Ẹkịliziastisi 9 - Ika

Isi Nke Itenẹi Ọnwụn Wụ Nke Ịhịan Ile

¹ E rogụ m ihiẹnni ile, m nọ sị nị ndị ezi-omumẹ lẹ ndị marịn ihiẹn lẹ ihiẹn w'e mẹ rị ẹka Chuku, bụ onwọnni onyẹ marịn kẹ ihiẹn-ọsụsụọ ra iwe rị e che ẹ ihun.

² Ihiẹn ohu ahụn e mẹ ịhịan ile — kẹ onyẹ ezi-omumẹ kẹ eje-ịhịan, kẹ ndị-ọma kẹ ndị-njọ, kẹ ndị rị ọchan kẹ ndị rịlẹni ọchan; kẹ ndị a chụn ẹjan kẹ ndị ghalẹni achụn. K'ọ rị onyẹ-ọma; k'ọ rịzị onyẹ-njọ; k'ọ rị ndị hụn e kwe Osolobuẹ nkwa, k'ọ rịzị ndị egun ghalẹni a nị e kwe ẹ nkwa.

³ Ọnwan wụ eje-ihiẹn hụn rị ihiẹn ile e mẹ elu-ụwa: Ihiẹn ohu ahụn e kunrun ịhịan ile. Obi ịhịan nkẹ wụzịkwọ eje-ihiẹn eje-ihiẹn, ẹra rị wẹ obi e we wẹ bigụ, omẹgụ, a laburu wẹ ndị nwụnnị.

⁴ Onyẹ ọwụlẹ hụn rị ndụn nwọn olilẹnya; nkitẹ rị ndụn ka ẹwọrọ nwụnnị mma!

⁵ Makẹni ndị rị ndụn a marịnghọ nị wẹ k'a nwụn, kanị onwọnni ihiẹn ndị nwụnnị marịn; onwọnzini ụgwọ-ọrụn rị ihun e cheni wẹ, anyanhankọzịdẹ wẹ wẹ kaka.

⁶ Kẹ ihiẹn-ọsụsụọ wẹ kẹ izize kẹ ẹnya-ụfụ, lachanrịngụọ iwi kete-kete! Onwọnzini ogẹn ẹka wẹ e gi rị ihiẹn ọwụlẹ hụn e mẹ elu-ụwanị rị okpuru ẹnyanwụn.

Ndụn E Hini, Gi Nwan Ịghọghọ Bi

⁷ Gi nwan anwịnrịn rimẹ ihiẹn-oriri i, y'e gi ịghọghọ rama manya ị, makẹni Chuku a kwadọngụọ a.

⁸ E yisọnmẹ ezigbo ẹkwa, a kwọ udẹn isi.

⁹ Yụ lẹ nwunyẹ i ihiẹn ẹ sụọ ị, rimẹ ni ụwa ụhụọhịn ile imẹ ndụn ọlaliwini Chuku ye i bi okpuru ẹnyanwụn — ọrọgbọ hụ ile nwọnlẹni isi i k'e bi. Makẹni ọnwan wụ ihiẹn runi i kẹ ị dọn rị e bi ndụnnị, a rụn okẹn ọrụn ile ị rị a rụn elu-ụwanị rị okpuru ẹnyanwụn.

¹⁰ Gi ikẹn i ile rụn ihiẹn ọwụlẹ ị hụn ị k'a rụn, makẹni, imẹ ili ebe ị lakọ, kẹ ọrụn kẹ iroro kẹ ịmarịn-ihiẹn kẹ akọ-lẹ-uche arịa.

¹¹ O nwọnghọzị ihiẹn ọzọ m hụn elu-ụwanị rị okpuru ẹnyanwụn: ọsọ a ra jẹnni a gbaka m ọsọ; agha ara jẹnni a wụka m dikẹn; ihiẹn-oriri ara jẹnni e nwọnkẹ m uche; akụ-lẹ-ụba ara jẹnni a marịnka m ihiẹn; ọ ghakanị m ara jẹnni a mụka m ihiẹn: ọ danyeni wẹ ile a danyeni.

¹² Onwọnzikwọnị onyẹ marịn mgbe ogẹn ẹ e gi bịa: Kẹ eje-ọga dọn a nwụndọn azụn lẹzi kẹ ọnyan dọn a nwụndọn nnụnụ idẹnmizi, ẹrịra kẹ eje-ogẹn dọn a nwụndọn ịhịan, e kunrun wẹ ebe wẹ tụlẹni ẹnya a.

Akọ-Lẹ-Uche Ka Nzuzu Mma

¹³ Okpuru ẹnyanwụnnị, a hụnghọzị m ebe akọ-lẹ-uche nọ ghọsị enwẹn ẹ hụn tụ m ẹnya ọda:

¹⁴ O nwọn obodo ohu mẹ ẹkẹrẹ ndị rịn'a bulẹni ọda. Okẹn eze ohu nọ bịa d'a lụsọn ẹ agha, kehunmẹ ẹ, rụn ihiẹn wẹ nọ elu ẹ a gba ndị rị imẹ ẹ ụta ye ụgba obodo hụ.

¹⁵ Kanị o nwọnghọ okẹnnyẹ ohu bi imẹ obodo hụ hụn wụ ogbẹnnyẹ bụ ọ marịnghọ ihiẹn, ọ nọ gi akọ-lẹ-uche ẹ zụọpụha obodo hụ. Kanị onwọnni onyẹ nyanhan ogbẹnnyẹ hụ.

¹⁶ Ya m nọ sị, “Akọ-lẹ-uche ka mma karị akwanran.” Kanị w'e legberi amamihiẹn ogbẹnnyẹ, w'a ra gi oku ẹ dọn.

¹⁷ Oku ndị marịn ihiẹn gi nwayọ ku ka mma wẹ gi e dọn karị oro eze ndị nzuzu rị e yi.

¹⁸ Amamihiẹn ka ihiẹn-ọgụn ikẹn; akpụ mmẹfie ohu nwọn ikẹn wiwi ihiẹn rị mma bu ọda.