Ẹbụ-ọma 94 - Ika

Isi Nke Mmẹnọ Kwasị Ọgụn-ẹnọ Chuku K'e Mẹgwarị Ndị-ejẹ

¹ Osolobuẹ, Chuku hụn e mẹgwarị ndị-njọ; Chuku hụn e mẹgwarị ndị-njọ, dodo ghọsị nwan ẹka ị!

² Dodo lihi nwan, ọka-ikpe hụn a hannị ụwa ile eṅẹn; lihi n'i ye ndị mpache ihiẹn wẹ chọ!

³ Osolobuẹ dodo, elee mgbe kẹ ndị njọ k'e mẹbehi ihiẹn wẹ rị e mẹ? Elee mgbe kẹ ndị-njọ k'a ghọghọbehi?

⁴ Wẹ e kukarị enwẹn wẹ; ndị-njọ ile a nyan isi.

⁵ Osolobuẹ, wẹ rị a zọpịpịa ndị nke i, a bịangbu ndị hụn wụ ukuu i.

⁶ Wẹ e gbu ikpoho di wẹ nwụn lẹ abịamabịa; e gbu ndị nwọnlẹni nẹdi;

⁷ a sị, “Osolobuẹ ara hụn ẹnyi, Chuku Jekọpụ amarịn ihiẹn rị e mẹni.”

⁸ Ndị ẹwobi, rokpọ nị ihiẹnni; ndị-nzuzu, elee mgbe kẹ ụnụ k'e nwọnrin uche?

⁹ Onyẹ hụn bu ntịn che ịhịan ẹhụ, ọ nụkọ ihiẹn? Onyẹ hụn mẹmẹ ẹnya ịhịan, o leghakọ ụzọ?

¹⁰ Onyẹ hụn e ye alị ọwụlẹ mẹ eje-ihiẹn afụnfụn, o yekọ ụnụ afụnfụn? Onyẹ hụn e ye amamihiẹn?

¹¹ Osolobuẹ a marịngụọ obi ịhịan, nị ihiẹn ọlaliwi k'ọ wụ!

¹² Euu Osolobuẹ, onyẹ ị zụn e nwọnkẹ ngọzi, makẹni iwu i k'i gi a kuzi ẹ,

¹³ e gi ẹ e mẹ obi e ru wẹ alị ogẹn nsọngbu, d'e ru mgbe ndị-njọ danban olu i gutọnị wẹ.

¹⁴ Makẹni Osolobuẹ alatọkọ ndị nke ẹ; ọ gbakitọkọ ihiẹn ẹ azụụn.

¹⁵ Ya wụ, ezioku k'e rizi nwan eṅẹn, ndị ile obi wẹ kụrụ ọtọ e sọnmẹ ezioku.

¹⁶ Onyẹ k'a lụsọnni m ndị-ejẹni, wezụka Osolobuẹ? Onyẹ k'e kuni m ọnụ m ẹka ndịnị e mẹ eje-ihiẹn?

¹⁷ Omẹni ẹlẹ hụn Osolobuẹ yeni m ẹka, nkẹ w'a nụbehigụọ olu m elu ụwa!

¹⁸ M te sị, “Ụkụ m e kpori,” kanị Osolobuẹ, ị nọ ghọsị m ihiẹn ọsụsụọ kẹ onyẹ nke i, ghọdọn m.

¹⁹ Ogẹn ọwụlẹ obi gi a gbaka m, ịyụ e mẹ obi e ru m alị.

²⁰ Elee hụn biri yụ lẹ ndị eje-ọkịkị, ndị gi iwu wẹ rị e ti e mẹ eje-ihiẹn?

²¹ W'e zuni ndị ezi-omumẹ umẹ, a ma ndị nwọnlẹni ihiẹn wẹ mẹ ikpe-ọnwụn.

²² Kanị e gbọnni m Osolobuẹ; e gbọnni m Chuku m, okẹn-ọmụma hụn e che m nche.

²³ O k'e mẹ wẹ gi isi buru eje-ihiẹn wẹ mẹ, gbu wẹ la iwi makẹ eje-ihiẹn wẹ mẹ, Osolobuẹ wụ Chuku ẹnyi k'e gbu wẹ la iwi!!