Ẹkịliziastisi 4 - Ika

Isi Nke Ẹnọ Ọbịangbu, Nlụkpọ Lẹ Ebe Ihiẹn Ịhịan A Sụọru Ịhịan

¹ M nọ lezi ẹnya, hụn ọbịangbu ile w'a bịangbu ịhịan elu-ụwa: A hụn m ẹnya-mirin ndị wẹ rị a bịangbu — nị enwọn wẹ onyẹ eyemẹka; ọkịkị rị ẹka ndị rị a bịangbuni wẹ — onwọnni nwan onyẹ egun nị kuyeni wẹ.

² M nọ sị nị ndị nwụnnị — ndị lagụnị — kẹ ẹfọ ka a sụọ ụsụọ karị ndị rị e bini, ndị rịkwọ nwan ndụn.

³ Kanị hụn ka wẹ ẹbụbụọ mma wụ onyẹ wẹ kelẹni mụ, hụn hụntulẹni eje-ihiẹn w'e mẹ elu-ụwanị rị okpuru ẹnyanwụn.

⁴ M nọ hụn a nị nlụkpọ ile lẹ nka ile ịhịan e mẹ wụ makẹ ibe ẹ gha a karị a. Kanị ọnwan wụzịkwọ ihiẹn ọlaliwi, ịchụ ufere rọ.

⁵ Onyẹ-nzuzu a fa ẹka e ye ụkụ, e gi ẹ a la iwi.

⁶ Ẹkẹrẹ jun ọb'ẹka ohu lẹ obi iru-alị ka mma karị ọda jun ẹka ẹbụbụọ wẹ gi okẹn ọrụn lẹ ịchụ ufere nwọnhẹn.

⁷ O nwọnzighọ ihiẹn ọlaliwi m hụn elu-ụwanị rị okpuru ẹnyanwụn:

⁸ Okẹnnyẹ ohu wụ mgb'onyẹ, hụn ya sụọ rị: nwa arịa, nwẹnẹ arịa. Kanị ọlụkpọ-ọlụkpọ k'ọ lụkpọ ogẹn ile, ara zu ikẹn, bụ onwọnni ihiẹn o nwọn e jun ẹ ẹfọ. Ọ hụ a jụ enwẹn ẹ, “Onyẹ kẹ m rịdẹ nwan a lụgbuni enwẹn m hụnnị ile? Kị m rịdẹ nwan e mẹshini ẹhụ m ikẹn?” Ọnwan wụzịkwọ ihiẹn ọlaliwi; ụya k'ọ wụ!

⁹ Madụ ẹbụọ ka onyẹ ohu mma. Makẹni uwẹ ka ihiẹn a rụnpụha.

¹⁰ Onyẹ ohu dan, ọwụ a e yen'ẹ ẹka lihi. Ọ jọka njọ nị ịhịan dan ebe ya sụọ rị, onwọnni onyẹ ya lẹ ịya wị k'e yen'ẹ ẹka lihi.

¹¹ Mmadụ ẹbụọ dinẹ, ẹhụ e kpọn wẹ ọkụn. Kanị, onyẹ ya sụọ dinẹ, nanị ẹhụ e dọn kpọn ẹ ọkụn?

¹² Ịhịan nwọn ikẹn karị onyẹ ohu ẹka, kanị madụ ẹbụọ jẹnkọ d'a saẹka che ẹ ọgụn. Ụdọ wẹ gi eriri ẹtọ kpa ara tibekẹnrin.

Ọkwa Lẹ Ogo Ịhịan Wụzịkwọ Ihiẹn Ọlaliwi

¹³ Okorọbịa ogbẹnnyẹ nwọn uche ka mma karị ẹgẹdi wụ eze nwọnlẹni uche hụn ghalẹni e gọnzi ntịn ndụnmọdụn,

¹⁴ ọsụọn'a nị ụlọ-ngan kẹ okorọbịa hụ gha pụha d'a wụrụ eze, ọsụọn'a nị wẹ mụ a ogbẹnnyẹ imẹ alị-eze hụ.

¹⁵ A hụnghọ m kẹ ndị ile rị ndụn, e jẹnhunmẹ elu-ụwa dọn rị e sọn okorọbịa hụ rikin eze.

¹⁶ W'a saẹka gụngụ ndị ile rị a bịa d'a hụnn'a. Kanị, omẹgụzị, ihiẹn ya nwẹn asụọkọkwọ agbọ lalanị. Ọnwan wụzịkwọ ihiẹn ọlaliwi — ịchụ ufere rọ!