Ẹbụ-ọma 83 - Ika

Isi Nke Ẹtọ Kwasị Ọgụn Ẹnọ Osolobuẹ, Kpayịya Ihiẹn Wẹ Romẹni Ẹnyi

Ẹbụ Asafụ rọ. Wẹ bụ a kẹ ẹbụ

¹ Chuku dodo, agbakwọlẹ nkịtịn! Chuku dodo, akpọkinlẹ ntịn, akụkụmalẹ ẹka!

² E lee ndị-iṅẹnrẹn i kẹ wẹ rị a ban mban; ndị e we iwe i a kpamakwọ ikẹn!

³ Wẹ hụ e gi akọ e zuni ndị nke i umẹ, wẹ hụ e zuni ndị rị ị mkpa umẹ.

⁴ Wẹ hụ a sị ibe wẹ, “Bịa nị, nị ẹnyi tikpọ alị wẹ la iwi, kẹni ẹfan Izrẹlụ gụ!”

⁵ E zugụọnị wẹ i eje-umẹ; e kwerigbamagụọ wẹ bunụman'ị:

⁶ kẹ ndị alị Ẹdọm kẹ ndị Ishmẹlụ; ndị Mụabụ lẹ ndị Hagri;

⁷ ndị Gẹbalụ lẹ ndị Amọnụ lẹ ndị Amalẹki; ndị alị Filistia lẹ ndị bi alị Taya.

⁸ Ndị alị Asiria nkẹ a banyegụọnị wẹ; Asiria e yemẹgụọnị ụmụ Lọtụ ẹka! Sẹla

⁹ Mẹ wẹ ihiẹn i mẹ ndị alị Midianị, ihiẹn hụn i mẹ ọkị-agha wụ Sisẹra lẹ eze wẹ wụ Jabini mkpẹnrẹn iyi Kishọnụ —

¹⁰ ndị hụn i tikpọ la iwi imẹ Ẹndọ, ozun wẹ e retọ alị nọkẹ nsịn.

¹¹ Mẹ ndị-isi wẹ ihiẹn i mẹ Orẹbụ lẹ Zibu; gbu ndị-nze wẹ k'i dọn gbu Zẹba lẹ Zal'muna,

¹² hụn te sị, “Nị ẹnyi weri ni ihiẹn wẹ, ezigbo alị Chuku ye wẹ hụn wẹ nọ a zụn anụ.”

¹³ Chuku m, dodo, mẹ wẹ ihiẹn ufere mẹ uzunzun, mẹ wẹ ihiẹn ufere mẹ ẹfịfịa-ọkpọnkụn.

¹⁴ Mẹ wẹ ihiẹn ọkụn e mẹ ọfịa, ihiẹn ọkụn e mẹ ọfịa elu ugu,

¹⁵ gi eje-ẹbi i chụ wẹ, gi okẹn ufere i rọn wẹ okẹn egun!

¹⁶ Gbe ifẹnrẹn ye wẹ ihun, Osolobuẹ, kẹni wẹ gbayemẹ ẹfan ị.

¹⁷ Ifẹnrẹn ya mẹ wẹ, ya mẹgbu wẹ jẹnrin ejẹn; wẹ fa, la iwi.

¹⁸ Mẹ wẹ marịn nị ịyụ sụọ, hụn ẹfan a wụ Osolobuẹ, wụ Onyẹ hụn Kachanrịnnị imẹ ụwa ile.