Ẹbụ Solomọnụ 5 - Ika

Isi Nke Isẹn Hụn Okẹnnyẹ

¹ A banhangụọ m imẹ ugbo-obobo m, nwẹnẹ m, nwunyẹ m; a kparịgụọ m maa m lẹ ihiẹn m ndị-ọzọ e kun ọhụnma. E rigụọ m ọgba-ẹnwụn m lẹ mirin-ẹnwụn m; a ragụọ m manya m lẹ mirin-ẹran m. E ri ni-o ndị ọwụ ẹnyi; a ra nị-o; ndị rị a sụọnị, rajun ni ẹfọ-o!

Ịgbagba Jerusalẹm Hụn Okpoho

² M rị ụran, kanị akpobi m mụ ẹnya. Gọn ntịn! Nke-m rị a dụ ẹka: “Kpọpụnị m ụzọ, nwẹnẹ m, Obi-m, nduru m, nke m hụn zu oke — nị isi m e mẹ igirigi-igirigi, ntutu m e mẹ igirigi-igirigi.”

Hụn Okẹnnyẹ Hụn Okpoho

³ A gbụpụgụọ m ẹwuru m — nị m tazị nwan afụnfụn yirizi ẹ? A chanpụgụọ m ụkụ m dinẹ — nị m ruzi ẹ nwan unyin?

⁴ Nke-m e bu ẹka che oghe wẹ gha a gụnpụ ọnụmụzọ, akpobi m nọ dụman'a.

⁵ E lihi m d'a gụnpụnị Nke-m ụzọ, udẹn-maa nọ jun m ẹka, maa e hujun m ẹka — ẹka hụn m gi rị a gụnpụ ụzọ.

⁶ A gụnpụnị m Nke-m ụzọ, kanị ọ pụgụọ — ọ rịzị a. Obi e feri m n'ọ pụgụọ; a chọ m'a, ahụnnị m'a; a hị m'a oku, ọ zanị m.

⁷ Ndị-nche a hụn m ebe wẹ rị a ghahunmẹ imẹ obodo. E gbu wẹ m ili, ebe wẹ fịan m ihiẹn nọ wuru; a kịnarịn wẹ m ẹwuru m yiye elu ẹ — ndị-nche hụ hụn e che nche mgbọn obodo, uwẹ mẹ m ihiẹnni!

⁸ Ịgbagba Jerusalẹm, m rị a gwa ọnụ, a gwashi ụnụ ikẹn — ụnụ hụn Nke-m, kị ụnụ sikọ d'a gwa a? Gwa n'a nị ihiẹn-ọsụsụọ e d'a gụngbu m.

Ịgbagba Jerusalẹm

⁹ Okpoho manahịn ikpoho ile mma, nanị ọwụ ị dọndẹ ka ikẹnnyẹ ndị ọzọ mma? Kị ọwụ ị gidẹ ka ikẹnnyẹ ndị ọzọ mma — hụn ẹnyi e gi gwarịrị a ihiẹnni?

Hụn Okpoho

¹⁰ Nke-m e gbukepụ egbukepụ, ẹhụ rị a mma, ọ rịdẹ ichẹn imẹ mmadụ nnụ-uku iri.

¹¹ Isi ẹ wụ goru, ezigbo goru; ntutu ẹ lọrị alọrị, e gi ngi kẹ uroko.

¹² Ẹnya a nọ kẹ nduri hụn rị mkpẹnrẹn mirin, e nwun kẹ ihiẹn wẹ gi mirin-ẹran chan, hụn nọdị elu ihiẹn duni.

¹³ Nti ẹ nọ kẹ alị ugbo ihiẹn e kun fuẹin nọ e sue, e kun fuẹin. Ụgb'ọnụ a rịkẹ obobo lili hụn rị a tanpụha maa e kun fuẹin.

¹⁴ Ẹka a nọ kẹ ọkpọ goru hụn wẹ gi Kraịsolaịtị nwẹnẹ goru chọ mma. Ẹhụ a nọ kẹ eze-enyi wẹ chanchan ọhụnma hụn wẹ gi ọmụma safaya e gbukeni chọ mma.

¹⁵ Ụkụ a turu kẹ ọmụma mabụlụ ọchan ẹbụọ mawuruni, hụn ụkụ-alị wẹ wụ ezigbo goru. O yichanrịn Lẹbanọnụ, ma mma kẹ osisi sida Lẹbanọnụ.

¹⁶ Ọnụ a wụ ụsụọ lẹ enwẹn ẹ; o pukẹ okorọbịa. Ẹrịra kẹ Nke-m nọ; ẹrịra kẹ Ọwụ m nọ — ụnụ ịgbagba Jerusalẹm.