Ẹbụ Solomọnụ 3 - Ika

Isi Nke Ẹtọ Hụn Okpoho

¹ Eki e we fọn, m hụ elu bẹdi m, a chọ Nke-m; a chọ m'a, ahụnnị m'a.

² M nọ sị, “M k'e lihi nwan d'a chọhunmẹmẹ ẹ imẹ obodo, ọgbara-ogbe lẹ ebe ịhịan ile a gha; m k'a chọ onyẹ ahụn a sụọ obi m ụsụọ.” Ya m nọ chọ a, ahụnnị m'a.

³ Ndị-nche a hụn m ebe wẹ rị a ghahunmẹ imẹ obodo. M nọ sị wẹ, “Ụnụ a hụnghọ onyẹ ahụn a sụọ obi m ụsụọ?”

⁴ A ghafegụ m wẹ hụ ẹkẹrẹ, m nọ hụn onyẹ a sụọ obi m ụsụọ. M nọ kwọndọn ẹ, jụ n'a hatukọ m'a — d'e ru n'e wẹhẹgụ m'a iwe nnẹ m, mmughẹ onyẹ hụn bu m ẹfọ.

⁵ Ịgbagba Jerusalẹm, ma isi mgbadan lẹ ele, akpasukwọlẹ ni mọbụ kpọtiẹn ihiẹn-ọsụsụọ d'e ru mgbe ọ sụọ a.

⁶ Onyẹ wụ hụnnị gha alị ọkpọ-nkụn lala, nọkẹ ebe ẹnwụnrụn rị a lọ? Onyẹ wụ hụnnị rị e kun fuẹin yeni udẹn maa lẹ nsẹnsi ọ kwọ — hụn wẹ gi ihiẹn ile e kun fuẹin rị afịa mẹmẹ?

⁷ Lee ẹnya! Ụgbọ-ẹshin Solomọnụ rọ; odogun-agha ọgụn-ẹtọ dula a — odogun-agha kachanrịnnị imẹ Izrẹlụ;

⁸ wẹ ile bu ọpịa-agha, ndị-agha wẹ zụn kẹ wẹ ile wụ; onyẹ-onyẹ bu ọpịa-agha a ukun, makẹ ihiẹn-egun uhinhin.

⁹ Eze wụ Solomọnụ lẹ enwẹn ẹ rụn ụgbọ-ẹshin hụ, ezigbo osisi alị Lẹbanọnụ kẹ o gi rụn a.

¹⁰ Siliva k'o gi mẹmẹ ẹgbe ndị o tumẹ imẹ ẹ, gi goru mẹmẹ alị a. Ẹkwa pọpụ ṅanrannị kẹ wẹ gi fụma oche ẹ; a chọ wẹ imẹ ẹ mma hụn a la ẹnya — ịgbagba Jerusalẹm mẹ ọhụn.

¹¹ Ịgbagba Zayọnụ, pụha nị-o! D'e lee ni Eze Solomọnụ lẹ okpu-eze hụn nnẹ ẹ kpumẹ ẹ ụhụọhịn ọ gba ẹhụhụọ, ụhụọhịn obi sụọ a ụsụọ!!