Ẹbụ-ọma 98 - Ika

Isi Nke Mmẹsatọ Kwasị Ọgụn-ẹnọ Chuku Wụ Eze Ụwa Ile

¹ Bụ nị nị Osolobuẹ ẹbụ ọhụn, makẹni ọ rụnọlẹ ọrụn atụmẹnya! O gigụọ ẹka-nni ẹ, ẹka-nsọ a, nwọnrin mmẹri.

² Osolobuẹ a ghọsịgụọ n'ọ zụọpụha azụọpụha; ọ nọgụọ idẹnya alị ndị ọzọ tụ ụya k'o dọn a tụ.

³ Ọ nyanhangụọ ghọsịzị ndị Izrẹlụ ihiẹn-ọsụsụọ a, ghọsị wẹ n'o furu wẹ gi e dọn ẹnya. Elu ụwa ile a hụngụọ nzụọpụha Osolobuẹ ẹnyi!

⁴ Ụwa ile, yini ni Osolobuẹ oro ịghọghọ! Gi ni ịghọghọ bụye ẹbụ, kpọ egu!

⁵ Gi ni ụbọ kpọnị Osolobuẹ egu; gi ni ụbọ kpọn'a egu!

⁶ Gbu ni opi lẹ ọdụ, ụnụ e yini Osolobuẹ wụ Eze oro ịghọghọ.

⁷ Ohimin lẹ ihiẹn jun imẹ ẹ wẹ zụn ụzụn; ụwa lẹ ndị bin'ẹ wẹ zụn ụzụn!

⁸ Iyi ile wẹ kpọma ẹka; ugu ile wẹ yimẹ oro ịghọghọ;

⁹ wẹ yimẹni Osolobuẹ oro ịghọghọ n'ọ lala d'e kin ụwa ikpe. O k'e kin ụwa ikpe ọhụnma, o k'a hannị alị ile ezigbo eṅẹn.