Ẹbụ-ọma 88 - Ika

Isi Nke Ẹsatọ Kwasị Ọgụn Ẹnọ Ẹkwan Eyemẹka

Ẹbụ rọ. Ẹbụ-ọma Itu ụmụ Kora rọ. Ye onyẹ-ndu ya. Wẹ gi olu Mahalatị Lẹanọtụ bụ a. Ẹbụ Maskilu Hẹmanị onyẹ ẹbozo Ẹzra rọ.

¹ Dodo Osolobuẹ, Chuku hụn a zụọpụhanị m, m hụ a kwan, a kpọku i efinnaị ile, a bịazị ihun i uhinhin!

² Dodo nị ekpere m ru i ntịn; mẹ ọhụnma gọn ntịn ẹkwan m!

³ Nsọngbu-nsọngbu kẹ m rị nwan a hụn; m rị nwan mgbọngbọn ili!

⁴ A gụngụọdẹ wẹ m ye ndị lakọ mmọn m nọ nwan kẹ onyẹ ndụn rịlẹni.

⁵ A lagụọ wẹ m tọ imẹ ndị nwụnnị, nọkẹ ndị wẹ gbu hụn rị nwan imẹ ili, ndị ị ghalẹni a nyanhanzị, ndị ị rịzịlẹni i eyeni ẹka!

⁶ Y'a tụgụọ m ye imẹ-imẹ ili, ebẹhụ migbu enwẹn ẹ, gba ishi!

⁷ Ị hụ e gi olulu a bịantu m, ọ hụ a kpọ m kẹ ẹbi-mirin. Sẹla

⁸ Y'e mẹgụọ ndị ọwụ m jụ m, y'e mẹgụọ ize m zemẹ wẹ. M nọ nwan kẹ onyẹ wẹ gi, asakọzị m ẹka wanahịn!

⁹ Ẹnya e mẹ m bishi-bishi yeni afụnfụn m rị a ta. Dodo Osolobuẹ, ụhụọhịn ile kẹ m gi a kịshi ẹka elu, a rịọ ị!

¹⁰ Mgbe ịhịan nwụnhụngụ kẹ y'a rụnn'a nwan ọrụn-atụmẹnya? Ra ịhịan nwụnhụngụ n'ọ sazị ẹka lihi ja ị mma? Sẹla

¹¹ Nị wẹ nọ imẹ ili gbama ọhụnma ị? Ra wẹ k'a nọ alị ntikpọ wụ Abadọnụ ku ẹ nị ị wụ onyẹ wẹ gi e dọn ẹnya?

¹² Nị wẹ nọ ebẹhụ gba-ishi hụn ọrụn atụmẹnya ị, ra wẹ k'a nọdẹ nwan alị ahụn wẹ nọ a zọchanrịn ihiẹn ile hụn a nị y'e mẹ ihiẹn furuni?

¹³ Mmẹ nwẹn rị a kpọku i, Osolobuẹ, a kpọku i ụtụntụn ile.

¹⁴ Euu Osolobuẹ, k'ị jụnị m nwan? K'i bupụnị m nwan ihun?

¹⁵ Gha okoro m lala, afụnfụn-afụnfụn kẹ m rị a ta, ọnwụn a kpọsọnmẹ m ihun; ndụn a gụ m i gi e rọn m egun.

¹⁶ Olulu i e rukpumẹgụọ m; y'e gigụọ ihiẹn-egun gbu m la iwi.

¹⁷ E fihunmẹ wẹ m nwan lekẹ okẹn-mirin uhinhin lẹ efinnaị, e fihunmẹgụọ wẹ m nwan azụụn ile.

¹⁸ Y'a napụgụọ m ndị ihiẹn m a sụọ lẹ ndị ọwụ m, ishi sụọ kẹ mmẹ lẹ ịya marịn nwan.