Ẹbụ Solomọnụ 4 - Ika

Isi Nke Ẹnọ Hụn Okẹnnyẹ

¹ Obi-m, y'a maka mma! Y'a makẹnmẹkẹ mma! Ẹnya ị nọ kẹ nduru imẹ ihiẹn hụ i gi kpumẹ ihun. Ntutu i nọ kẹ igunrun ewu rị a kpọtu Ugu Gilẹdị.

² Eze rị ị ọnụ hụ e nwun kẹ igunrun atụnrụn wẹ kọ ẹṅẹnrẹn nke ọhụn, hụn gha ebe wẹ nọ wụ wẹ ẹhụ lala; eze-elu i ile lẹ eze-alị ị ile zu oke — onwọnni hụn ya lẹ ibe ẹ wịlẹni.

³ Ụgb'ọnụ ị e nwun ufie-ufie kẹ eriri-ẹkwa ufie; ọnụ ị a maka mma. Nti i ẹbụbụọ rị a chan pọị kẹ imẹ gova-pomegraneti wẹ wabe — imẹ ẹkwa hụ i gi kpumẹ ihun.

⁴ Olu i sue kẹ ụnọ-nche Defidi hụn nwọn agba bu ọda; ihiẹn-olu i ma mma nọ kẹ ebe wẹ kụnmahunmẹ akpaịn nnụ-uku — wẹ ile wụ akpaịn ndị odogun-agha.

⁵ Ẹran ị ẹbụbụọ nọ kẹ mmụ ele ẹbụọ, ele wẹ mụ ejimẹ, hụn a ghahunmẹ ebẹhụ wẹ kụn lili jun.

⁶ D'e ru nwan mgbe eki fọn, onyinyọn a la, m k'a ghasọnmẹ elu ugu maa jun lẹ elu òke nsẹnsi jun.

⁷ Obi-m, y'a maka mma! Mma ị zu oke.

⁸ Sọn m nwan gha Lẹbanọnụ pụ, onyẹ m k'a lụ — sọn m gha Lẹbanọnụ pụ; gha mkpọnụnụ Ugu Amana hidan, mkpọnụnụ Ugu-Sẹnịru, mkpọnụnụ Ugu-Hẹmọnụ; sọn m gha ebe ụlọ ẹwọrọ rịsọnmẹ lẹ ugu liopadị nọ a kpa hidan.

⁹ Y'e werigụọ obi m, nwẹnẹ m, nwunyẹ m; y'e werigụọ obi m — ẹnya hụn i lee m hụ k'i gi weri akpobi m, akpụ ihiẹn-olu ohu imẹ hụn i yi k'i gi weri akpobi m.

¹⁰ Ihiẹn-ọsụsụọ ị a sụọka m, nwẹnẹ m, nwunyẹ m! Ihiẹn-ọsụsụọ ị sụọnahịn manya ọhụnma-ọhụnma; udẹn i kunnahịn ihiẹn ile e kun fuẹin — kunnahịn wẹ ọhụnma-ọhụnma!

¹¹ Nwunyẹ m, ụgb'ọnụ ị a sụọka ụsụọ; ọ sụọ kẹ mirin-obobo; ọ hụ a tan kẹ ọgba mirin-ẹnwụn dọn a tan mirin-ẹnwụn. Mirin-ẹran lẹ mirin-ẹnwụn rị ị okpuru ire. Ẹwuru i rị e kun fuẹin kẹ alị Lẹbanọnụ.

¹² Ugbo-obobo wẹ kpọkin akpọkin k'ị wụ — nwẹnẹ m, onyẹ m rị a lụ; mirin wẹ gbọnkin, isi-mirin wẹ dọkin kẹ ị wụ.

¹³ Ihiẹn rị imẹ yụ wụ ugbo wụ gova-pomegraneti hụn ogbe ẹ rị mma; hena lẹ nadị rịzị e sue imẹ i —

¹⁴ nadị lẹ safrọnụ lẹ kalamusu lẹ sinamọnụ lẹ ụdị osisi nsẹnsi ile; uwẹ lẹ maa lẹ alo lẹ ihiẹn-akụnkụn ile e kun fuẹin.

¹⁵ Isi-mirin rị imẹ ugbo-obobo, mirin rị mma rị e huni, hụn gha Ugu Lẹbanọnụ e huhẹ.

Hụn Okpoho

¹⁶ Ufere ẹbamịn-ugu, tẹnhin! Ufere ẹbamịn-ndịdan, fehẹzịkwọ! D'e fe ugbo-obobo m, kẹni o kungbarị. Nke-m ya banhan nwan ugbo-obobo ẹ d'e ri ezigbo mkpụrụ ọ mị.