Ẹkịliziastisi 6 - Ika

Isi Nke Isin Ịhịan Ile E Ri Ụwa

¹ O nwọnghọzị eje-ihiẹn m hụn elu-ụwanị rị okpuru ẹnyanwụn, hụn e mẹ ịhịan ibu ọda-ọda:

² Ebe Chuku nọ ye ịhịan egho lẹ ẹfe lẹ ọghọ, nke wụnị onwọnni ihiẹn ọ chọ hụn a kọn'a, kanị Chuku anịn'a ri ẹ — onyẹ ọzọ e ri ẹ. Ọnwan wụ ihiẹn ọlaliwi, ihiẹn jọgbu enwẹn ẹ.

³ Ịhịan nwọn ikẹn mụ ụmụ ọgụn-isẹn, tọ ọda-ọda — kanị, k'ọ tọlẹ, omẹni ọ sanị ẹka ri ihiẹn o nwọn, ọ nwụnhụn elini w'ẹ ọhụnma, m sị ị nị nwa nwụntọ ẹfọ ka a mma.

⁴ Nwa nwụntọ ẹfọ bịa ọbịbịa nwọnlẹni isi, nọ imẹ ishi la, ishi anịnị wẹ marịn ẹfan a.

⁵ Ọ hụntuni ẹnyanwụn, onwọnni ihiẹn ọ marịn — bụ ịya ka ikẹn e zu karị okẹnnyẹ hụ —

⁶ ọsụọn'a nị okẹnnyẹ hụ bi ahụa nnụ-uku ụzọ ẹbụọ bụ o rini ihiẹn ẹ. Ẹlẹ ebe ohu kẹ wẹ ile jẹnkọ?

⁷ Ịhịan a rụn ihiẹn ile ọ rụn kẹni ọ hụn ri, bụ ẹfọ ara gi ẹ jun ịhịan.

⁸ Kị onyẹ marịn ihiẹn gi ka onyẹ-nzuzu? Elee erere kẹ ogbẹnnyẹ nwọn nị ọ magụọ bi elu imẹ ụwanị?

⁹ Hụn ẹnya ị rị e legha ka mma karị hụn rịhụ a gụngbun'i. Ọnwan wụzịkwọ ihiẹn ọlaliwi lẹ ịchụ ufere.

¹⁰ Ihiẹn ọwụlẹ rịnị, a kpọgụọlẹ w'a ẹfan; ihiẹn ịhịan wụ, a marịngụọlẹ w'a. Ịhịan ara sọn onyẹ kan'a dọ.

¹¹ Ọtụtụ oku gha a waye, oku ara nwọnkẹzi ishi; Onyẹ k'ọ bannị nwan erere?

¹² Ẹghẹẹ, onyẹ marịn ihiẹn rị ịhịan mma eluni, ẹkẹrẹ ogẹn nwọnlẹni isi ọ rị a ghafe nọkẹ onyinyọn mmaka? Ọ lagụ, onyẹ k'a saẹka gwa a ihiẹn jẹnkọ d'e mẹ elu-ụwanị rị okpuru ẹnyanwụn?