Ẹkịliziastisi 12 - Ika

Isi Nke Mmẹbụọ Anịkwọlẹ Uwẹ Ẹgẹdi Kunrun I Idẹnmizi

¹ Nyanhankwọ Onyẹ keni i ebe ị rị okoro, ogẹn nsọngbu gini d'a bịa, ahụa ndị ahụn gini d'a bịa hụn y'e gi sị, “Asụọnị wẹ m;”

² ẹnyanwụn lẹ ukpẹ lẹ ifọn lẹ kokisẹ gini d'a gba ị ishi ẹnya — mirin zuegụdẹ igwere e gitọzị ị ẹnya;

³ mgbe ẹhụ e gi mama ndị-nche ụlọ nni, ndị dikẹn e hiemẹ; ogẹn ndị a kwọ ihiẹn e gi kwọbehi makẹni ebuzini wẹ ọda, ndị gha windo e lee ile a hụnma bishi-bishi;

⁴ mgbe ụzọ wẹ gi a pụ ezi e gi gụnma, a nụma wẹ ukwere ihiẹn wẹ rị a kwọ ẹkẹrẹ-ẹkẹrẹ sụọ; ogẹn olu nnụnụ e gi a kpọtiẹndẹ ịhịan ụran — bụ w'a ra nụzị ẹbụ ọwụlẹ;

⁵ mgbe ịhịan gi a tụ egun inyin-elu lẹ ịpụ-ezi; ogẹn obobo ọchan gi e jun ibe elu rịkẹ elu amọndụ changụnị, kpamkpam a dọkpụnma enwẹn ẹ adọkpụn, ihiẹn a gụn ẹgụn agụnkọzị. Ogẹn ahụn, hụnyẹ a lashi ụlọ itẹbitẹ ẹ, ndị rị a kwann'a a ghahunmẹmẹ ụwaya a kwan.

⁶ Nyanhankwọ nwan Onyẹ keni i — eriri siliva hụ gini d'e tibe, ugbẹgbẹ goru gini d'e tikpọ; ite gini d'e tikpọtọ iyi, njini a dọ mirin e gụngụọnpụtọ ọmị,

⁷ ẹjan a lakin anị ọ gha pụha, umẹ-ndụn a lakin ebe Chuku yen'ẹ rị.

⁸ “Ihiẹn ọlaliwi! Ihiẹn ọlaliwi! Ihiẹn ile wụ ihiẹn la iwi!” Ya kẹ Onyẹ-nkuzi ku.

Oku ikpanzụụn

⁹ Ẹlẹdẹ nị Onyẹ-nkuzi marịn ihiẹn sụọ, kama, ọ kuzizi ịhịan ihiẹn. O leban itẹn bu ọda ẹnya, chọpụhasọnmẹ alị wẹ, detusọnmẹ wẹ usọnrọn-usọnrọn.

¹⁰ Onyẹ-nkuzi lịlịma chọrịsọnmẹ akpụrụ-oku a sụọnị, gi wẹ ku ihiẹn ọ chọ n'o ku; ihiẹn o detusọnmẹ wụ ezioku, o de wẹ kẹ wẹ nọ.

¹¹ Oku ndị marịn ihiẹn ku nọ kẹ ẹgbe wẹ pịn hụn wẹ gi e du efin, wẹ kịgbama wẹ, wẹ nọsọnmẹ kẹ ntu wẹ kpọye ọhụnma — hụn gha ẹka Onyẹ-ndu anụ ohu bịa.

¹² Nwa m, kpachanpụkwọ ẹnya ebe ihiẹn ọwụlẹ wụlẹni ndịnị rị. W'a ra debehi ẹkụkwọ; okẹn ọgụngụn lẹ ọmụmụ ihiẹn a rọ ịhịan ẹhụ.

Ihiẹn Kachanrịn Mkpa

¹³ Ẹnyi a nụgụọ nwan ihiẹnni ile; lee nwan nkịkwama ihiẹn ile: Tụ egun Chuku; e mẹ ihiẹn o ku — ịya wụ ogbo ịhịan ile.

¹⁴ Makẹni Chuku jẹnkọ d'a jụ ịhịan ukwere ihiẹn ile o mẹ, ya lẹ ihiẹn ile zuerini — kẹ mma kẹ njọ.