Ẹkịliziastisi 10 - Ika

Isi Nke Iri

¹ Kẹ nzinzin nwụnnị dọn e shin-wiwi ezigbo-udẹn ẹrịra kẹ ẹkẹrẹ nzuzu dọn e kpumẹ amamihiẹn lẹ ọghọ wẹ gi marịn ịhịan.

² Obi onyẹ nwọn uche e shi ẹka-nni ẹka-nni, obi onyẹ nzuzu e shi ẹka-ekpẹn ẹka-ekpẹn.

³ Kẹ ebe onyẹ nzuzu ghakọdẹ ọkpụzọ, onyẹ-nzuzu enwọn uche — ọ ghọsịsọnmẹ ịhịan ile k'o zuzuhan.

⁴ Omẹni onyẹ rị a kịnị rị e buni i olulu, alatọlẹ ọrụn ị, ịgba-nkịtịn e dọnzidẹ mmẹfie bu ọda jọgbu enwẹn ẹ.

⁵ O nwọn eje-ihiẹn ohu m hụn elu-ụwanị rị okpuru ẹnyanwụn, ihiẹn ndị isi e mẹ ọsụọn'a nị a kpachanpụnị wẹ ẹnya mẹ ẹ:

⁶ w'e buchesọnmẹ ndị marịnlẹni ihiẹn ọkwa kanị, e buche ndị wụ ndị ibe alị.

⁷ A hụnghọ m kẹ igbọn gi ẹshin e jẹn, ụmụ nze e gi ụkụ jẹnkọ kẹ igbọn.

Ihiẹn Ile Chọ Amamihiẹn

⁸ Onyẹ gu olu a danban imẹ ẹ; agwọ a ta onyẹ tikpọ ụgba.

⁹ Ọmụma a rụ onyẹ rị e be ọmụma ẹhụ; osisi a rụ onyẹ rị a wa osisi ẹhụ.

¹⁰ Anyụn shigụ, nị esụọnni wẹ ẹ, akwanran k'ọ chọ nwan; amamihiẹn a banka erere — o mẹ ihiẹn a gha.

¹¹ Omẹni ọ kẹrẹgụọ agwọ ta ịhịan wẹ kebe rẹrẹma a — onyẹ rẹrẹn'a enwọnkọ erere.

Oku-ọnụ Ndị Marịn ihiẹn Lẹ Nke Ndị-nzuzu

¹² Oku-ọnụ onyẹ nwọn uche e mẹ ẹ ọhụnma, kanị ọnụ onyẹ-nzuzu e gbu ẹ.

¹³ Oku nzuzu k'o gi e bidọn, eje-oku onyẹ-ẹra k'o gi e bi ẹ —

¹⁴ onyẹ nzuzu e kuzikwọ ọtụtụ-oku. Onwọnni onyẹ marịn ihiẹn lalanị — onyẹ k'a s'ẹka gwa a ihiẹn jẹnkọ d'e mẹni ọ nwụnhụngụ?

¹⁵ Onyẹ nzuzu a rụn ọrụn, ẹhụ a gbọrọ a, ọ marịndẹ ebe w'a gha e shi imẹ obodo.

Alị Onyẹ-nzuzu Rị A Kị

¹⁶ Nsọngbu rịkwọn'ị, alị hụn ogbori wụ eze ẹ, hụn eze ẹ te wụ igbọn nwọnlẹni ọzụnzụn, hụn ndị-isi ẹ e ri oriri ogẹn ụtụntụn.

¹⁷ Y'e nwọnkẹ ngọzi, alị hụn eze ẹ wụ nwa eze, hụn ndị-isi rịn'a e ri, a ra, ogẹn furuni — kẹni ndụn ban wẹ, ẹlẹ n'ọ tụ wẹ.

¹⁸ Okẹnnyẹ la nzụnzụn elu-ụnọ a e ziẹntumẹ, ọ kụtọpụ ẹka, okpukpu ẹ e himẹ mirin.

¹⁹ W'e ri oriri nị ẹmụ sụọ ịhịan, a ra manya nị ẹfọ sụọ ịhịan ụsụọ, kanị egho a zachanrịn oku ile.

²⁰ Ekujakwọlẹ oku eze, ọsụọkwọn'a imẹ obi i, mọbụ nọ mmughẹ i kuja oku okẹn-ịhịan, makẹni nnụnụ nwọn ikẹn buru ihiẹn i ku, nnụnụ fekọnị nwọn ikẹn gwa wẹ ihiẹn i ku.