Ẹbụ Solomọnụ 8 - Ika

Isi Nke Ẹsatọ Hụn Okpoho

¹ K'ọ rị m, ị wụ nwẹnẹ m okẹnnyẹ, hụn ra ẹran nnẹ m! M hụn ị ogbe ọ nị m susu i ọnụ — onwọnni onyẹ k'a kọrịanị m.

² Nkẹ e weri m'i, wẹ i shi iwe nnẹ m — onyẹ hụn zụnnị m. E ye m'i manya wẹ buche ihiẹn e shin ọhụnma ra, mirin gova-pomegraneti m sụọnị.

³ Ẹka ekpẹn ẹ rị m okpuru isi, ẹka-nni ẹ e fiedọn m.

⁴ Ịgbagba Jerusalẹm, m rị a gwashi ụnụ ya ikẹn: akpasukwọlẹ ni ihiẹn-ọsụsụọ mọbụ kpọtiẹn ẹ d'e ru mgbe ọ sụọ a.

Ịgbagba Jerusalẹm

⁵ Onyẹ wụ nwa-agbọnị gha alị ọkpọ-nkụn lala — hụn danbemẹ onyẹ ya lẹ ịya rị a sụọ? Okpuru osisi apụlụ kẹ m nọ kpasu i; ebẹhụ kẹ nnẹ i nọzị tụ imẹ i, ebahụn kẹ imẹ nọ mẹ ẹ, ọ mụ ị.

Hụn Okpoho

⁶ Bi m ye akpobi i nọkẹ ihiẹn ahịma; bi m kẹ ahịma ye ẹka ị; makẹni ihiẹn-ọsụsụọ zehan kẹ ọnwụn, ẹnya-ụfụ di mọbụ nwunyẹ nọ kẹ ọnwụn ghalẹni a nụ dodo, ọ dụn kẹ ọkụn rị e nwunni, nọkẹ okẹn ọkụn.

⁷ Okẹn mirin ara saẹka tinyụn ihiẹn-ọsụsụọ; onwọnni iyi a s'ẹka e hurun'ẹ. Ịhịan yechanrịndẹ akụ-lẹ-ụba ile rị iwe ẹ makẹ ihiẹn-ọsụsụọ, elekọ w'a ẹnya ihun.

Umunẹ Ikẹnnyẹ Hụn Okpoho

⁸ Ẹnyi nwọn nwẹnẹ-okpoho rị ẹnyi ibe-alị, hụn kelẹni kpụ ẹran. Kị ẹnyi k'e mẹni nwẹnẹ ẹnyi wẹ chọhama a?

⁹ Ọ wụrụ ẹhụ-ụlọ, dọnmẹ enwẹn ẹ, ẹnyi e gi ihiẹn siliva chọ a mma. Kanị ọ wụrụ ọnụmụzọ, ẹnyi e gi osisi sida yekin ẹ.

Hụn Okpoho

¹⁰ Ẹhụ-ụlọ kẹ m wụ, ẹran m nọ kẹ ụnọ-nche. Ya kẹ m gi nwan wụrụn'a onyẹ e mẹ ẹfọ e jun ẹ.

Hụn Okpoho

¹¹ Solomọnụ nwọn alị vaịnị ohu imẹ Baalụ-Hamọnụ; ọ nọ we ẹ ye ndị ọzọ a rụn a egbu-eke, onyẹ regụ vaịnị o wẹhẹ akpụrụ siliva nnụ-uku.

¹² Kanị alị vaịnị m wụ nke m! Akpụrụ siliva nnụ-uku hụ wụ nke i-o, Solomọnụ, ọgụn-iri wụ nke ndị hụn a rụnn'a.

Hụn Okẹnnyẹ

¹³ Ịyụ hụn bi ugbo-obobo hụn ndị-ọwụ a rị e jẹnni ozi, eyen'ẹ ẹka, nị m nụdẹ olu i.

Hụn Okpoho

¹⁴ Nke-m, pụha — n'i d'e mẹmẹ kẹ mgbadan mọbụ okoro okẹn-ele elu Uguni wẹ kpọnjun ihiẹn e kun fuẹin.