Emọsụ 1 - Ika

Isi Nke Ohu

¹ Ọnwan wụ ihiẹn Emọsụ ku. Emọsụ wụ onyẹ ohu imẹ ndị e du anụ imẹ obodo Tẹkụa. Ihiẹn Osolobuẹ ghọsị a banyeni Izrẹlụ k'o ku. Ogẹn ahụn, Uzịa wụ eze Juda, Jerobụam nwa Jụashị wụ eze Izrẹlụ. Ọ rị ahụa ẹbụọ o ku ihiẹn ndịnị nị alị hụ mẹhunmẹni d'e mẹhunmẹ.

Ikpe Osolobuẹ Ma Alị Ndị Nọhunmẹ Izrẹlụ

² Emọsụ sị, “Osolobuẹ gha Zayọnụ e bigbọ! Ọ gha Jerusalẹm a ban mban! Irurue jun ebe ile wẹ n'a zụn anụ hụ a kpọpụ nkụn; ẹfịfịa jun elu ugu Kamẹlụ hụ a kpọ nkụn!”

Ihiẹn K'e Mẹ Obodo Damaskọsụ Lẹ Ndị Aram

³ Osolobuẹ sị: “Makẹ njọ ẹtọ hụn obodo Damaskọsụ alị Aram mẹ, njọ ẹnọ dẹ, erohutọkọ m, m k'e yerịrị wẹ afụnfụn: makẹni e mẹshigụọ wẹ ndị rị ẹgbẹrẹ Gilẹdị ikẹn nọkẹ ebe wẹ nọ gi igwe kụkpọ ọka.

⁴ M jẹnkọ nwan d'e zi ọkụn ye ikpụlọ Hazaẹlụ eze wẹ. Ọkụn ahụn k'e ripụ ụlọ-agha ile zegbu enwẹn wẹ hụn Bẹn-Hadadị eze wẹ gi dọn ẹnya.

⁵ M k'e tikpọ ọnụ-mgbọn Damaskọsụ, gbu ndị bi alị wẹ wụ Aram: kẹ ndị bi Ọdanmgbugbu Avẹni kẹ onyẹ rị a kị obodo Bẹt-Idẹni. Wẹ k'a kpụn ndị Aram shi alị Kiri.” Osolobuẹ e kugụọ a!

Ihiẹn K'e Mẹ Obodo Gaza Lẹ Ndị Filistia

⁶ Osolobuẹ sị, “Makẹ njọ ẹtọ obodo Gaza rị alị Filistia mẹ, njọ ẹnọ dẹ, erohutọkọ m; m k'e yerịrị wẹ afụnfụn makẹ alị ahụn wẹ kpụnrụn ndị ile rịn'a reye ndị alị Ẹdọm.

⁷ M jẹnkọ nwan d'e zi ọkụn ye mgbọn Gaza; ọkụn hụn k'e ripụ ụlọ-agha ile zegbu enwẹn ẹ rị Gaza.

⁸ M k'e gbu ndị rị obodo Ash'dọdụ Filistia lẹ eze rị a kị obodo Ash'kẹlọnụ Filistia; m k'e mẹshi ndị rị obodo Ẹkrọnụ Filistia ikẹn; ndị Filistia họdụnị jẹnkọ d'a nwụnzị. Osolobuẹ wụ Chuku e kugụọ a!”

Ihiẹn K'e Mẹ Obodo Taya Lẹ Ndị Finishịa

⁹ Osolobuẹ sị, “Makẹ njọ ẹtọ obodo Taya mẹ, njọ ẹnọ dẹ, erohutọkọ m; m k'e yerịrị wẹ afụnfụn makẹ alị ahụn wẹ kpụnrụn ndị ile rịn'a reye ndị alị Ẹdọm. Anyanhandẹni mẹ obi nwẹnẹ.

¹⁰ M sikọ nwan d'e zi ọkụn ye mgbọn Taya; ọkụn hụn k'e ripụ ụlọ-agha ile zegbu enwẹn ẹ rị Taya.”

Ihiẹn K'e Mẹ Ndị Ẹdọm, Ụmụ Isọ

¹¹ Osolobuẹ sị: “Makẹ njọ ẹtọ ndị alị Ẹdọm mẹ, njọ ẹnọ dẹ, erohutọkọ m, m k'e yerịrị wẹ afụnfụn: makẹni o gi ọpịa-agha chụ umunẹ ẹ ndị Izrẹlụ, o mẹdẹni omikẹn wẹ, kama, o gi olulu mẹ wẹ ihiẹn, mẹru ẹ alị.

¹² M jẹnkọ nwan d'e zi ọkụn ye obodo wẹ wụ Tẹmanị. Ọkụn ahụn k'e ripụ ụlọ-agha ile zegbu enwẹn wẹ hụn rị isi alị wẹ wụ Bozra.”

Ihiẹn K'e Mẹ Ndị Amọnụ

¹³ Osolobuẹ sị: “Makẹ njọ ẹtọ ndị Amọnụ mẹ, njọ ẹnọ dẹ, erohutọkọ m, m k'e yerịrị wẹ afụnfụn makẹni wẹ bụọ ikpoho Gilẹdị rị imẹ, kẹni wẹ weri alị wẹ cheni nke wẹ.

¹⁴ M jẹnkọ d'a mụ nwan ọkụn ye mgbọn obodo wẹ wụ Raba. Ọkụn ahụn k'e ripụ ụlọ-agha ile zegbu enwẹn ẹ rịn'a, ya lẹ oro-agha lẹ agha k'a wị, ya lẹ eje ẹbi k'a kpọnị k'a wịzị.

¹⁵ Ogẹn ahụn, a nwụnrụn wẹ eze wẹ, we ẹ shi alị ọzọ, kẹ ịya kẹ ndị-isi sọn ẹ kị.” Osolobuẹ e kugụọ a.