Ẹbụ-ọma 91 - Ika

Isi Nke Mmanaị Kwasị Ọgụn-ẹnọ Chuku Wụ Onyẹ-nche Ẹnyi

¹ Onyẹ hụn warị okpuru Chuku Kachanrịnnị, a rịsọnmẹ igungun Onyẹ Nwọn Ikẹn Ile.

² M k'a sị Osolobuẹ, “Ịyụ wụ igungun m, ebẹhụ zeni m'a gbaban; ịyụ wụ Chuku m, hụn m gi e dọn ẹnya.”

³ Makẹni, Osolobuẹ k'a zụọpụha ị amamgbe y'a dan ọnyan oshi-ọnyan, amamgbe eje-emu e gbuni e gbu i.

⁴ O k'e gi ugbele ẹka-nku ẹ kpumẹ i, ya nọdị okpuru nku ẹ, ihiẹn e mẹkọ ị. Akpaịn uku lẹ akpaịn nta wẹ gisọnmẹ e che ịhịan nche k'ọ wụ makẹni o furu w'a tụkwasị obi.

⁵ Y'a tụkọ egun ihiẹn-egun uhinhin mọbụ ụta efinaị;

⁶ mọbụ eje-ihiẹn warị imẹ ishi mọbụ ihiẹn e gbuni ebe eki rị elu.

⁷ Mmadụ nnụ-uku nwọn ikẹn dan ebe ị rị, nnụ-uku iri a dan ẹka-nni i, kanị o rukọ ị ẹhụ.

⁸ Ẹnya kẹ y'e gihụ e lee, e legha afụnfụn wẹ rị e ye ndị njọ.

⁹ Makẹni y'e gigụọ Osolobuẹ họnrin igungun, y'e gigụọ Chuku kachanrịnnị họnrin ebe i bi;

¹⁰ onwọnni eje-ihiẹn k'e mẹn'i; onwọnni eje-ihiẹn k'e ru iwe i.

¹¹ Makẹni, o k'a gwa ndị mmọn-ozi ẹ oku i, sị wẹ chemẹ i nche ebe-lẹ-ebe y'e jẹnlẹ.

¹² Wẹ k'a parị ị amamgbe y'e ti ụkụ ọmụma.

¹³ Ị k'a zọ ẹwọrọ lẹ agwọ ụkụ, zọdẹ okoro-ẹwọrọ lẹ ekọn ụkụ!

¹⁴ Osolobuẹ sị, “Makẹni ihiẹn m sụọ a, m k'a zụọpụha a, bu ẹ dọnmẹ ebe eje-ihiẹn jẹnkọlẹni d'e ru ẹ ẹhụ makẹni ọ marịnghọ ẹfan m.

¹⁵ O k'a kpọku m, a za m'a, m k'a nọyen'ẹ ogẹn nsọngbu; m k'a zụọpụha a, ye ẹ ọghọ.

¹⁶ M k'e ye ẹ ụtọmị ọhụnma-ọhụnma, ghọsị a kẹ m dọn a zụọpụha ịhịan.”