Ẹbụ Solomọnụ 7 - Ika

Isi Nke Ẹsa Hụn Okẹnnyẹ

¹ Euu nwa eze, ụkụ ị a rịka mma imẹ akpụkụ hụ! Ọgbọdọgbọ ị riẹn kẹ ọla wẹ kpụ ọhụnma — ọrụn-ẹka onyẹ a kpụ ọla rọ.

² Otumẹ i wụ mkpu wẹ gi e hugbama manya — ezigbo manya wẹ hugbama ya akọkwọl'a. Ukun i wụ ikpọn ọka-witi wẹ gi obobo lili fihunmẹ.

³ Ẹran ị ẹbụbụọ nọ kẹ mmụ ele ẹbụọ, ele wẹ mụ ejimẹ.

⁴ Olu i sue kẹ ụlọ-nche, ọ nọzịkwọ kẹ hụn wẹ gi eze-enyi tụn. Ẹnya ị wụ ọgọdọ-mirin ndị rị Hẹsh'bọnụ, hụn ahụn rị ẹhụ ọnụ-mgbọn Batị-Rabim. Imi i nọ kẹ ụnọ-nche Lẹbanọnụ hụn bu ihun zinmẹ Damaskọsụ.

⁵ Isi i nọdịhụ kẹ Ugu-Kamẹlụ; ntutu i rị kẹ mgburu w'a kpanị ndị-nze, k'o dọn fịfịrị a sụọban eze isi.

⁶ Y'a maka mma, y'a rịka mma! Euu Obi-m — y'a sụọka m-o!

⁷ I sue usue kẹ nkụ-deti; ẹran ị nọsọnmẹ kẹ ogbe-ẹkụ deti.

⁸ M nọ sị, “M k'e nyinrin elu nkụ hụ; e kwọndọn m ogbe ẹ.” Ẹran ị, ya nọzịkwọ kẹ ọhịọ vaịnị, ọnụ ị, ya kun fuẹin kẹ ogbe apụlụ,

⁹ ya sụọzịkwọ kẹ manya kachanrịn mma. Manya hụ ya hujẹnni Nke-m — ya gi nwayọ gha a ụgb'ọnụ lẹ eze.

Hụn Okpoho

¹⁰ Nke-m nwọn m, ẹgụn m rị a gụn a.

¹¹ Pụha nwan, Nke-m — nị ẹnyi shi azụụn wẹ nọ a rụn ugbo, nị ẹnyi d'a ranhịn alị-ọfịa ndịnẹi.

¹² Nị ẹnyi zọ ụzọ shi ibẹka hụ alị vaịnị rịsọnmẹ d'e lee kẹ vaịnị a fọmagụọ, kẹ obobo wẹ a shịapụmagụọ, ẹnyi e lelezi kẹ gova-pomegraneti a mịmagụọ obobo — a nọ m ebahụn ye i ihiẹn-ọsụsụọ m.

¹³ Ihiẹn-akụnkụn mandreki e kunmẹgụọ fuẹin, mkpụrụ-osisi ile a kọnị rị ọnụmụzọ iwe ẹnyi, kẹ nke ọhụn kẹ nke akan — hụn m dọnmẹni yụ wụ Nke-m.