Ẹbụ-ọma 82 - Ika

Isi Nke Ẹbụọ Kwasị Ọgụn Ẹnọ Osolobuẹ Sụọ Ma Han Eṅẹn

Ẹbụ-ọma Asafụ

¹ Chuku e werigụọ ọnọdị a imẹ ọgwa a, ịya a han eṅẹn imẹ igunrun mmọn ile.

² Ọ sị wẹ: “Elee mgbe kẹ ụnụ a hanbehi eje-eṅẹn elee mgbe kẹ ụnụ e gbeyebehini ndị-njọ?! Sẹla

³ E kinni ni ndị nwọnlẹni ihiẹn wẹ kpọ wẹ lẹ ndị nwọnlẹni nẹdi ọnụ wẹ; a tụnị nị ndị rị e ri ụya lẹ ndị-igbẹnnyẹ ụya.

⁴ Zụọpụha nị ndị nwọnlẹni eyemẹka lẹ ndị rị e ri ụya; zụọpụha nị wẹ ẹka ndị-ejẹ.

⁵ Ụnụ amarịn ihiẹn, ụnụ enwọn nghọta, ụnụ rị a wahunmẹ imẹ ishi, elu-ụwa e mẹ zizizi.

⁶ E kughọ m'a nị ‘Mmọn kẹ ụnụ wụ, ụnụ ile wụ ụmụ Chuku ahụn kachanrịnnị.’

⁷ Kanị, ụnụ k'a nwụn nwan kẹ ịhịan-mmaka; ụnụ k'a dan kẹ ndị-nze ndị ọzọ.”

⁸ Chuku dodo, d'a kịma ụwa, makẹni alị ile wụ nke i.