Emọsụ 4 - Ika

Isi Nke Ẹnọ Isi-akwanran Ndị Izrẹlụ

¹ Gọn ni ntịn, nị onyẹnnyẹ efin Bashanị kẹ ụnụ wụ, ụnụ, ikpoho bi ugu Sameria. Ụnụ ndị a bịangbu igbẹnnyẹ, e gwekpọ ndị ẹka wẹ rulẹni. Ụnụ ndị a sị ndị di ụnụ, “Wẹhẹ manya nị ẹnyi ra!”

² Di-nwọnni-ẹnyi wụ Osolobuẹ, e kungụọ ihiẹn ile o gi rị nsọ, “Eje-ogẹn lalanị ụnụ: ogẹn wẹ k'e gi ukpo kọnrin ụnụ wepụ, gi ukpo azụn kọnrinchanrịn ụnụ ile.

³ Wẹ k'a gha ebe wẹ tikpọsọnmẹ mgbọn dupụ ụnụ, tụ ụnụ ye ibẹka Ugu Hẹmọnụ.” Osolobuẹ e kugụọ a.

⁴ “A bịakwọ nị Bẹtẹlụ d'e mẹ njọ; a bịakwọ nị Gil'galụ d'e mẹwaye njọ hụ! E wẹhẹ ni ẹjan d'a chụn ụtụntụn ile! A kụkwọ nị ụzọ-ohu-imẹ-ụzọ-iri ụnụ, a kụ n'a akpọhịn ẹtọ-ẹtọ.

⁵ E wẹhẹkwọ nị brẹdi wẹ buche yisti ụnụ gi e ye ekele! E ye ni oyiye gha ụnụ obi pụha, a gwa ịhịan ile ya. E mẹchanrịnnị wẹ ile, ndị Izrẹlụ Ẹbamịn-ugu makẹni ịya wụ ihiẹn a sụọnị ụnụ!” Ya kẹ Osolobuẹ nwọn ihiẹn ile ku.

Izrẹlụ Ebihutọdẹni Ẹka

⁶ “Mmẹ haịn ụnụ gilẹni a hụn e ri imẹ obodo ụnụ ile, lẹ ebe ile rị alị ụnụ, kanị ụnụ e gin'ẹ rogharị d'e kunrun m.” Ya kẹ Osolobuẹ ku.

⁷ “Mmẹ kwọndọn mirin ọrọgbọ ifọn ẹtọ nị wẹ d'a ghọma ihiẹn ugbo. M zi mirin d'e zue imẹ obodo ohu, ezikọ m'a zue imẹ hụn-ẹbọ; m zi ẹ zueye ugbo ohu, a la m hụn-ẹbọ tọ, hụn o zueyelẹni a kpọpụ nkụn.

⁸ Obodo ẹbụọ mọbụ ẹtọ hụ a chọjẹn mirin obodo ohu, arị w'a hụn hụn e zuni wẹ; kanị, ụnụ egin'ẹ rogharị d'e kunrun m.” Ya kẹ Osolobuẹ ku.

⁹ “E zi okẹn anwụn lẹ ndundu gi wẹ wiwipụ ugbo-nta lẹ alị vaịnị ụnụ bu ọda; e zi m igurube d'e ripụ osisi figi lẹ osisi olivu ụnụ; kanị, ụnụ egikwọn'a rogharị d'e kunrun m.” Ya kẹ Osolobuẹ ku.

¹⁰ “E mẹ m ụnụ ihiẹn kẹ m dọn mẹ ndị Ijiptu; e gi m agha lẹ ọpịa-agha gbu ikorọbịa ụnụ; a napụ m ụnụ ẹshin ndị ahụn m napụ ụnụ; e mẹ m ishin ozun jun ebe ụnụ bi. Kanị, ụnụ egikwọn'a rogharị d'e kunrun m; Ya kẹ Osolobuẹ ku.

¹¹ M nọ gi ntikpọ sọn ụnụ kẹ m dọn tikpọ Sodọm lẹ Gomora, ndị họdụnị nọ nwan rị kẹ ihiẹn wẹ lọpụha imẹ ọkụn, kanị, ụnụ egikwọn'a rogharị d'e kunrun m.” Ya kẹ Osolobuẹ ku.

¹² “Ya wụ, m jẹnkọ d'e mẹ ụnụ ihiẹn, ụnụ ndị Izrẹlụ! Makẹni m sikọ d'e mẹ ụnụ ihiẹnni, kwademẹ ni nwan, nị ụnụ lẹ Osolobuẹ ụnụ rọ, ụnụ ndị Izrẹlụ!

¹³ Lekwọ nị ẹnya, Onyẹ hụn mẹmẹ ugu ile, Onyẹ hụn ke ufere; Onyẹ hụn a gwa ịhịan uche ẹ; Onyẹ hụn e mẹ efinaị a gba ishi; Onyẹ hụn a zọ ebe ile jẹn elu elu-ụwa ụkụ; Osolobuẹ, Chuku ihiẹn ile rị okpuru ẹ ịya wụ ẹfan a!”