘Ụya! Ụya!!’ ọgbara ogbe ile; Wẹ k'a kpọ ndị-ugbo d'a kwan ẹkwan, sị ndị ma kwan ụya d'e gomẹ.

¹⁷ Wẹ k'a rịdẹ a kwan ụya alị-vaịnị ile, makẹni m k'e mẹ ụnụ ile ihiẹn.” Osolobuẹ e kugụọ a!

¹⁸ Nsọngbu rị e che ụnụ ndị rị a sị ụhụọhịn Osolobuẹ ya bịakẹnrin! Kị ụnụ rịdẹ a chọnị n'ọ bịakẹnrin? Ọbịbịa a k'e wẹhẹkwọ ishi, ẹlẹkwọ ukpẹ!

¹⁹ Nọkẹ ebe ịhịan gbakọnị ẹwọrọ, gbakunrun eje-anụ wụ biẹ mọbụ ebe ịhịan nọ ban imẹ ụlọ, bu ẹka kwasị ẹhụ-ẹjan, agwọ a ta a.

²⁰ Y'a marịn nị ishi kẹ ọbịbịa Osolobuẹ k'e wẹhẹ, ẹlẹ ukpẹ? Nị ụya k'o k'e wẹhẹ, ẹlẹ olilẹnya?!

Ẹlẹ Mmẹmmẹ Kẹ Osolobuẹ Chọ

²¹ “Mmẹmmẹ ụnụ e ze m ize; iko nsọ ụnụ e zu ara sụọ m.

²² Ọsụọn'a nị ụnụ a chụnyesọnmẹni m ẹjan w'a dụn ọkụn lẹ oyiye ọka, anarịnkọ m'a; efeyekọdẹ m ẹnya anụ ndị ahụn wẹ zụntọ ụnụ gi a chụnyeni m ẹjan-ekele.

²³ “Bupụ nị nị m ẹbụ mkpọtụ ndịnị ụnụ rị a bụ! Egọnkọ m ntịn egu ndị ahụn ụnụ a kpọ ọsụọn'a n'ọ sụọgbu enwẹn ẹ ụsụọ!

²⁴ “Kama, nị nị ezigbo eṅẹn humẹ kẹ mirin, ezi-omumẹ ya humẹ kẹ mirin iyi ghalẹni a tahị.

²⁵ “Ndị Izrẹlụ, gwadẹle ni m: mmẹ kẹ ụnụ chụnyeni ẹjan lẹ oyiye ọrọgbọ ahụa ọgụnnaị ahụn ụnụ nọdị imẹ atụ ra?

²⁶ Ụnụ sikọ d'e heri eze ụnụ ahụn wụ mmọn Sakutu lẹ mmọn okokisẹ ahụn wụ Kaịwanị hụn ụnụ kpụrụ,

²⁷ e gi m ufiri ẹ dupụ ụnụ alị ụnụ, we ụnụ fetu Damaskọsụ, shi alị ọzọ.” Osolobuẹ hụn ẹfan a wụ Chuku ihiẹn ile rị okpuru ẹ e kugụọ a.