Ẹkwan 5 - Ika

Isi Nke Isẹn Osolobuẹ Dodo Nyanhankwọ Ẹnyi!

¹ Euu Osolobuẹ, nyanhankwọ ihiẹn hụn mẹni ẹnyi, lee ẹnya n'ị hụn ụya ẹnyi rị e ri.

² Ndị ẹnyi marịnlẹni e werigụọ alị ẹnyi, itumunyẹ e werigụọ ụlọ ẹnyi.

³ Ẹnyi e họnringụọ ndị nwọnlẹni nẹdi, ndị nnẹ ẹnyi a wụrụgụọ ndị di nwụnnahịn.

⁴ Ẹnyi rị nwan e ṅọn mirin ẹnyi a ra e ṅọn; ẹnyi e ṅọnzidẹ nkụn e ṅọn.

⁵ Ndị chọkọ isi ẹnyi e rugụọ ebe ẹnyi rị; ndụn a gụchanrịn ẹnyi, ẹnyi ara zu ikẹn.

⁶ Ẹnyi e bugụọ enwẹn ẹnyi che okpuru alị Ijiptu lẹ alị Asiria kẹni ẹnyi a hụndẹ ihiẹn ẹnyi e ri.

⁷ Ndị nẹdi ẹnyi mẹ njọ bụ arịzị wẹ nwan ndụn, ẹnyi rị nwan a ta afụnfụn njọ wẹ.

⁸ Ndị igbọn rị nwan a kị ẹnyi, onwọnni onyẹ a gbapụhanị ẹnyi ẹka wẹ.

⁹ Ẹnyi e be isi e ye ọb'ẹka kẹni ẹnyi hụn ihiẹn ẹnyi e ri, makẹni ndị gi ọpịa-agha rị ụzọ ugbo imẹ atụ.

¹⁰ Akpụkpọ-ẹhụ hụ a nụ ẹnyi ọkụn nọkẹ ẹnya-mgba yeni ẹgụn.

¹¹ E kwọngụọ wẹ inyẹnmẹ ẹnyi mẹ mgba wẹ imẹ obodo Zayọnụ, kwọn ịgbagba ẹnyi mẹ mgba wẹ imẹ obodo ndị rị alị Juda.

¹² E kẹnmẹ wẹ ndị-isi ẹnyi ẹka gi ẹ kọnmẹ wẹ elu, gbe ifẹnrẹn ye ndị-ichẹn ihun.

¹³ Ikorọbịa hụ a tagbu enwẹn wẹ afụnfụn ebe wẹ n'a kwọnị ndị gini ẹnyi ihiẹn; mmụna-ikẹnnyẹ hụ a dangbuhunmẹ yeni ibu nkụn rị a nyingbuni wẹ.

¹⁴ Ndị-ichẹn arịzị ọgwa ọnụ-mgbọn obodo; ikorọbịa a kụbehigụọ egu wẹ.

¹⁵ Ịghọghọ arịzị ẹnyi obi; ẹkwan a narịngụọ ẹnyi egu ẹnyi rị e tẹn.

¹⁶ Okpu-eze a ghagụọ ẹnyi isi dan. Ụya e rịgụọ ẹnyi makẹ njọ ẹnyi!

¹⁷ Ihiẹnni haịn ndụn gi nwan gụ ẹnyi — ẹnya ẹnyi a changụọ ẹnyi gi a kwan ẹkwan ihiẹn ndịnị,

¹⁸ a kwan nị Ugu-Zayọnụ gbagụ nwan okpokoro, hụn nkitẹ-ọfịa wụ jakalụ rị nwan imẹ ẹ a kpahunmẹ.

¹⁹ Kanị, ịyụ wụ Osolobuẹ a kị jẹnrin ejẹn; ukpo ọkịkị ị k'a rị gha agbọ pụ agbọ.

²⁰ K'ị tọnị nwan a zọ ẹnyi? K'ị lanị nwan ẹnyi tọ ọrọgbọnị ile?

²¹ Euu Osolobuẹ, dodo, wekinhẹn ẹnyi ebe ị rị, kẹni ẹnyi rịzị ebe ẹnyi rị; mẹ n'ọ rịzịnị ẹnyi mma k'ọ rị mbụ —

²² mmanị y'a jụchanrịngụọ ẹnyi, nị olulu ị rị e buni ẹnyi arọkọzị.