Ẹbụ-ọma 9 - Ika

Isi Nke Itenẹi Osolobuẹ A Ghọsịgụọ Onyẹ Ọ Wụ

Ẹbụ-ọma Defidi Wẹ ye onyẹ-ndu ẹbụ ẹbụnị. Wẹ gi olu “Ọnwụn Nwa” bụ a.

¹ M ka ja ị mma, Osolobuẹ, ọjịja-mma hụn gha m akpakalị obi pụha; m k'e ku ihiẹn ile a tụ ẹnya ị rụn!

² M k'e gi ufiri i nwọn anwịnrịn, ghọghọ! M k'e gi ẹbụ ja ẹfan ị mma, ịyụ, Onyẹ hụn Kachanrịnnị.

³ Ndị-iṅẹnrẹn m hụ a gbakinn'i azụụn — a kpọgburu, a nwụnhụn.

⁴ Y'a ghọsịgụọ n'o nwọnni ihiẹn m mẹ, y'a ghagụọ ukpo-eze i han ezigbo eṅẹn.

⁵ Y'a jụgbọgụọ alị ndị ọzọ rị ichẹn-ichẹn, tikpọ ndị-njọ; y'e finchanpụgụọ ẹfan wẹ jẹnrin-ejẹn!

⁶ Nke ndị-iṅẹnrẹn a gụgụọ, y'a bụpụsọnmẹgụọ obodo ndị wẹ bi — a nyanhankọzịdẹ wẹ wẹ!

⁷ Osolobuẹ wụ eze jẹnrin-ejẹn; ọ nọdịgụọ ukpo-eze ẹ n'ọ han ẹṅẹn.

⁸ O k'a hannị ụwa ile ezigbo eṅẹn; o k'e gi ezioku kị alị ile.

⁹ Osolobuẹ kẹ onyẹ wẹ rị a bịangbu a gbaburu, imẹ ẹ kẹ w'a gbaban ogẹn nsọngbu.

¹⁰ Ndị marịnn'ị gi i e dọn ẹnya, makẹni onwọnni ogẹn yụ wụ Osolobuẹ gi a latọ ndị bịa d'e kunrunn'i.

¹¹ Bụnị nị Osolobuẹ ẹbụ ịja mma, Osolobuẹ hụn nọ Zayọnụ rị Jerusalẹm a kị! D'a gwasọnmẹ ni alị ichẹn-ichẹn ihiẹn o mẹ!

¹² Makẹni Onyẹ hụn e gbugwarị ndị e gbu ọchụn k'ọ wụ; ọ nyanhan anyanhan — a ra zọ ẹkwan ndị wẹ rị a bịangbu.

¹³ Euu Osolobuẹ, lee ihiẹn ndị-iṅẹnrẹn m rị e kpokpo m! Mẹ omikẹn m, ịyụ hụn a gbapụha m ẹka ọnwụn —

¹⁴ kẹni m ku ihiẹn ile rị mma i mẹ — a nọ m igunrun ndị Zayọnụ rị Jerusalẹm ghọghọ makẹni y'a zụọpụhagụọ m.

¹⁵ Alị ndị hụn ghalẹni e fe i a danbangụọ imẹ mgbugbu wẹ gutọnị ịhịan! Ọnyan wẹ shimẹtọ nzuzue a nwụngụọ wẹ ụkụ!

¹⁶ Osolobuẹ a ghọsịgụọ onyẹ ọ wụ; ọ hangụọ ezigbo eṅẹn! Ndị-njọ e gigụọ isi wẹ buru ihiẹn wẹ mẹ! (Higayọnụ. Sẹla)

¹⁷ Ọnwụn wụ nke ndị-njọ — alị ile hụn zọ Osolobuẹ.

¹⁸ Osolobuẹ a zọchanrịnkọ ndị elu rị a fụ; ihiẹn ndị wẹ rị e mẹshi ikẹn rị e lee ẹnya a alakọ iwi.

¹⁹ Dodo lihi nwan, Osolobuẹ! Anịkwọlẹ ịhịan mẹri. Wẹhẹ alị ndị ahụn ghalẹni e fe i d'a hangbu wẹ eṅẹn ihun i.

²⁰ Osolobuẹ, dodo, bu egun che wẹ ẹnya! Mẹ alị ndị ghalẹni efee i marịn nị wẹ wụhụ ịhịan mmaka.