Ẹkwan 3 - Ika

Isi Nke Ẹtọ Gi Osolobuẹ Dọn Ẹnya Nke M A Jọka

¹ M wụ onyẹ hụn hụnjun ẹnya yeni ihiẹn Osolobuẹ gi olulu fịan m.

² O chụpụgụọ m, mẹ ghasọnmẹ imẹ ishi ẹlẹzi imẹ ukpẹ;

³ eziẹ-eziẹ, o mẹshigụọ m ikẹn, e mẹ m'ẹ, e mẹdọnzi, kẹ uhinhin kẹ efinaị.

⁴ O mẹgụọ akpụkpọ-ẹhụ m lẹ uru-ẹhụ m se alịlị, ọ kpagichanrịngụọ m ọkpụkpụ.

⁵ O kehunmẹgụọ m, gi ihiẹn-ikẹn jọgbu enwẹn ẹ fihunmẹ m.

⁶ O mẹgụọ m biri imẹ ishi nọkẹ ndị nwụnhụngụ kete ele-mgbe.

⁷ O gbọnhunmẹgụọ m — asakọ m ẹka wanahịn; o gigụọ ẹgan nyịngbu enwẹn wẹ dọnmẹ m ụzọ ohu.

⁸ M ghadẹ a kwan a kwangbu enwẹn m n'o yeni m ẹka, ọ jụ n'ọ gọnkọ ntịn ekpere m.

⁹ O gigụọ ogbe ọmụma dọkinchanrịn ụzọ ile m'a gha; o mẹgụọ ụzọ ile m'a gha jọ njọ.

¹⁰ Osolobuẹ nọ m nwan kẹ eje-anụ wụ biẹ warị e che, ọ nọ m kẹ ẹwọrọ warị e ke anụ ọ chọ n'o gbu;

¹¹ ọ dọkpụnpụ m ụzọ, dọkịka m, la m hụ tọ ebẹhụ.

¹² Ọ dọ ụta a, e dọn m, kẹn'ọ gba m ọbara a.

¹³ O zupu m akpobi ghahanị ọbara-ụta ndị hụ o bu imẹ ẹkpa-ọbara a.

¹⁴ E họnringụọ m ihiẹn ndị nke ẹnyi gi a mụ ẹmụ — w'a gba m ẹbụ eki e we gi.

¹⁵ O yegụọ m ẹhụhụọ e lu ilu yejun m ẹfọ, ye m olulu-anụ ra rajun ẹfọ.

¹⁶ O gigụọ m ọnụ kikin akpụrụ-iyi rị alị, tikwọnpụ m eze; ọ zọgụọ m limẹni alị.

¹⁷ Obi eruzini m alị kaka; a zọgụọdẹ m ihiẹn ẹfọ-ọsụsụọ wụ.

¹⁸ Ya m nọ sị, “Ọghọ m a la, ya lẹ ihiẹn ile m rị a tụ ẹnya a ẹka Osolobuẹ.”

¹⁹ Nyanhan afụnfụn m lẹ ọwahunmẹ m rị a wahunmẹ — k'ọ jọhan njọ lẹ k'o dọn rị a fụ m.

Gi Osolobuẹ Dọn Ẹnya

²⁰ Ogẹn ile kẹ m'a nyanhan a, ọ gụchanrịn m ndụn.

²¹ Kanị, ihiẹnni kẹ m'a nyanhan, ịya kẹ m gi e dọn ẹnya:

²² ihiẹn-ọsụsụọ Osolobuẹ haịn wẹ gilẹni gbuchanrịn ẹnyi, makẹni omikẹn ẹ ara gụ.

²³ O mẹsọnmẹ ẹ ụtụntụn ile; y'e mẹkẹ onyẹ wẹ e gi dọn ẹnya.

²⁴ A sịgụọ m enwẹn m, “Osolobuẹ kẹ m nwọn, m k'e cheri ẹ nwan.”

²⁵ Osolobuẹ e mẹyekẹni ndị gi ẹ dọn ẹnya — onyẹ ọwụlẹ hụn a chọ uche ẹ;

²⁶ ọ rịka mma nị ịhịan gi ndidin cheri nị Osolobuẹ zụọpụha a.

²⁷ Ọ rịka mma nị ịhịan dingbu ẹgbụn ebe ọ rị okoro.

²⁸ Ya sụọ nọdị, gba nkịtịn, makẹni Osolobuẹ ye ẹ afụnfụn hụ ta.

²⁹ Ya welụachanrịn enwẹn ẹ alị budẹ ihun che ẹjan alị ikẹnkwọ n'ọ rịzịghọ mma.

³⁰ Ya bu nti zinmẹ onyẹ hụn k'a ma a ọra, ya narịnchanrịn mkpari rịn'a.

³¹ Makẹni Osolobuẹ ara jụ ịhịan, jụ a jẹnrin ejẹn.

³² Ọsụọn'a n'o wẹhẹ ihiẹn-ẹkwan, o sikọ d'e mẹzi omikẹn — makẹni ihiẹn-ọsụsụọ a e hikẹ ogbe.

³³ Ẹlẹ obi ẹ n'o buhẹni ịhịan afụnfụn mọbụ mẹ ịhịan ihiẹn-ẹkwan —

³⁴ kẹ ịzọgbu ndị ngan ile rị alịnị,

³⁵ kẹ ịnapụ ịhịan ihiẹn Onyẹ ahụn Kachanrịnnị sị ya ru ẹ ẹka

³⁶ kẹ ịhangbu onyẹ mẹlẹni njọ eṅẹn — Osolobuẹ ara kwadọn ihiẹn ndị nọ ẹrịra.

³⁷ Onyẹ k'a s'ẹka ku, o mẹ, omẹni Osolobuẹ ekuni ẹrịra?

³⁸ Ẹlẹ ọnụ Onyẹ ahụn Kachanrịnnị kẹ ihiẹn jọ njọ lẹ ihiẹn rị mma gha a bịanị ịhịan?

³⁹ Kị onyẹ rị ndụn k'e dẹnnwịnwịnnị nwan nị wẹ rị e ye ẹ afụnfụn njọ o mẹ?

⁴⁰ Nị ẹnyi leban ni nwan obibi ẹnyi ẹnya, lele ẹ, nị ẹnyi rogharị d'e kunrun Osolobuẹ.

⁴¹ Nị ẹnyi weshi obi ẹnyi lẹ ẹka ẹnyi elu zinmẹ Chuku rị elu-igwee, sị a,

⁴² “Ẹnyi e mẹgụọ njọ, nupụ isi, yụ nwẹn a jụgụọ nị y'a gbagharịkọ ẹnyi.

⁴³ Y'e gigụọ olulu i fụkpumẹ enwẹn ị nọkẹ ẹkwa, chụ ẹnyi nchụgbu; y'e gbugụọ ẹnyi, y'e mẹni omikẹn.

⁴⁴ Y'e gigụọ orukpu kpumẹ enwẹn i makẹ ekpere ọwụlẹ gha e ru ebe ị rị.

⁴⁵ Y'e mẹgụọ ẹnyi họnrin ikpọn-fin lẹ unyin ebe alị ndị ọzọ rị ichẹn-ichẹn rị.

⁴⁶ Ndị-iṅẹnrẹn ẹnyi ile a mụgbugụọ ẹnyi ẹmụ.

⁴⁷ Ihiẹn-egun lẹ ọdakin e kunrungụọ ẹnyi, ya lẹ ntikpọ lẹ mwiwi.”

⁴⁸ Ẹnya-mirin m e huru kẹ iyi, makẹni e tikpọgụọ wẹ ndị nke m.

⁴⁹ Ẹnya-mirin hụ a gba m; ọ kụsịkọ —

⁵⁰ d'e ru nị Osolobuẹ a gha elu-igwee lee ẹnya alị, hụn kẹ ihiẹn nọ.

⁵¹ Ihiẹn m gi ẹnya m a hụn rị a gbawa m obi — ihiẹn rị e mẹ ikpoho ile rị obodo m.

⁵² Ndị wụ iṅẹnrẹn m bụ onwọnni ihiẹn m mẹ wẹ hụ a chọ m kẹ w'a chọ nnụnụ, nị wẹ gbu m.

⁵³ A tụ wẹ m ye imẹ mgbugbu ebe m rị ndụn, ma m ọmụma.

⁵⁴ Mirin e rukpumẹ m, m te ro ni m'e d'a la.

⁵⁵ A kpọku m ẹfan ị Osolobuẹ — imẹ-imẹ olu ebẹhụ.

⁵⁶ Ị nọ nụ arịrịọ m kẹ m sị ị, “Dodo, agbakwọlẹ m nkịtịn ẹkwan m rị a kwan n'i yeni m ẹka.”

⁵⁷ Y'a nọzụnhanghọ kẹ m kpọ ị, ị nọ sị, “Atụlẹ egun.”

⁵⁸ Euu Osolobuẹ, ị nọ kuni m ọnụ m; gbapụha ndụn m.

⁵⁹ Euu Osolobuẹ, y'a hụngụọ eje-ihiẹn wẹ mẹ m. Han nị m eṅẹn!

⁶⁰ Y'a hụngụọ eje-mmẹgwarị wẹ, eje-ihiẹn ile wẹ romẹni m.

⁶¹ Euu Osolobuẹ, y'a nụgụọ mkpari wẹ rị a kpari m, eje-ihiẹn ile wẹ romẹni m —

⁶² oku-ọnụ ndị-iṅẹnrẹn m lẹ nwịnrịn-nwịnrịn wẹ rị a ka lẹ eje-ihiẹn wẹ e romẹni m uhinhin lẹ efinaị.

⁶³ Ledẹ wẹ! Kẹ wẹ dinẹ edinẹ kẹ wẹ wuzo ọtọ, wẹ hụ a gba m ẹbụ.

⁶⁴ Osolobuẹ dodo, mẹ wẹ ihiẹn han kẹ ihiẹn wẹ mẹ, ihiẹn han kẹ ihiẹn ẹka wẹ mẹ.

⁶⁵ Mẹ wẹ wụrụ ndị ifẹnrẹn ghalẹni e mẹ; abụmọnụ ị y'a sọnmẹ wẹ!

⁶⁶ Gi olulu chụ wẹ, n'i gbupụ wẹ elu-ụwanị hụn rị okpuru igwere.