Ẹbụ Solomọnụ 6 - Ika

Isi Nke Isin Ịgbagba Jerusalẹm

¹ Okpoho manahịn ikpoho ile mma, elebe kẹ Obi-i shi? Elee azụụn k'o dọn ihun, nị ẹnyi hụn ụzọ sọn i chọ a?

Hụn Okpoho

² Nke-m e shigụọ ugbo-obobo ẹ, ebẹhụ ihiẹn-akụnkụn e kun fuẹin jun, d'a ghahunmẹ imẹ ugbo hụ, lẹ n'ọ kparị obobo lili.

³ Nke-m nwọn m, mmẹ nwẹn nwẹzikwọ Nke-m, ọ ghahunmẹ ebẹhụ wẹ kụnjun lili.

Hụn Okẹnnyẹ

⁴ Obi-m, ị ma mma kẹ obodo Tẹza, ị rị mma kẹ obodo Jerusalẹm, i nwọn ikpẹn kẹ itu ndị-agha busọnmẹ ẹkwa-ahịma wẹ.

⁵ Dodo lebehi m — nị ẹnya ị ara nị m marịnzị ihiẹn m rị e mẹ. Ntutu i rị kẹ igunrun ewu gha ugu Gilẹdị kpọtula.

⁶ Eze rị ị ọnụ hụ e nwun kẹ igunrun atụnrụn hụn gha ebe wẹ nọ wụ wẹ ẹhụ lala; eze-elu i ile lẹ eze-alị ị ile zu oke — onwọnni hụn ya lẹ ibe ẹ wịlẹni.

⁷ Nti i ẹbụbụọ rị a chan pọị kẹ imẹ gova-pomegraneti wẹ wabe — imẹ ẹkwa hụ i gi kpumẹ ihun.

⁸ Inyẹnmẹ eze nwọn ikẹn rị ọgụn-ẹtọ, ndị mgba nwọn ikẹn rị ọgụn-ẹnọ, ịgbagba nwọnzikwọ ikẹn karị hụn w'a gụn;

⁹ kanị nduru m rị ichẹn, Nke-m hụn zu oke; akpụ okpoho ohu nnẹ ẹ mụ k'ọ wụ; ịbọọ onyẹ hụn mụn'a. Ịgbagba a hụn a, wẹ nọ kpọ a onyẹ Chuku gọzi — inyẹnmẹ eze lẹ ndị mgba eze a jazịghọ a mma.

¹⁰ Onyẹ wụ hụnnị pụlanị lekẹ eki rị e fọnni, e ti kẹ ifọn, e nwun kẹ ẹnyanwụn — nwọn ikpẹn kẹ kokisẹ dọnkọ ogele?

Hụn Okẹnnyẹ

¹¹ M jẹn odoro osisi wọnọtụ d'e lee ihiẹn-akụnkụn ndị rị e sue nke ọhụn imẹ ọdanmgbugbu, kẹni m hụn kẹ vaịnị a fọmagụọ ẹhụhụọ kẹ gova-pomegraneti e mẹmẹgụọ obobo.

¹² Asazịnị m ẹka kwọndọn enwẹn m, m nọ kẹ onyẹ hụn enwẹn ẹ imẹ ụgbọ-ẹshin eze ẹnyi.

¹³ Hutọ! Onyẹ Shulam, hutọ!! Hutọ! Hutọ — nị ẹnyi lee i. Kị ọnụ k'e leni onyẹ Shulam kẹ w'e lee egu ndị Mahanaim?