Ẹbụ-ọma 89 - Ika

Isi Nke Itenẹi Kwasị Ọgụn-ẹnọ Chuku Dodo Nyanhan Nkwa I Kwe!

Ẹbụ Maskilu Ẹtanị onyẹ Ẹzra.

¹ M k'e gi ihiẹn-ọsụsụọ Osolobuẹ bụ ẹbụ jẹnrin ejẹn! M k'e gi ọnụ m gwa agbọ ile n'ị wụ onyẹ wẹ gi e dọn ẹnya!

² E kugụọ m'a n'ị k'e nwọn ihiẹn-ọsụsụọ ndị nke i jẹnrin ejẹn, ị k'e mẹsọnmẹ hụn run'i jẹnrin ejẹn kẹ igwere dọn rịsọnmẹ ebe ọ rị.

³ Ịyụ sị, “E kwegụọ m onyẹ ahụn m họrị wụ Defidi nkwa, e kungụọnị m'a enwẹn m, sị,

⁴ ‘M k'e mẹ ụmụ ị gbọrị jẹnrin ejẹn; m k'e mẹ ukpo-eze i rị jẹnrin ejẹn.’ ” Sẹla

⁵ Igwere lẹ ihiẹn ile rịn'a rị a ja ọrụn-atụmẹnya ị mma; ndị mmọn-ozi nsọ hụzịkwọ a ja ị mma imẹ ozuzu wẹ, n'ị wụ onyẹ wẹ gi e dọn ẹnya.

⁶ Onyẹ nọ kẹ Osolobuẹ imẹ igwere? E lee mmọn nọ kẹ Osolobuẹ?!

⁷ Chuku w'a tụ egun ẹ imẹ ozuzu ndị mmọn-ozi k'ọ wụ, ịya ka ndị ile nọhunmẹn'ẹ mgbaye e nwọn.

⁸ Osolobuẹ, Chuku ihiẹn ile rị okpuru ẹ, onyẹ wụ dikẹn lekẹ yụ, Osolobuẹ? Ọ pụhachanrịn ifọn azụụn ile n'ị wụ Onyẹ wẹ gi e dọn ẹnya.

⁹ Ohimin rị e bulini rị okpuru i; ọ kpọma ẹbiri, ịyụ wụ onyẹ a kụsịn'a.

¹⁰ Ịyụ tikpụkpọ Rehabụ, Onyẹ mpache, gbu ẹ; ịyụ gi ikẹn i hi-ogbe chụzịza ndị-iṅẹnrẹn i.

¹¹ Igwere wụ nke i, elu-ụwa wụzịkwọ nke i; ịyụ ke ụwa lẹ ihiẹn ile rịn'a.

¹² Ịyụ ke ẹbamịn ugu lẹ ẹbamịn-ndịdan; ugu Tabọ lẹ ugu Hẹmọnụ hụ e gi ẹfan ị e yi oro ịghọghọ.

¹³ Ẹka ị ze eze; ẹka ị ze eze, ẹka-nni i hụ a kpa ikẹn!

¹⁴ Imẹ ihiẹn rị mma lẹ imẹ ịhịan k'o furu wụ ikẹn ukpo-eze i; imẹ hụn run'i lẹ ịwụ onyẹ wẹ e gi dọn ẹnya a kwanị ị ụzọ.

¹⁵ Ndị ma yi oro hụ wẹ gi e fe i e nwọnkẹ ngọzi, yụ wụ Osolobuẹ e lepụ wẹ ẹnya!

¹⁶ W'e gi ẹfan ị a ghọghọ uhinhin lẹ efinnaị, e weshi isi elu a ghọghọ nị y'a rịka mma.

¹⁷ Makẹni yụ wụ ikẹn wẹ hụn hi-ogbe; ọhụnma y'e mẹni ẹnyi haịn ẹka ẹnyi gi a karị.

¹⁸ Makẹni, akpaịn ẹnyi, eze ẹnyi, wụ nke Osolobuẹ; ẹghẹẹ, eze ẹnyi gha ẹka Onyẹ-nsọ alị Izrẹlụ bịa.

¹⁹ Ya kẹ ị gwa ndị nke i imẹ ọhụn, sị, “E yegụọnị m odogun-agha ohu ẹka gbọrị; e bushigụọ m onyẹ ohu m họrị imẹ ndị alịnị elu.

²⁰ A hụngụọ m odibo m wụ Defidi; e tegụọ m'a udẹn-nsọ m, tumẹ ẹ.

²¹ Ẹka m k'a rịsọnmẹ imẹ ndụn a; ẹka m k'e m'ẹ turu ọhụnma.

²² Onwọnni eṅẹnrẹn k'a karị a ẹka; onwọnni eje-ịhịan k'a bịangbun'ẹ.

²³ M k'e gwerinriẹnn'ẹ ndị-iṅẹnrẹn ẹ; m k'e gbu ndị rị e we iwe ẹ.

²⁴ M k'a gha e mẹn'ẹ ihiẹn m ku, ghọsịsọnmẹ ẹ ihiẹn-ọsụsụọ m; o k'e gi ẹfan m mẹrisọnmẹ agha.

²⁵ M k'e mẹ ẹ kịrudẹ Ohimin, mẹ ẹ kịru Iyi ile.

²⁶ O k'a kpọku m, sị m, ‘Ịyụ wụ Nẹdi m lẹ Chuku m, Ọmụma hụn a zụọpụhanị m.’

²⁷ M k'e yezikwọ a ọkwa okẹnnyẹ ibuzọ m, eze kachanrịn ndị-nze ile rị elu-ụwa.

²⁸ M k'a ghọsị a ihiẹn-ọsụsụọ kẹ onyẹ nke m jẹnrin ejẹn, e mẹ m nkwa m kwe ẹ turu jẹnrin ejẹn.

²⁹ Ụmụ a k'a rị jẹnrin ejẹn, ukpo-eze ẹ k'a tọ kẹ igwere.

³⁰ Omẹni ụmụ a latọ Iwu m, omẹni egini wẹ iwu m bi —

³¹ omẹni a dan wẹ iwu m, omẹni emẹni wẹ ihiẹn m sị wẹ mẹ,

³² e gi m mkpịnsịn sọn wẹ lẹ njọ wẹ, a fịan m wẹ ihiẹn yeni njọ wẹ.

³³ Kanị, aghọsibehikọ m Defidi ihiẹn-ọsụsụọ onyẹ-nke m; a gbakitọkọ m'a azụụn, makẹni m wụ onyẹ wẹ gi e dọn ẹnya.

³⁴ Emẹbehikọ m nkwa m kwe, ekuhutọkọ m ọnụ.

³⁵ E kungụọ m enwẹn m nke onyẹ rị nsọ nị onwọnni ogẹn m'e gi tụ Defidi ntụ.

³⁶ Ụmụ a k'a rịsọnmẹ jẹnrin ejẹn; ukpo-eze ẹ k'a tọ kẹ ẹnyanwụn.

³⁷ Ukpo-eze ẹ k'a rị jẹnrin ejẹn kẹ ifọn hụn wụ ọshẹri wẹ gi e dọn ẹnya rị igwere.” Sẹla

³⁸ Kanị y'a jụgụọ a nwan, y'a lagụọ a tọ; ị rị nwan e weni onyẹ i hukpu udẹn tumẹ iwe!

³⁹ Y'a kagbugụọ nwan nkwa i kwe odibo i. Y'a tụgụọ okpu-eze rị a isi ye alị.

⁴⁰ Y'e tikpọgụọ mgbọn ile wẹ tụnhunmẹ obodo ẹ, la ebe ile zeni ọ tụn tọ mkpọkọ-mkpọkọ.

⁴¹ Ndị ile rị a ghafeni hụ e gbu ẹ, a kwarị ihiẹn ẹ; ndị ile nọkunmẹn'ẹ rị nwan a mụ a ẹmụ.

⁴² Y'e mẹgụọ ẹka ndị-iṅẹnrẹn ẹ karị, y'e mẹgụọ ndị-iṅẹnrẹn ẹ ile ghọghọma nị e mẹri w'ẹ!

⁴³ Y'e mẹgụọ ọpịa o gi jẹn agha wụrụ ihiẹn la iwi; y'a kwadọnzin'ẹ imẹ agha!

⁴⁴ Y'e wepụgụọ ọghọ-eze ẹ o gi e gbuke, tụ ukpo-eze ẹ ye alị.

⁴⁵ Y'e mẹgụọ a ka ẹgẹdi ikẹn, bu ifẹnrẹn fụma a lekẹ ẹkwa. Sẹla

⁴⁶ Dodo Osolobuẹ, elee mgbe k'i k'e zuemẹbehi enwẹn i?! N'ị nị olulu i dụnsọnmẹ kẹ ọkụn jẹnrin ejẹn?!

⁴⁷ Nyanhan nị ẹkẹrẹ sụọ kẹ m k'a tọ! Kịnị kẹ ịhịan i ke eke wụdẹ nwan?!

⁴⁸ Onyẹ wụ onyẹ ahụn jẹnkọlẹni d'a nwụn? Onyẹ k'a sa ẹka wanahịn ọnwụn lẹ ili? Sẹla

⁴⁹ Euu Osolobuẹ, elebe kẹ ihiẹn-ọsụsụọ i nwọnni ndị nke i rịzị nwan, hụn i kwe Defidi nkwa a kunn'ẹ enwẹn i, makẹni ị wụ onyẹ wẹ gi e dọn ẹnya?

⁵⁰ Dodo Osolobuẹ, nyanhankwọ mkpari wẹ rị a kpari idibo i, mkpari m rị a narịn ẹka alị ndịnị ile bu ọda,

⁵¹ mkpari hụn ndị iṅẹnrẹn i rị a kpari i, Osolobuẹ; mkpari wẹ rị a kpari eze i hukpu udẹn i tumẹ ebe-lẹ-ebe o jẹnlẹ!!

⁵² Ịja-mma ya rịnị Osolobuẹ jẹnrin ejẹn! Isẹẹ! Isẹẹ!!