Ẹkịliziastisi 2 - Ika

Isi Nke Ẹbụọ Ihiẹn A Sụọ Ụsụọ Wụzịkwọ Ihiẹn-ọlaliwi

¹ M nọ sị enwẹn m, “Bịa nwan, m jẹnkọ d'e gi ihiẹn a sụọ ụsụọ lele i nị m marịn kẹ ịya wụ ihiẹn ẹfọ e gi jun ịhịan.” Kanị ihiẹn a sụọ ụsụọ nọ ghọsịzịkwọ n'ọ wụ ihiẹn-ọlaliwi.

² M nọ sị, “Ẹmụ wụ nzuzu. Kị ihiẹn a sụọ ụsụọ e wẹhẹdẹ nwan?”

³ A nwan m nị m gi manya e mẹ ẹfọ a sụọ m ụsụọ, e gi m nzuzu mẹ ẹhụ — bụ m hụ e gi akọ-lẹ-uche m e mẹ ẹ. M te chọkọ nị m marịn ihiẹn ẹfọ e gi jun ịhịan, ihiẹn hụn furu ịhịan e gi ẹkẹrẹ ogẹnni w'e bi elu-ụwanị rị okpuru ẹnyanwụn mẹ.

Ihiẹn Ile M Rụn Lẹ Ihiẹn ile M Nwọn

⁴ M mẹsọnmẹ okẹn ihiẹn: A tụnsọnmẹ m ụnọ, nwọnrinsọnmẹ alị vaịnị.

⁵ A rụnsọnmẹ m ụgba-obobo lẹ ebe wẹ nọ e zu ikẹn, kụnyesọnmẹ wẹ osisi ichẹn-ichẹn a mị mkpụrụ.

⁶ A rụntọsọnmẹ m ọgọdọ w'a nọ e weri mirin a gba osisi m ndị e duni.

⁷ E ṅọn m igbọn ikẹnnyẹ lẹ ikpoho — cheni igbọn ndị wẹ mụ iwe m. Mmẹ ka ndị ile bu m ụzọ bi Jerusalẹm anụmanụ e nwọn — kẹ efin kẹ ewu lẹ atụnrụn.

⁸ A kpatọ m siliva lẹ goru cheni ihiẹn ile m nwọnhẹn ẹka ndị-nze lẹ alị rị ichẹn-ichẹn. M nwọn ikẹnnyẹ lẹ ikpoho hụn a bụnị m ẹbụ; m nwọnzikwọ inyẹnmẹ lẹ mgba jun ụlọ — ihiẹn hụn a sụọ okẹnnyẹ ụsụọ.

⁹ M nọ wụrụ okẹn ịhịan, karị ndị ile bu m ụzọ bi Jerusalẹm. Ẹnya dọnchanrịnkwọ m kẹ m rị e mẹ ihiẹnni ile.

¹⁰ Onwọnni ihiẹn la m ẹnya hụn m latọ; onwọnni ihiẹn sụọ obi m hụn m yelẹn'ẹ. Ihiẹn ile m rụn a sụọghọ obi m ụsụọ — ịya wụ ụgwọ-ọrụn ihiẹn ile m rụn.

¹¹ Kanị, ogẹn m gi lekpọ ihiẹn ile ẹka m rụn, lẹ ọnwụn m lụ ebe m rị a rụn wẹ, wẹ ile wụ ihiẹn-ọlaliwi, ịchụ ufere rọ; onwọnni erere o wẹhẹ elu-ụwanị rị okpuru ẹnyanwụn.

Kẹ Amamihiẹn Kẹ Nzuzu Wụ Ihiẹn-ọlaliwi

¹² Ya m nọ nwan lekpọma amamihiẹn lẹ nzuzu. Kị onyẹ rikin eze e mẹdẹ nwan karị hụn wẹ mẹgụ mbụ?

¹³ A hụn m'a nị amamihiẹn ka nzuzu mma, nọkẹ kẹ ukpẹ dọn ka ishi mma.

¹⁴ Ẹnya rị onyẹ marịn ihiẹn isi, kanị onyẹ-nzuzu sụọkọ ishi jẹnkọ — kanị a ghọtazịkwọ m nị ihiẹn ohu e kunrun wẹ ẹbụbụọ.

¹⁵ Ya m nọ sị enwẹn m, “Ihiẹn e kunrun ndị nzuzu k'e kunrunzi mmẹ nwẹn. “Elee erere kẹ ihiẹn ile m marịn banzịnị m nwan?” M nọ sị enwẹn m, “Ọnwan wụzịkwọ ihiẹn-ọlaliwi.”

¹⁶ Makẹni, kẹ onyẹ nwọn uche kẹ onyẹ-nzuzu, onwọnni hụn wẹ k'a nyanhanbie; nị wẹ zọchanrịnghọ wẹ ẹbụbụọ ihun. Kẹ onyẹ marịn ihiẹn kẹ onyẹ-nzuzu jẹnkọ d'a nwụn!

Ịlụgbu Enwẹn Ịhịan Wụ Ihiẹn-ọlaliwi

¹⁷ Ize elu nọ ban m, makẹni ihiẹn ile w'e mẹ elu-ụwa a wụrụgụọ m eje-ihiẹn ẹnya. Wẹ ile wụ ihiẹn-ọlaliwi, ịchụ ufere.

¹⁸ Ize ihiẹn ile m lụ ọnwụn rụn elu-ụwa nọ ban m, makẹni m jẹnkọ d'a larịrị wẹ tọnị onyẹ k'a nọkin ẹnya m.

¹⁹ Onyẹ marịn nwan kẹ onyẹ nwọn uche ra onyẹ-nzuzu kẹ m k'a natọn'a? Bụ ịya jẹnkọ d'e nwọnrin ihiẹn ile m gi amamihiẹn m rụn lẹ nka ile m mẹ elu-ụwanị rị okpuru ẹnyanwụn! Hụnnị wụzịkwọ ihiẹn-ọlaliwi.

²⁰ Ya ndụn ihiẹn ile m nụ ọnwụn rụn elu-ụwanị rị okpuru ẹnyanwụn nọ gụn m.

²¹ Makẹni, ịhịan nwọn ikẹn gichanrịn akọ-lẹ-uche lẹ ihiẹn ile ọ marịn lẹ nghọta a ile rụn ọrụn a, o mẹgụ ọ la ihiẹn ile ọ rụn tọnị onyẹ rụnlẹni ihiẹn-anaị. Hụnnị wụzịkwọ ihiẹn ọlaliwi, ẹregede eje-ihiẹn.

²² Kị ịhịan nwọnhẹnzi nwan imẹ ọnwụnnị ile o shi lẹ uhue ile ya lẹ ọrụn a wị elu-ụwanị rị okpuru ẹnyanwụn?

²³ Bụ ụfụ lẹ ihiẹn ẹnya-mirin kẹ ya lẹ ọrụn a wị o we nwụn — kẹ imẹ uhinhin, obi ẹ hụkwọ e ro iroro rịn'a. Ọnwan wụzịkwọ ihiẹn-ọlaliwi.

²⁴ Ya wụ, onwọnzini ihiẹn ẹfọ e gi jun ịhịan karị nị ọ hụ e ri, a ra, a nị ọrụn a a sụọ a ụsụọ. A hụngụọ m'a nị ọnwan wụzịkwọ ẹka Chuku.

²⁵ Makẹni, omẹni ẹlẹ Chuku, onyẹ nkẹ a saẹka ri nni-ọnụ mọbụ ri-ụwa?

²⁶ Onyẹ hụn ihiẹn ẹ sụọ Chuku, o ye ẹ amamihiẹn, mẹ ẹ marịn ihiẹn o furu n'ọ marịn, mẹ ẹfọ a sụọ a ụsụọ; kanị, nke onyẹ njọ, ogbo o ye ẹ wụ ịkpatọ lẹ iwe ẹ ye onyẹ ihiẹn ẹ a sụọ Chuku. Hụnnị wụzịkwọ ihiẹn-ọlaliwi lẹ ịchụ ufere!!