Ẹkwan 4 - Ika

Isi Nke Ẹnọ Osolobuẹ E Yegụọ Jerusalẹm Ụya Ri, Kanị O K'e Dọnzi Ẹ

¹ Goru nwẹn egbukezini, ezigbo goru nwẹn a rakpo! Ọmụma ndị nwẹn rị nsọ feyịya nwan isi ọgbara-ogbe ile.

² Ndị Zayọnụ nwẹn te rịkẹnmẹ mkpa, ndị hụn te wụchanrịn goru, kẹ wẹ werizi nwan kẹ ite-ụrụa mmakalaka — ọrụn-ẹka ọkpụ-ite!

³ Eje-anụ wụ jakalụ e yedẹ ụmụ a ẹran, kanị ẹfọ a jọgbu ikpoho ẹnyi — nọkẹ nnụnụ ọstrichi rị alị ọkpọ-nkụn.

⁴ Ire hụ a nyantọ ụmụẹka okpo yeni ẹgụn-mirin; ụmụ-ndu hụ a rịọ ihiẹn-oriri, kanị onwọnni onyẹ e yeni wẹ.

⁵ Ndị te e ri ezigbo ihiẹn-oriri rị nwan ogbe a rịọ ụrịọ. Ndị te e yi ezigbo ẹkwa ṅanrannị, dinẹ nwan ikpọn-ntụn.

⁶ Afụnfụn wẹ ye ndị nke ẹnyi, ka nwan hụn wẹ ye ndị Sodọm — hụn wẹ tikpọpụ ozigbo-ozigbo onwọnni onyẹ bịa d'e yen'ẹ ẹka.

⁷ Ndị-ndu Izrẹlụ te nwunnahịn ẹkwa ọchan, wẹ te nwunnahịn mirin-ẹran; ẹhụ wẹ te manahịn rubi e gbukeni mma, wẹ te ma mma kẹ safaya hụn e gbukeni.

⁸ Kanị wẹ ginahịn nwan unyin-ugbẹgbẹ ngi; w'a ra kọmazịdẹ wẹ ẹnya ọgbara ogbe. E fiechanrịngụọ wẹ ẹhụ — mẹchanrịn ọkpụkpụ-ọkpụkpụ, kpọchanrịn nkụn kẹ ẹgbụgba osisi.

⁹ Ndị wẹ gi ọpịa-agha gbu kazịdẹ nwan mma karị ndị ẹgụn rị e gbu — ndị rị a nwụnhụn makẹ ụnwụn.

¹⁰ Ikpoho ẹgozizi e mẹ gidẹ ẹka wẹ shi ụmụ ẹfọ wẹ, gi wẹ họnrin ihiẹn-oriri ogẹn ahụn wẹ gi tikpọ ndị nke m.

¹¹ Osolobuẹ ebuhọdụnị olulu; o hupụhagụọ okẹn-olulu ẹ. Ọ mụgụọ ọkụn ye Zayọnụ, ọkụn hụn dụnpụ a ru iyetọ a.

¹² Ndị nze-ụwa ekwerini kaka, onwọnzikwọnị ndị alị ọwụlẹ ron'ẹ nị ndị-iṅẹnrẹn lẹ ndị iwe k'a saẹka mẹri Jerusalẹm banhan ọnụ-mgbọn ndị rị Jerusalẹm.

¹³ Kanị, o mẹghọ — makẹ njọ ndị-amụma a lẹ ụrụ ndị nchụn-ẹjan a, hụn nọsọnmẹ imẹ ẹ gbu ndị ezi-omumẹ.

¹⁴ Wẹ rị nwan ọgbara ogbe a sụọ ishi nọkẹ ndị ẹnya-ishi. Ẹdeke ndị wẹ gbu e mẹrụchanrịngụọ wẹ, onwọnni onyẹ egun a nị mẹtụdẹ ẹwuru wẹ ẹka.

¹⁵ Ịhịan ile hụ e yi, “Pụ nị! Ụnụ rụ arụ! E jẹn ni! E jẹn ni! Emẹtụkwọlẹ ni ẹnyi ẹka!” Ogẹn wẹ gi gba ọsọ, wahunmẹmẹ, ndị alị ichẹn-ichẹn hụ a sị, “Ẹhẹn, anọdịkọzị wẹ alị ẹnyi ebeni.”

¹⁶ Osolobuẹ e gigụọ ihiẹn-ẹka a chụyịya wẹ; ara lepụzị wẹ ẹnya. Ndị nchụn-ẹjan ara hụnzị onyẹ a gbayeni wẹ; onwọnzini onyẹ e lee ndị-ichẹn ẹnya ihun.

¹⁷ Ẹnya a rọ ẹnyi, ebe ẹnyi rị a tụ ẹnya ọlaliwi nị eyemẹka lala; ẹnyi hụ ụlọ-nche ẹnyi ichẹn-ichẹn a tụ ẹnya alị hụ hụn ẹnyi te ro ni wẹ k'a zụọpụha ẹnyi.

¹⁸ Ịhịan hụ e tu ụkụ ẹnyi ọkụn-ọkụn, ẹnyi asanị ẹka ghazịdẹ ọgbara-ogbe ẹnyi — makẹni ọgụgụ e rumẹgụọ, ogẹn ẹnyi e d'a gụ — nke ẹnyi e d'a gụ.

¹⁹ Ọ kẹrẹ ndị chụkọnị ẹnyi karị ugọn e fe elu; a chụ wẹ ẹnyi ru elu-ugu, a warị wẹ alị ọkpọ-nkụn, e che ẹnyi.

²⁰ Onyẹ hụn Osolobuẹ tumẹ — eze ẹnyi, hụn wụdẹ uzun ẹnyi e kun nọ dan ọnyan we — bụ ẹnyi te ro ni ẹnyi k'a nọ ẹka a, hụn isi imẹ alị ndị ọzọ!

²¹ Ghọghọmakwọ nwan, Nwagbọọ wụ alị Ẹdọm, ẹfọ ya sụọma ụnụ ndị bi alị Uzu ụsụọ. Kanị mkpu afụnfụnnị k'e ruzirịrị yụ nwẹn ẹka — y'a ra a, tụ, gbarị ọtọ.

²² Ụnụ ndị Zayọnụ, afụnfụn Osolobuẹ ye ụnụ k'a kụsị; ọ nịkọ ụnụ biekẹ alị wẹ kpụnjẹn ụnụ. Kanị ụnụ ndị Ẹdọm, Osolobuẹ jẹnkọ d'e ye ụnụ afụnfụn njọ ụnụ, kpu eje-omumẹ ụnụ oghe.