Ẹbụ-ọma 86 - Ika

Isi Nke Isin Kwasị Ọgụn-ẹnọ Osolobuẹ Dodo, Gbapụha M

Ekpere Defidi

¹ Osolobuẹ dodo, gọn m ntịn, n'ị za m, makẹni m rị e ri ụya; elu rị a fụ m.

² Dodo, dọnmẹ m ndụn, makẹni m hụ e dọnmẹn'i enwẹn m; dodo zụọpụha odibo i hụn gi i dọn ẹnya — makẹni ịyụ wụ Chuku m!

³ Dodo Di-nwọnni-ẹnyi, mẹni m omikẹn, makẹni m'a kpọku i uhinhin lẹ efinnaị.

⁴ Dodo, mẹ ẹfọ sụọma odibo i ụsụọ makẹni yụ wụ Osolobuẹ kẹ m'e fe.

⁵ Makẹni y'a rịka mma, Osolobuẹ; y'a gbagharị njọ; y'a ghọsị ndị a kpọkun'i ihiẹn-ọsụsụọ ọda-ọda.

⁶ Dodo Osolobuẹ, gọn ntịn ekpere m; nụ ẹkwan m gi rị a rịọ ị.

⁷ M'a kpọku i ogẹn nsọngbu, makẹni y'a za m aza.

⁸ Onwọnni mmọn ọwụlẹ nọ kẹ yụ, Osolobuẹ, ọrụn-atụmẹnya nọ kẹ nke i arịa.

⁹ Ịyụ ke alị ile, Osolobuẹ, wẹ k'a bịa d'a kụnị ị isi-alị; wẹ k'a gha a ja ẹfan ị mma.

¹⁰ Makẹni ị wụ onyẹ-uku, y'a rụnzịkwọ ọrụn-atụmẹnya; ịyụ sụọ wụ Chuku.

¹¹ Osolobuẹ, dodo kuzi m ụzọ ị, kẹni m'e gi ezioku i e bi; mẹ m e gi akpak'alị obi m a gbaye ẹfan ị.

¹² Osolobuẹ wụ Chuku m, m k'e gi obi m ile kpanmịn ị; m k'e ye ẹfan ị ọghọ jẹnrin ejẹn.

¹³ Makẹni y'a ghọsịọlẹ m ihiẹn-ọsụsụọ ọda-ọda! Y'a zụọpụhagụọ m alị-mmọn migbu enwẹn ẹ.

¹⁴ Chuku dodo, ndị rị e mẹkarị enwẹn wẹ e bugụọ nụmanị m; ndị obi wẹ rị azụụn rị a chọ m isi; onwọnni ihiẹn wẹ kpọ ị.

¹⁵ Kanị Osolobuẹ, ị wụ Chuku omikẹn hụn e mẹyeni ịhịan, Chuku hụn ghalẹni e bukẹnrin olulu, onyẹ okẹn ihiẹn-ọsụsụọ hụn e mẹsọnmẹ hụn run'ẹ.

¹⁶ Lee m nwan ẹnya, mẹni m omikẹn; dodo ye m ikẹn, dodo zụọpụha m, nị nnẹ m wụ odibo i.

¹⁷ Mẹni m ihiẹnni gi ghọsị nị ị rị mma, kẹni ndị iwe m hụn a, ifẹnrẹn e mẹgbu wẹ, makẹni yụ wụ Osolobuẹ e yegụọnị m ẹka, makẹni y'a kasịgụọ m obi.