Ẹbụ-ọma 92 - Ika

Isi Nke Mmẹbụọ Kwasị Ọgụn-ẹnọ Ẹbụ Ịja-mma

Ẹbụ-ọma rọ, ẹbụ Ụhụọhịn Ezumikẹn.

¹ Ịkpanmịn Osolobuẹ a rịka mma, e gi ẹbụ a ja ẹfan Onyẹ Ahụn Kachanrịnnị mma,

² e ku ẹ ụtụntụn nị y'e nwọnkẹ ihiẹn-ọsụsụọ ndị nke i, e ku ẹ uhinhin n'ị wụ onyẹ wẹ gi e dọn ẹnya;

³ a kpọye ẹ ụbọ eriri-iri lẹ ụbọ-layẹ, e gi ụbọ a kpọn'ị egu ịja-mma.

⁴ Makẹni, yụ wụ Osolobuẹ e gi ihiẹn y'e mẹ e mẹ m a ghọghọ; ihiẹn y'a rụn, e mẹ m a bụ ẹbụ ịghọghọ.

⁵ Euu Osolobuẹ, ọrụn ẹka ị e hikẹ ogbe! Iroro i e mikẹ!

⁶ Onyẹ marịnlẹni ihiẹn asẹka marịn ihiẹnni; onyẹ nwọnlẹni uche asẹka ghọta ihiẹnni.

⁷ Ọsụọn'a nị ndị-njọ e pujun kẹ irurue, ọsụọn'a nị ndị njọ ile rị a gha ihun, ntikpọ itẹbitẹ rị e che wẹ.

⁸ Kanị Osolobuẹ, ọghọ wụ nke i jẹnrin e jẹn!

⁹ Ẹghẹẹ Osolobuẹ, ndị-iṅẹnrẹn i k'a larịrị iwi; ị k'a chụzịza ndị ile e mẹ eje-ihiẹn!

¹⁰ Y'e mẹgụọ m ze kẹ mpịn efin ọfịa, mẹ m mẹri, y'e tekwamaọlẹ m mmẹri rịkẹ ezigbo udẹn i.

¹¹ Ẹnya m a hụngụọ kẹ ndị bunụmanị m dan, ntịn m a nụgụọ ihiẹn mẹ ndị-ejẹ.

¹² Ndị ezi-omumẹ k'e sue kẹ nkụ; wẹ k'e sue kẹ okẹn-osisi sida rị alị Lẹbanọnụ.

¹³ Osisi wẹ kụnye iwe Osolobuẹ kẹ wẹ wụ, osisi rị ezi-ọgwa Chuku e sue ọhụnma-ọhụnma.

¹⁴ Wẹ kagụdẹ ẹgẹdi, wẹ k'a gha a mịzị mkpụrụ, e du, a gha ihun;

¹⁵ a ghọsị nị Osolobuẹ wụ onyẹ kụrụ ọtọ, Ọmụma hụn e che m nche, ghalẹni e mẹ ịhịan njọ.