Ẹbụ-ọma 96 - Ika

Isi Nke Mmisin Kwasị Ọgụn-ẹnọ Chuku Ka

¹ Bụ nị nị Osolobuẹ ẹbụ ọhụn! Ụwa ile, bụnị nị Osolobuẹ ẹbụ!

² Bụnị nị Osolobuẹ ẹbụ; ja nị ẹfan a mma! A gwa nị wẹ oku nzụọpụha a ụhụọhịn ile rị elu.

³ Gwasọnmẹ ni wẹ oku ọghọ a imẹ alị ichẹn-ichẹn, gwasọnmẹ ni ndị alị ile ọrụn atụmẹnya ọ rụn.

⁴ Makẹni, Osolobuẹ e hikẹ ogbe, o furu nị wẹ ja a mma ọda-ọda; o furu nị wẹ gbaye ẹ karị mmọn ile —

⁵ makẹni mmọn ile alị ndị ọzọ e fe wụhụ ihiẹn wẹ kpụ, kanị Osolobuẹ wụ onyẹ ke igwere!

⁶ Ọghọ lẹ ikpẹn jun ẹ ẹhụ; ikẹn lẹ mma jun Ụlọ-nsọ a.

⁷ Ebọn ile, ku n'ẹ nị nke Osolobuẹ rọ, ku n'ẹ nị ọghọ lẹ ikẹn wụ nke Osolobuẹ.

⁸ Ye ni Osolobuẹ ọghọ furu ẹfan a; gi ni oyiye banhan ezi-ọgwa Ụlọ-nsọ a.

⁹ Fe ni Osolobuẹ ofufe nwọn ọghọ rị nsọ; ụwa ile, tụ nị egun ẹ!

¹⁰ Sị nị alị ndị ọzọ, “Osolobuẹ wụ eze!” Ụwa hụ ebe o butọ a, o mẹhunmẹkọ; Osolobuẹ ka hannị alị ile ezigbo eṅẹn.

¹¹ Ẹfọ ya sụọma igwere ụsụọ, akpakalị ya ghọghọma; ohimin lẹ ihiẹn ile jun imẹ ẹ wẹ zụnma ụzụn!

¹² Ugbo lẹ ihiẹn ile rị imẹ ẹ wẹ ghọghọma, osisi ile rị ọfịa e gi ịghọghọ bụma ẹbụ;

¹³ wẹ ghọghọma ihun Osolobuẹ, makẹni ọ lala d'e kin ụwa ikpe. O k'e kin ụwa ikpe furuni; o k'a hannị ndị alị ile ezigbo eṅẹn.