Ẹkịliziastisi 1 - Ika

Isi Nke Ohu Ihiẹn Ile Rị Ụwa Wụ Ihiẹn-ọlaliwi

¹ Ọnwan wụ ihiẹn Onyẹ-nkuzi ku. Onyẹ-nkuzi wụ nwa Defidi; eze rị Jerusalẹm rọ:

² “Ihiẹn-ọlaliwi rọ! Ihiẹn-ọlaliwi ka ihiẹn-ọlaliwi!” Ya kẹ onyẹ-nkuzi ku. “Ihiẹn-ọlaliwi hụn ka ihiẹn-ọlaliwi rọ! Wẹ ile wụ ihiẹn la iwi.”

³ Kị wụdẹ erere ọrụn ile ịhịan a rụn, a rụngbu enwẹn ẹ elu-ụwanị rị okpuru ẹnyanwụn?

⁴ Agbọ ile hụ a bịa, a ghafe, kanị ụwa hụkwọ.

⁵ Anwụn hụ a wa, a rọ, a hụhụ e kin azụụn ebe ọ nọ a wa.

⁶ Ufere feshi ẹbamịn ndịdan-mirin, o feshi ẹbamịn ugu; ofehunmẹ-ofehunmẹ k'o fehunmẹ, a gha ebe ọ ghagụ.

⁷ Iyi ile hụ e huban ohimin, kanị ohimin ara jun; ebe mirin hụ gha a bịa k'o kinzi azụụn.

⁸ Ihiẹn ile wụ ndụn-ọgụgụ: onwọnni ihiẹn ọnụ e ku hụn e junn'ẹ; onwọnni ihiẹn ẹnya e legha hụn e junn'ẹ; onwọnni ihiẹn ntịn a nụ hụn e junn'ẹ.

⁹ Ihiẹn rị mbụ ịya jẹnkọ d'a rịzị; Ihiẹn wẹ mẹ mbụ kẹ wẹ jẹnkọ d'e mẹzi. Onwọnni ihiẹn wụ ihiẹn ọhụn elu-ụwanị rị okpuru ẹnyanwụn.

¹⁰ Kịnị kẹ wẹ k'a saẹka sị, “Lee ẹ, ọnwan wụ ihiẹn ọhụn!” Kaka, ọ rịọlẹ mbụ-mbụ; ọ rịọlẹ ebeni nị wẹ d'a mụ ẹnyi.

¹¹ Onwọnni onyẹ a nyanhan ihiẹn mẹ mbụ; ihiẹn k'e mẹdẹ ihun mẹgụ, ndị lalanị anyanhankọzịd'a.

Amamihiẹn Wụ Ihiẹn-ọlaliwi

¹² Mmẹ wụ onyẹ-nkuzi wụ eze nọ Jerusalẹm a kị Izrẹlụ.

¹³ E gi m amamihiẹn lekpọ ihiẹn ile w'e mẹ elu-ụwa, nị m ghọta kẹ wẹ nọ: Egelegbeshi, ẹregede ibu kẹ Osolobuẹ buye ịhịan!

¹⁴ A hụnchanrịngụọ m ihiẹn ile w'e mẹ elu-ụwanị rị okpuru ẹnyanwụn; wẹ ile wụ ihiẹn la iwi, ịchụ ufere rọ.

¹⁵ Asakọ wẹ ẹka tịnpụ ihiẹn gọrịnị; asakọ wẹ ẹka gụn ihiẹn rịlẹni.

¹⁶ M sị enwẹn m, “Lee ẹ, e nwọngụọ m amamihiẹn, nwọnkarị ndị ile bu m ụzọ kị Jerusalẹm; amamihiẹn lẹ nghọta e jungụọ imẹ m.”

¹⁷ Ya m nọ chọma ihiẹn amamihiẹn gi karị obibi-ẹwobi lẹ nzuzu, kanị m nọ hụn a nị hụnnị nkẹ wụzị ịchụ ufere.

¹⁸ Makẹni okẹn amamihiẹn e buhẹ okẹn ẹkwan; amamihiẹn gha a waye, ụfụ hụ a waye.